Ebbaruha ya Paulo Hali Abarooma
12 Nahabweki, nimbeesengereza habw’embabazi za Ruhanga, kuhayo emibiri yanyu nk’ekihongwa ekyomeezi, ekirukwera kandi ekirukusiimwa Ruhanga, n’okukozesa obusobozi bwanyu obw’okwetegereza kuhikiiriza obuheereza oburukwera. 2 Muleke kutwalirizibwa* enteekaniza ey’ebintu* enu, baitu muhindurwe kuraba omu kuhindura enteekereza yanyu, nukwo musobole kugumya ekirungi, ekirukwikirizibwa hamu n’ekihikiriire Ruhanga eki agonza.
3 Kuraba omu mbabazi za Ruhanga enyingi muno, ningambira buli omu weena omuli inywe, kuteeteekerezaaho ekihinguraine kukira nkooku kisemeriire, baitu abe n’enteekereza ey’ehikire, kusigikirra ha kwikiriza Ruhanga oku ahaire* buli omu. 4 Nkooku omubiri gwaitu gwine ebicweka bingi, baitu ebicweka ebi tibikora omulimo gumu, 5 nikyo kimu na itwe, noobu turaaba tuli mubiri gumu oguteeraniziibwe omu Kristo, buli omu hali itwe ali kicweka ekiteeraniziibwe ha kitaahi kyakyo. 6 Nahabweki, nkooku twine ebisembo ebirukwahukana kusigikirra ha mbabazi za Ruhanga enyingi muno ezi tuhairwe, obu turaaba twahairwe ekisembo ky’obunabbi, leka turange obunabbi kusigikirra ha kwikiriza kwaitu; 7 obu kiraaba kiri ky’obuheereza, hikiiriza obuheereza obu; rundi ogu ow’aine ekisembo ky’okwegesa, leka ayegese; 8 ogu arukugarramu* abandi amaani, leka agabagarremu,* ogu anyakugaba,* leka agabe* n’omutima gumu; ogu arukwebembera, leka akikole n’obwekambi; kandi ogu arukwoleka embabazi, leka akikole asemeriirwe.
9 Okugonza kwanyu kutaba okw’obugobya. Munobere kimu ekibi; mugumire ha kirungi. 10 Mugonzanganege muno nk’ab’oruganda oku bagonzangana. Omu kutamungana ekitiinisa, niinywe mubanzege.* 11 Mwekambege,* mutaba bagara. Leka omwoyo gubaleetere kuba beekambi. Muheereze Yahwe* nk’abairu. 12 Musemerererwe omu kunihira, mugumiisirize omu bizibu. Mwikale nimusaba mutarukuleka. 13 Mubagane n’abarukukwera kusigikirra ha byetaago byabo. Mwolekege amakune.* 14 Mwikale nimusabira omugisa abo abarukubahiiganiza; mubasabire omugisa kandi mutabakyena.* 15 Musemererwe hamu n’abo abasemeriirwe, murre hamu n’abo abarukurra. 16 Mufeeho abandi nkooku na inywe mwefaaho. Mutaba bantu ab’emyehembo omu kuteekereza kwanyu, baitu mube n’enteekereza ey’obwebundaazi. Muteetwara kuba ab’amagezi.
17 Mutalihoora enzigu hali abo ababakora kubi. Muteekerezeeho ebintu abantu boona ebi batwara* kuba birungi. 18 Obu kiraaba nikisoboka hali inywe, mukole kyona eki murukusobora kwikara omu businge n’abantu boona. 19 Abagonzebwa, mutahoora enzigu, baitu muleke Ruhanga nuwe ayoleke ekiniga kye;* habwokuba kikahandiikwa kiti: “‘Okuhoora enzigu kwange; Nyowe ndisasura,’ agambire Yahwe.”* 20 Baitu “omunyanzigwa waawe obu araaba naarumwa enjara, muhe ebyokulya; obu araaba aine iroho, muhe ekyokunywa; habwokuba obu okora oti, oba noomutuumaho amakara* g’omurro ha mutwe gwe.”* 21 Otaikiriza ebintu ebibi kukusingura, baitu ikara noosingura ebibi obu nookora ebirungi.