Ebbaruha ya Paulo eya Kabiri Hali Abakolinso
11 Noobu ndaaba ninzooka nk’omuntu atarukwetegereza, naakugondeze mungumiisirize. Kandi amananu gali, nimungumiisiriza! 2 Nimbakwatirwa ihali ery’obwaruhanga,* habwokuba nyowe nyenyini nk’abaraganiza kubasweza omusaija omu, nukwo nsobole kubahayo hali Kristo nk’omwisiki anyakweziibwe ow’atakabyamaga n’omusaija. 3 Baitu nintiina ngu, nkooku enjoka yasoonasoonere Haawa omu bugobya bwayo, na inywe ebiteekerezo byanyu nibisobora kuhabisibwa, mukaleka kuhondera Kristo omu mananu n’omu kwezebwa. 4 Habwokuba kakuba omuntu aija kandi akatebeza hali Yesu arukwahukana hali ogu ou twatebiize, rundi kakuba omuntu atunga omwoyo ogundi ogurukwahukana hali ogu, ogu mwatungire rundi amakuru amarungi agarukwahukana hali ago aga mwaikiriize, kibanguhira kumugumiisiriza. 5 Ninteekereza ngu busaho kintu na kimu abakwenda banyu abakuru muno eki barukunkiza. 6 Baitu noobu kiraaba ngu timmanyire kubaza kurungi, ninkigumya ngu nyine okumanya kwingi kandi omu buli mulingo gwona tukabooleka kurungi okumanya oku omu bintu byona.
7 Rundi nkakora ekibi obu nayebundaize nukwo inywe musobole kunyumizibwa, habwokuba n’okusemererwa nkabagambira amakuru amarungi agarukukwata hali Ruhanga mutansaswire? 8 Ebitebe ebindi nkabinyaga* obu naikiriize obusagiki bwabo nukwo nsobole kuheereza inywe. 9 Baitu obu nkaba ndi na inywe kandi natunga obwetaago, ntafooke mugugu hali omuntu weena habwokuba ab’oruganda kuruga Makedoni bakampa omu bwingi ebi nkaba ninyetaaga. Ego, omu buli mulingo gwona nkeetantara kufooka mugugu hali inywe kandi nikyo ndukwija kugumizaamu ninkora. 10 Nkooku amananu ga Kristo gali omuli nyowe, tindukwija kuleka kwenyumiriza omu bicweka bya Akaya. 11 Habwa nsonga ki? Habwokuba tindukubagonza? Ruhanga akimanyire ngu nimbagonza.
12 Haroho abarukwehaisa nibagamba ngu bakwenda nka itwe, nahabweki niinyija kugumizaamu ninkora eki nyikaire ninkora nsobole kubalemesa kuba n’ensonga yoona ei barukusigikirraho kwehaisa. 13 Habwokuba abasaija nk’abo bakwenda b’ebisuba ababiihabiiha abandi nibeefoora nk’abakwenda ba Kristo. 14 Eki tikirukuhuniiriza, habwokuba na Sitaani na uwe aikara naayefoora malaika w’ekyererezi. 15 Nahabweki tikirukuhuniiriza abaheereza be na bo, obu baikara nibeefoora nk’abaheereza b’okuhikirra. Baitu empero yabo niija kusigikirra ha bikorwa byabo.
16 Niinyongera ningamba nti: Hatabaho muntu weena ayateekereza ngu, tindukwetegereza. Baitu noobu muraaba nimuteekereza muti, munyikirize nk’omuntu ow’atarukwetegereza, nukwo na nyowe nsobole kwehaisaamu kake. 17 Hati ebi ndukubaza, tindukubibaza ngu habwokuba nimpondera ekyokurorraho kya Mukama waitu, baitu nk’omuntu atarukwetegereza arukwehaisa. 18 Habwokuba baingi nibeehaisa habw’ebintu eby’omubiri, na nyowe niinyija kwehaisa. 19 Nkooku muli bantu “ab’okwetegereza,” n’okusemererwa mugumiisiriza abatarukwetegereza. 20 Amananu gali, mugumiisiriza ogu weena ow’abafoora bairu, ow’abalyaho ebyanyu, ow’abaaka ebi mwine, ow’abeehaisanirizaaho, n’ogu ow’abateera h’amaiso.
21 Nikituswaza kubaza ekintu kinu, habwokuba nikisobora kuzooka ngu tukeetwaza nk’abaceke.
Baitu abandi obu baraaba nibeetwaza nk’abamanzi, nimbaza nk’omuntu atarukwetegereza—na nyowe ninyetwaza nk’omumanzi. 22 Bali Bahebburaniya? Na nyowe ndi. Bali Baisaleeri? Na nyowe ndi. Bali ruzaaro rwa* Ibburahimu? Na nyowe ndi. 23 Bali baheereza ba Kristo? Ningarukamu nk’ow’agwire iraro, niinyowe arukubakira: Nkozere omulimo ogw’amaani, ntairwe omu nkomo emirundi nyingi, ntiirwe emirundi etarukubarwa, kandi nkizire okufa emirundi nyingi. 24 Emirundi etaano, Abayudaaya bakanteera kibboko 39, 25 emirundi esatu nkateerwa emiigo, omurundi gumu nkateerwa amabaale, emirundi esatu emeeri ezi nagenderamuga zikacwekacweka, nkaraara hagati omu nyanja kandi nasiibamu; 26 emirundi nyingi omu ngendo zange, nabaga omu kabi ak’ebisaaru, omu kabi k’abasuma, omu kabi kuruga omu bantu bange bonyini, omu kabi kuruga omu mahanga, omu kabi kuruga omu rubuga, omu kabi kuruga omu irungu, omu kabi aka ha nyanja, omu kabi hagati y’ab’oruganda ab’ebisuba, 27 omu kukora n’amaani n’okutalibana, omu kutabyama ekiro emirundi nyingi, omu njara n’iroho, omu kutaba n’ebyokulya emirundi nyingi, omu bufuki n’okuburwa ebyokujwara*.
28 Oihireho ebi byona, haroho ekintalibaniza buli kiro:* nyeraliikirra* muno habw’ebitebe byona. 29 Omuntu obu aba muceke, tinceka? Nooha atabaijuka, nyowe ntabiihiirwe?
30 Obu kiraaba nikinyetaagisa kwehaisa, niinyija kwehaisa n’ebintu ebirukwoleka obuceke bwange. 31 Ruhanga kandi Ise Mukama waitu Yesu, Ogu ow’asemeriire kukugizibwa ebiro n’ebiro, akimanyire ngu tindukubaza ebisuba. 32 Omu Damasiko, omulemi ow’akaba ali hansi y’Omukama Aleta, akaba alinzire orubuga rwa Damasiko nukwo ankwate, 33 baitu bakansirimura omu kigega kuraba omu idirisa ery’ekisiika eky’orubuga, kandi tiyasobora kunkwata.