Ebbaruha ya Paulo Hali Abafiripi
4 Nahabweki, ab’oruganda bagenzi bange aba ndukugonza kandi aba ndukugonza kurora, okusemererwa kwange kandi ekondo yange, abagonzebwa bange, mwemerre mugumire omu muhanda gunu omu Mukama.*
2 Ninteererra Ewodiya na Suntuke kuba n’enteekereza emu omu Mukama.* 3 Na iwe nk’omukozi mutaahi wange ow’amananu ninkusaba kwikara nookoonyera abakazi banu abeekambire muno* kukorra hamu na nyowe kurangirra amakuru amarungi hamu na Kerementi, otwaliiremu n’abakozi bataahi bange abandi boona amabara gaabo aganyakuli omu kitabu ky’obwomeezi.
4 Musemererwege omu Mukama.* Niinyongera ningamba nti: Musemererwe! 5 Okwetegereza kwanyu kumanywe abantu boona. Mukama* ali haihi. 6 Muteetuntura* habw’ekintu kyona, baitu omu bintu byona kuraba omu kusaba n’okwesengereza hamu n’okusiima, mumanyise Ruhanga ebi murukwetaaga; 7 kandi obusinge obwa Ruhanga oburukukirra kimu okwetegereza kwona, bulirinda emitima yanyu n’ebiteekerezo byanyu kuraba omu Kristo Yesu.
8 Eky’okumalirra ab’oruganda, ebintu byona eby’amananu, ebintu byona ebikuru, ebintu byona eby’okuhikirra, ebintu byona ebirukwera, ebintu byona ebirukugonzebwa, ebintu byona ebirukubazibwaho kurungi, ebintu byona ebirungi, ebintu byona ebisemeriire kukugizibwa, nibyo mugumizeemu nimuteekerezaaho.* 9 Ebintu ebi mwayegere, mwaikiriza, mwahurra, kandi mwabirorra hali nyowe, mubikolege kandi Ruhanga ow’obusinge aliba na inywe.
10 Nsemeriirwe omu Mukama* ngu hati, mwongiire mwanteekerezaaho. Noobu kiraaba ngu mukaba nimunteekerezaaho, mutatunge omugisa ogw’okukyoleka. 11 Kinu tindukukibaza ngu habwokuba ndi omu bwetaago, habwokuba nyegere kumarwa omu nyikara yoona ei mba ndumu. 12 Mmanyire kubaho n’ebintu ebike kandi mmanyire n’okubaho n’ebintu bingi. Nyegere ensita ey’okuba n’okumarwa omu bintu byona n’omu nyikara zoona ka mbe nyigusire rundi nyine enjara, ka mbe nyine bingi rundi bike. 13 Habwokuba omu bintu byona nyine amaani kuraba omuli ogu ow’ampa amaani.
14 Baitu mukakora kurungi omu kunkoonyera omu mihito yange. 15 Amananu gali, inywe Abafiripi, mukimanyire ngu obu mwabandize kumanya amakuru amarungi obu nabarugireho omu Makedoni, busaho kitebe na kimu ekyakwataniize na nyowe omu kugaba n’omu kutunga, oihireho inywe inywenka; 16 habwokuba obu nkaba ndi omu Sesalonika, mukansindikira obukoonyezi hatali omurundi gumu baitu emirundi ebiri habw’ebyetaago byange. 17 Tindukuserra ekisembo, baitu ningonza ebyana ebiraayeyongera h’amagoba ganyu. 18 Baitu nyine byona ebi ndukwetaaga kandi omu bwingi. Tinyine eki ndukuburwaho hati nkooku natunga ebi mwantwekiire kuraba omu Epafurodito, ekirukuboya kurungi, ekihongwa ekirukwikirizibwa, ekirukusemeza muno Ruhanga. 19 Kandi Ruhanga wange naija kubaha omu bwijwire byona ebi murukwetaaga kusigikirra ha buguuda bwe omu kitiinisa kye kuraba omu Kristo Yesu. 20 Ruhanga waitu kandi Isiitwe aheebwe ekitiinisa ebiro n’ebiro. Amiina.
21 Mundamukize abarukwera boona abali omu bumu na Kristo Yesu. Ab’oruganda abali hamu na nyowe na bo babaramukize. 22 Abarukwera boona, kukira muno abali omu nju ya Kaisaali na bo babaramukize.
23 Embabazi enyingi muno* eza Mukama waitu Yesu Kristo zibe n’omwoyo ogu murukwoleka.