Ebbaruha ya Paulo ey’Okubanza Hali Abakolinso
1 Nyowe Paulo, ayayeserwe kuba omukwenda wa Kristo Yesu habw’okugonza kwa Ruhanga, ndi hamu na Sosene ow’oruganda mugenzi waitu, 2 nimpandiikira abali omu kitebe kya Ruhanga eky’omu Kolinso, hali inywe abeeziibwe omu Kristo Yesu, abeeserwe kuba abarukwera, hamu n’abo boona abali buli hamu abarukukunga ibara lya Mukama waitu Yesu Kristo, anyakuli Mukama wabo kandi Mukama waitu:
3 Embabazi enyingi muno hamu n’obusinge kuruga hali Ruhanga Isiitwe hamu na Mukama waitu Yesu Kristo bibe na inywe.
4 Butoosa nyikara ninsiima Ruhanga wange habwanyu, habw’embabazi za Ruhanga enyingi muno ezaboolekerwe omu Kristo Yesu; 5 habwokuba omu bintu byona mufookere baguuda omuli uwe, mutungire obusobozi obw’okubaza hamu n’okumanya kwona, 6 habwokuba obwakaiso oburukukwata hali Kristo bugumiibwe omuli inywe, 7 nukwo mutaburwaho ekisembo kyona, obu mulindiriire n’ekihika kingi okusuukururwa kwa Mukama waitu Yesu Kristo. 8 Ruhanga naija kubagumya kuhikira kimu ha mpero, nukwo hatabaho kyona eki mwajunaanwa ha kiro kya Mukama waitu Yesu Kristo. 9 Ruhanga mwesigwa, ayabeesere kukorra* hamu n’Omwana we, Yesu Kristo Mukama waitu.
10 Hati ab’oruganda, nimbateererra omu ibara lya Mukama waitu Yesu Kristo, ngu inywena mwikirranize omu ebi, ebi murukubaza kandi hatabaho okwebaganizaamu omuli inywe, baitu mube omu bumu omu nteekereza kandi mube n’ekigendererwa ekirukusisana. 11 Bamu h’ab’omu nju ya Kilowe bangambiire ebirukubakwataho inywe ab’oruganda ngu, omuli inywe harumu okwebaganizaamu. 12 Kinu nikyo ndukumanyisa, buli omu omuli inywe naagamba ati: “Nyowe ndi wa Paulo,” abandi ngu: “Nyowe ndi wa Apolo,” abandi ngu: “Nyowe ndi wa Keefa,”* kandi abandi ngu: “Nyowe ndi wa Kristo.” 13 Kristo abaganiziibwemu? Paulo nuwe yaitiirwe ha muti habwanyu? Rundi mukabatizibwa omu ibara lya Paulo? 14 Ninsiima Ruhanga ngu ntabatize muntu n’omu hali inywe, oihireho Kirisipo na Gayo, 15 nukwo hatagira n’omu ayagamba ngu mukabatizibwa omu ibara lyange. 16 Ego, nkabatiza n’ab’omu nju ya Sitefana. Baitu abandi abasigaire, timmanyire obu ndaaba nabatiize omuntu ondi weena omuli inywe. 17 Habwokuba, Kristo atantume kubatiza, baitu akantuma kurangirra amakuru amarungi, kandi hatali omu magezi ag’ebigambo, nukwo omuti* gwa Kristo gutafoorwa ekitaine mugaso.
18 Ebigambo ebirukukwata ha muti by’obudomadoma hali abo abarukuhwerekerra, baitu hali itwe abarukujunwa, gali maani ga Ruhanga. 19 Habwokuba kikahandiikwa kiti: “Ndihwerekereza amagezi g’abantu ab’amagezi, kandi ndyanga* okwetegereza kw’abarukwetegereza.” 20 Omuntu ow’amagezi ali nkaha? Omuhandiiki* ali nkaha? Omuteezi w’empaka ow’enteekaniza ey’ebintu* enu ali nkaha? Amagezi g’ensi enu Ruhanga atagafoole obudomadoma? 21 Habwokuba, ensi kuraba omu magezi gaayo etamanye Ruhanga, Ruhanga omu magezi ge akarora ngu kirungi kujuna abo abarukwikiriza kuraba omu budomadoma bw’ebintu ebirukutebezebwa.
22 Abayudaaya basaba obwokurorraho kandi Abayonaani baserra amagezi; 23 baitu itwe tutebeza ebirukukwata hali Kristo ayaitiirwe ha muti, hali Abayudaaya bibaleetera kutabaijuka kandi hali ab’amahanga by’obudomadoma. 24 Baitu hali abo abeeserwe, Abayudaaya n’Abayonaani, Kristo maani ga Ruhanga kandi magezi ga Ruhanga. 25 Habwokuba ekintu kya Ruhanga eky’obudoma nikikira abantu amagezi, kandi ekintu kya Ruhanga ekitaine maani nikikira abantu amaani.
26 Ab’oruganda, obu murukurora okwetwa kwanyu, tibali baingi abaayeserwe abatwarwa kuba b’amagezi kusigikirra ha ndora y’abantu,* tibali baingi ab’amaani, n’ab’ebitiinisa* tibali baingi, 27 baitu Ruhanga akakomamu ebintu eby’obudomadoma eby’ensi, nukwo aswaze abantu ab’amagezi; kandi Ruhanga akakomamu ebintu ebitaine maani eby’ensi, nukwo aswaze ebintu ebiine amaani; 28 kandi Ruhanga akakomamu ebintu ebirukurorwa nk’ebitaine mugaso kandi ebirukugaywa, ebintu abantu ebi batwara nk’ebitaroho, nukwo aiheho ebintu ebiroho ebirorwa nk’eby’omugaso, 29 nukwo hatabaho omuntu weena ayayehaisaniza omu maiso ga Ruhanga. 30 Baitu habwe, muli omu bumu na Kristo Yesu, hali itwe, ow’afookere amagezi kuruga hali Ruhanga, n’okuhikirra, n’okwezebwa, hamu n’okulekerwa kuraba omu kicunguro, 31 nukwo kibe nkooku kyahandiikirwe kiti: “Ogu arukwenyumiza, leka ayenyumirize omuli Yahwe.”*