Ebbaruha ya Paulo Hali Abagaratiya
3 Inywe Abagaratiya abataine magezi! Nooha yababiihabiihire, kandi kunu mukamanyisibwa kurungi okufa kwa Yesu Kristo ayateeriirwe emisumaali ha muti?* 2 Ningonza kubakaguza* ekintu kimu: Mukatunga omwoyo kuraba omu kukora ebiri omu biragiro,* rundi habw’okwikiririza omu bintu ebi mwahuliire? 3 Timwine magezi naakake? Hanyuma y’okutandika kuhondera omuhanda ogw’eby’omwoyo,* hati mucwiremu kumalirra omu muhanda ogw’omubiri?* 4 Mukaraba omu kubonabona kwingi ha bwa busa? Ninkigumya ngu mutabonabonere busa. 5 Hati, ogu arukubaha omwoyo kandi arukukora ebyamahano omuli inywe, naabikora ngu habwokuba nimworobera ebiragiro,* rundi habwokuba nimwikiririza omuli ebi, ebi mwahuliire? 6 Nkooku Ibburahimu “yaikiririize omuli Yahwe,* kandi yabarwa nk’ow’okuhikirra.”
7 Mananu kwo mukimanyire ngu abo abaine okwikiriza nubo baana ba Ibburahimu. 8 Kuraba omu byahandiikirwe, Ruhanga akaranga ngu yaakwesere abantu ab’amahanga ab’okuhikirra habw’okwikiriza, kandi akaranga kara amakuru ganu hali Ibburahimu, obu yagambire ati: “Kuraba omuli iwe amahanga goona galiheebwa omugisa.” 9 Nahabweki abo abaine okwikiriza, nibaheerwa hamu omugisa na Ibburahimu, ow’akaba aine okwikiriza.
10 Abo boona abateeka obwesige bwabo omu kukora ebiri omu biragiro* bali hansi y’omukyeno, habwokuba kikahandiikwa kiti: “Akyenerwe* omuntu weena ow’atakora ebintu byona ebihandiikirwe omu muzingo gw’Ebiragiro.” 11 Baitu nikyeyolekera kimu kurungi ngu, kuraba omu biragiro busaho omuntu n’omu Ruhanga ou asobora kweta ow’okuhikirra, habwokuba “omuntu ow’okuhikirra alyomeera habw’okwikiriza.” 12 Hati Ebiragiro tibirukusigikirra ha kwikiriza. Oihireho, “ogu weena ow’akora ebintu binu alyomeera habwabyo.” 13 Kristo akatugura, twalekerwa kuruga omu mukyeno ogw’Ebiragiro, yafooka omukyeno omu kiikaro kyaitu habwokuba kikahandiikwa kiti: “Akyenerwe ogu weena ow’ahanikwa ha muti.” 14 Kinu kikaba kiti nukwo omugisa gwa Ibburahimu gusobole kwija hali amahanga kuraba omu Kristo Yesu, nukwo tusobole kutunga omwoyo ogu twaraganiziibwe kuraba omu kwikiriza kwaitu.
15 Ab’oruganda, kambaze ninkozesa ekyokurorraho ky’abantu: Ekiragaano* obu kimara kugumibwa, noobu kyakugumibwa omuntu omu wenka, busaho n’omu asobora kukisazaamu rundi kwongeramu ekintu kyona. 16 Emirago ekagambirwa Ibburahimu hamu n’oruzaaro rwe.* Ekyahandiikirwe kitagambe kiti, “na hali abaijukuru baawe,”* nikimanyisa baingi. Oihireho, kikagamba kiti, “na hali oruzaaro rwawe,”* ekirukumanyisa omu, kandi ogu nuwe Kristo. 17 Niinyongera ningamba nti: Ebiragiro ebyaizireho hanyuma y’emyaka 430, tibirukwija kusazaamu ekiragaano Ruhanga eki yakozere kara nukwo biiheho omurago. 18 Obugwetwa kakuba buba nibusigikirra ha biragiro, nibuba butakyasigikirra ha murago; baitu Ruhanga habw’embabazi ze, akabuha Ibburahimu kuraba omu murago.
19 Hati habwaki Ebiragiro byahairwe? Bikateekwaho kumanyisa ebibi, kuhikya akasumi oruzaaro orwahairwe* omurago obu rwakwizire; kandi bikaraba omu bamalaika byaheebwayo omu mukono gw’omuteeraniza.* 20 Tihabaho omuteeraniza obu habaho omuntu omu, baitu Ruhanga ali omu wenka. 21 Hati Ebiragiro nibihakaniza emirago ya Ruhanga? Nangwa! Kakuba ekiragiro ekirukuha obwomeezi kyali kihairwe, okuhikirra kwakubaire nikuraba omu biragiro. 22 Baitu Ebyahandiikirwe bikahayo ebintu byona hansi y’obusobozi bw’ekibi, nukwo omurago oguruga omu kwikiririza omuli Yesu Kristo gusobole kuheebwa abo abooleka okwikiriza.
23 Baitu okwikiriza obu kukaba kutakaizire, twalindirwaga hansi y’ebiragiro, tuli hansi y’obusobozi bwabyo, obu nitulindirra okwikiriza okukaba kuli haihi kusuukururwa. 24 Nahabweki, Ebiragiro bikafooka mulinzi waitu arukutwebembera kutuhikya hali Kristo, nukwo tusobole kwetwa ab’okuhikirra kuraba omu kwikiriza. 25 Baitu hati nkooku okwikiriza kwizire, titukyali hansi y’omulinzi.
26 Amananu gali, inywena muli baana ba Ruhanga, habw’okwikiriza kwanyu omu Kristo Yesu. 27 Habwokuba inywena ababatiziibwe omu Kristo, mujwaire Kristo. 28 Tiharoho Muyudaaya* noobu yaakuba Omuyonaani, tiharoho omwiru noobu yaakuba ow’aine obugabe, tiharoho omusaija noobu yaakuba omukazi, habwokuba inywena muli muntu omu, omu Kristo Yesu. 29 Ekindi, obu muraaba muli ba Kristo, mali muli ruzaaro rwa* Ibburahimu, abagwetwa kusigikirra ha murago.