Nk’Oku Yahandiikirwe Luka
22 Obugenyi obw’Emigaati Etatumbisiibwe obwetwa Okuhingurwaho,* bukaba buli haihi kuhika. 2 Kandi bakuru ba banyakatagara* n’abahandiiki bakaba nibaserra omulingo omurungi nkooku baraamwita, habwokuba bakaba nibatiina abantu. 3 Nubwo Sitaani yataaha omuli Yuda, arukwetwa Isikalyota, na uwe ow’akaba ali omu ha Ikumi na Babiri, 4 yagenda yabaza n’abakuru ba banyakatagara n’abakuru b’abalinzi ba yekaru ha mulingo araamugobeza akamubahikyaho. 5 Eki kyabasemeza muno, baikiriza kumuha sente ez’efeeza. 6 Nubwo na uwe yaikiriza kandi yatandika kuserra omugisa nkooku araamugobeza hataroho ekitebe ky’abantu.
7 Ekiro eky’Emigaati Etatumbisiibwe kyahika, ekiro ekihongwa eky’Okuhingurwaho obu kyabaga kisemeriire kuheebwayo; 8 Yesu yatuma Petero na Yohaana, yabagambira ati: “Mugende muteekanize obugenyi obw’Okuhingurwaho tubulye.” 9 Baamukaguza bati: “Ni nkaha nambere orukugonza tugende tubuteekanize?” 10 Yagarukamu ati: “Dora! Obu muraataaha omu rubuga, nimwija kutangaana omusaija ahimbire ensoha y’amaizi. Mumuhondere, mutaahe omu nju ei araataahamu. 11 Kandi mugambire mukama w’enju egi muti: ‘Omwegesa atutumire tukugambire tuti: “Ekisiika ky’abagenyi kiri nkaha nambere ndaaliira Okuhingurwaho n’abeegeswa bange?”’ 12 Omusaija ogu naija kubooleka ekisiika ekikooto ekya haiguru ekirumu byona ebi turukwetaaga kukozesa. Nuho muteekanize” 13 Nubwo baagenda, baasanga byona ebi abagambiire nukwo biri, kandi baateekaniza Okuhingurwaho.
14 Obwire obu bwahikire, yaikarra ha meeza n’abakwenda be. 15 Yabagambira ati: “Nyikaire ningonza muno kuliira hamu na inywe Okuhingurwaho kunu ntakabonabonesiibwe; 16 habwokuba nimbagambira nti, tindyongera kulya Okuhingurwaho, kuhikya ebintu byona bihikiiriziibwe omu Bukama bwa Ruhanga.” 17 Yakwata ekikopo, yasiima, yagamba ati: “Mukwate mukirabyemu, buli omu akihe mugenzi we, 18 habwokuba nimbagambira nti, kuruga hati, tindyongera kunywa amaarwa kuruga omu mizabbibbu kuhikya Obukama bwa Ruhanga bwizire.”
19 Kandi yakwata omugaati, yasiima, yagucwamu, yagubaha naagamba ati: “Gunu nigukiikirra omubiri gwange, oguraaheebwayo habwanyu. Nukwo mukolege muti okunyijukaga.” 20 Yakwata ekikopo yakora ekintu nikyo kimu obu baamazire kulya ekiihuro ekya rwebagyo, yagamba ati: “Ekikopo kinu nikikiikirra ekiragaano* ekihyaka ekikozerwe habw’esagama yange eraaseeswa habwanyu.
21 “Baitu dora! omukono gw’ogu arukugenda kungobeza guli hamu na nyowe ha meeza. 22 Ky’amananu ngu Omwana w’omuntu naagenda nkooku kyamuteekaniriziibwe. Baitu noobu kiraaba nukwo kiri kiti, alikibona omuntu ogu araamugobeza!” 23 Baatandika kwekaguza bonka na bonka nooha omuli bo arukwija kumugobeza.
24 Hanyuma baatandika kuteezangana muno empaka ngu, nooha omuli bo arukuteekerezebwa kuba naakirayo obukuru. 25 Baitu Yesu yabagambira ati: “Abakama b’ensi balema abantu n’ikama, kandi n’abo abaineho abantu obusobozi beetwa Abakoonyezi. 26 Baitu inywe mutaliba muti. Baitu arukukirayo obukuru omuli inywe abe nk’arukukirayo obuto, n’ogu arukwebembera abandi abe nk’omuheereza wabo. 27 Nooha arukukirayo obukuru, ogu anyakwikaliire ha meeza rundi ogu arukuheereza? Tali nuwe ogu anyakwikaliire ha meeza? Baitu nyowe ndi hagati omuli inywe nk’omuheereza.
28 “Niinywe mungumiireeho omu kulengwa kwange; 29 kandi ninkora ekiragaano na inywe nkooku Isenyowe yakozere na nyowe ekiragaano eky’obukama, 30 nukwo muliire kandi munywere ha meeza yange omu Bukama bwange, kandi mwikarre ha bitebe mucwere omusango enganda 12 eza Isaleeri.
