Ebbaruha ya Paulo ey’Okubanza Hali Timoseo

2 Eky’okubanza, nimbeekambisa kwesengereza, kusaba, kusabira abandi, n’okusiima habw’abantu aba buli mulingo, 2 musabire abakama, n’abo boona abali omu biikaro ebya haiguru,* nukwo tusobole kwikara tuteekaine kandi twine obusinge nitwemarra hali Ruhanga kandi nitwegendereza omu buli kimu. 3 Kinu kirungi kandi nikiikirizibwa omu maiso g’Omujuni waitu Ruhanga, 4 ow’arukugonza abantu aba buli mulingo kujunwa kandi batunge okumanya okuhikire okw’amananu. 5 Habwokuba haroho Ruhanga omu, n’omuteeraniza* omu hagati ya Ruhanga n’abantu, kandi ogu nuwe Kristo Yesu, 6 ayahaireyo ekicunguro habwa boona* kandi kinu nikyo kirukwija kuheebwaho obwakaiso omu kasumi kaakyo akahikire. 7 Habw’ekigendererwa eky’obwakaiso bunu, nkakomwa kuba mutebezi kandi omukwenda, ndi mwegesa hali amahanga ha birukukwata ha kwikiriza hamu n’amananu, nimbaza amananu tindukubiiha.

8 Nahabweki, ningonza abasaija omu biikaro byona basabege baimukize emikono yabo omu bwesigwa, bataine ekiniga, kandi batarukuteera empaka. 9 Omu mulingo nugwo gumu, abakazi basemeriire kujwara ebijwaro ebisemeriire, ebirukuhaisa ekitiinisa, ebirukwoleka okwetegereza* hatali kwemarra ha kusiba amasoke ag’omulembe, kujwara ezaabbu, eruuru, rundi ebijwaro ebya sente nyingi, 10 baitu bajwale omu mulingo ogusemeriire abakazi abarukumanywa nk’abarukuha Ruhanga ekitiinisa, kandi kinu bakikolege kuraba omu bikorwa byabo ebirungi.

11 Omukazi obu arukuba naayega aculeerege* kandi abe muhulizi mali. 12 Tindukwikiriza omukazi kwegesa rundi kulema omusaija, baitu omukazi aikalege aculiire.* 13 Habwokuba Adamu nuwe yabandize kuhangwa, hanyuma haahonderaho Haawa. 14 Ekindi, Adamu atabiihwebiihwe, baitu omukazi nuwe yabiihabiihirwe, yagwa omu kibi. 15 Baitu araalindirwaga omu kuzaara abaana, kakuba agumizaamu* omu kwikiriza, omu kugonza, omu burukwera, n’omu kwetegereza kurungi.*