Ebbaruha ya Paulo ey’Okubanza Hali Abakolinso
3 Nahabweki ab’oruganda, ntasobole kubaza na inywe nk’abantu ab’eby’omwoyo, baitu nk’abantu ab’omubiri, nk’abaana abato omu Kristo. 2 Nkabanywisa amata, tinabaliisa ebyokulya ebigumire, habwokuba mukaba mutakagumire ekirukumara. Kandi amananu gali, na hati timukagumire ekirukumara, 3 habwokuba mukyali b’omubiri. Nkooku omuli inywe harumu ihali n’okukungana, hati timuli b’omubiri kandi timurukugenda nk’abantu abandi oku bakora? 4 Habwokuba omuntu omu obu agamba ati: “Nyowe ndi wa Paulo,” baitu ondi akagamba ati, “Nyowe ndi wa Apolo,” nimuba mutarukwetwaza nk’abantu abandi?
5 Hati Apolo nuwe oha? Kandi Paulo nuwe oha? Bali baheereza kandi kuraba omuli bo mukafooka baikiriza, nkooku Mukama waitu yaikiriize buli omu. 6 Nkabyara, Apolo yaseeserra amaizi, baitu Ruhanga yaikara naakuza. 7 Nahabweki, ow’ahaisanizibwa tali nuwe ogu ow’abyara rundi ow’aseeserra amaizi, baitu Ruhanga ow’akuza. 8 Nahabweki, ogu ow’abyara n’ogu ow’aseeserra amaizi, boona bali muntu omu,* baitu buli muntu alitunga empeera ye wenka kusigikirra ha mulimo gwe. 9 Habwokuba tuli bakozi abarukukorra hamu na Ruhanga. Inywe muli musiri gwa Ruhanga oguli omu kulimwa, ekyombeko kya Ruhanga.
10 Kusigikirra ha mbabazi za Ruhanga enyingi muno ezampairwe, nkataho omusingi nk’omwombeki omurungi,* baitu omuntu ondi naayombeka ha musingi ogu. Baitu leka buli omu aikale naayegendereza omulingo arukugwombekaho. 11 Habwokuba busaho muntu weena ow’asobora kutaho omusingi ogundi kukira oguroho, kandi omusingi ogu nuwe Yesu Kristo. 12 Nahabweki, kakuba omuntu weena ayombeka ha musingi naakozesa ezaabbu, efeeza, amabaale ag’omuhendo, emiti, obunyansi, rundi embuba,* 13 buli mulimo gw’omuntu nigwija kurolerwa kimu* kurungi, ekiro kirigwoleka, habwokuba omurro nigwija kugwoleka, kandi nigwija kwoleka omulimo ogwa buli muntu weena nkooku gurukusisana. 14 Kakuba omulimo gwona omuntu ogu yayombekere ha musingi ogu gwikaraho, alitunga empeera; 15 baitu kakuba omulimo gw’omuntu weena gwokebwa, alifeerwa, baitu uwe alijunwa; baitu obu alijunwa, alisisana nk’ow’arabire omu murro.
16 Timukimanyire ngu inywe muli yekaru ya Ruhanga, kandi ngu omwoyo gwa Ruhanga gwikara omuli inywe? 17 Kakuba omuntu weena ahwerekereza yekaru ya Ruhanga, Ruhanga alimuhwerekereza; habwokuba yekaru ya Ruhanga neeyera kandi niinywe yekaru egi.
18 Hatabaho omuntu ayayebiihabiiha wenka: Kakuba omuntu weena ateekereza ngu w’amagezi omu nteekaniza ey’ebintu* enu, leka afooke mudomadoma nukwo asobole kufooka w’amagezi. 19 Habwokuba amagezi ag’ensi enu budomadoma hali Ruhanga, habwokuba kikahandiikwa kiti: “Akwata ab’amagezi omu rugezigezi rwabo.” 20 Kandi kikongera kyahandiikwa kiti: “Yahwe* akimanyire ngu, enteekereza z’abantu ab’amagezi tiziine mugaso gwona.” 21 Nahabweki, hatagira omuntu weena ayayenyumiriza* omu bantu; habwokuba ebintu byona byanyu, 22 k’abe Paulo, Apolo, Keefa,* ensi, obwomeezi, okufa, ebintu ebiroho hati, rundi ebintu ebiriija, byona byanyu; 23 kandi inywe muli ba Kristo, Kristo na uwe ali wa Ruhanga.