31 Simooni, Simooni, dora! Sitaani asabire inywena kubasegesa nk’engano. 32 Baitu nkusabiire nukwo okwikiriza kwawe kutahwaho, kandi iwe obu oligaruka, ogumye bagenzi baawe.” 33 Nubwo Petero yagambira Yesu ati: “Mukama wange, nyeteekaniize kugenda na iwe omu nkomo n’okufa hamu na iwe.” 34 Baitu Yesu yamugambira ati: “Petero, ninkugambira nti, kiro kinu enkoko etakakookere, noija kunyehakana emirundi esatu ngu tommanyire.”
35 Yayongera yabagambira ati: “Obu nabatumire mutaine ensaho ezahurwamu sente, n’ensaho ez’ebyokulya hamu n’enkaito, mukaburwa ekintu kyona?” Baamugarukamu ngu: “Nangwa.” 36 Hanyuma yabagambira ati: “Baitu hati, ogu anyakwine ensaho eyahurwamu sente agende nayo, n’ogu anyakwine ensaho y’okutwarramu ebyokulya agitwale, kandi n’ogu ataine mpirima atunde ekijwaro kye ekya haruguru agigule. 37 Habwokuba nimbagambira nti: ekyahandiikirwe ekirukugamba ngu: ‘Akabarwa n’enkozi z’ebibi’ kisemeriire kuhikiirizibwa omuli nyowe. Kandi ebi ebyampandiikirweho, biriyo nibihikirra.” 38 Nubwo baamugambira bati: “Mukama waitu, dora! hanu twine empirima ibiri.” Yabagambira ati: “Nizimara.”
39 Obu yarugireyo, yagenda ha Rusozi orw’Emizaituuni nkooku ekaba eri ngeso ye, kandi abeegeswa na bo baamuhondera. 40 Obu baahikireyo, yabagambira ati: “Mwikale nimusaba, nukwo mutagwa omu kwohebwa.” 41 Yabarugaho, yagenda haraho kake yateeza amaju yatandika kusaba, 42 naagamba ati: “Taata, obu oraaba noogonza, nyihaho ekikopo kinu. Baitu kitakorwa nkooku ndukugonza, baitu iwe nkooku orukugonza.” 43 Nubwo, malaika yamubonekera kuruga omu iguru, yamugarramu amaani. 44 Baitu habwokuba akaba ali omu busaasi obw’amaani muno, yayeyongera kusaba, kandi entuuyo yamurugamu yafooka nk’obutoonyezi bw’esagama obukooto oburukutoonya hansi. 45 Obu yamazire kusaba, yagenda hali abeegeswa be yasanga bagwijagiire, bajwahire habw’obujune. 46 Yabakaguza ati: “Habwaki mugwijagiire? Mwimuke kandi mwikale nimusaba, nukwo mutagwa omu kwohebwa.”
47 Obu akaba naakyabaza, dora! ekitebe ky’abantu baija beebembiirwe omusaija arukwetwa Yuda, omu ha Ikumi na Babiri, kandi yagenda hali Yesu kumunywegera. 48 Yesu yamukaguza ati: “Yuda, noogobeza Omwana w’omuntu nookunywegera?” 49 Abo abakaba bali na uwe obu baarozere ekikaba nikigenda kubaho, baamukaguza bati: “Mukama waitu, tubateme n’empirima?” 50 Omu hali bo yatemaho okutu okw’obulyo okw’omwiru wa nyakatagara omukuru,* yakucwaho. 51 Baitu Yesu yabagambira ati: “Mugarukire aho.” Nubwo yakwata ha kutu kw’omwiru ogu, yamukiza. 52 Hanyuma, Yesu yakaguza bakuru ba banyakatagara, abakuru b’abalinzi ba yekaru hamu n’abakuru b’abantu abakaba baizire kumukwata ati: “Mwizire kunkwata mwine empirima n’emiigo nk’abarukukwata omusuma? 53 Buli kiro obu naikaraga na inywe omu yekaru, mutankwate. Baitu enu niyo esaaha yanyu n’amaani g’omwirima kulema.”
54 Hanyuma baamukwata baamutwara, kandi baamuleeta omu nju ya nyakatagara omukuru; baitu Petero akaba naabahondera haraho. 55 Obu baahembere omurro hagati y’ezigati kandi baikarra hamu, Petero na uwe yaikarra na bo. 56 Baitu omuzaana obu yamurozere aikaliire haihi n’omurro, yamwetegereza kurungi, yagamba ati: “Omusaija onu na uwe abaire ali na Yesu.” 57 Baitu Petero yakyehakana naagamba ati: “Mukazi iwe, timmumanyire.” 58 Hanyuma y’obwire buke, omuntu ondi yamurora, yagamba ati: “Na iwe oli omu hali bo.” Baitu Petero yagamba ati: “Musaija iwe, tindi omu hali bo.” 59 Kandi obu haarabireho nk’esaaha emu, omusaija ondi yalemeraho muno naagamba ati: “Mananu kwo omusaija onu na uwe abaire ali na Yesu, habwokuba Munyagaliraaya.” 60 Baitu Petero yagamba ati: “Musaija iwe, ebi orukubaza timbimanyire.” Obu akaba naakyabaza, enkoko yakooka. 61 Nubwo Mukama waitu yahinduka yarora Petero omu maiso, kandi Petero yaijuka Mukama waitu ebi akaba amugambiire ati: “Enkoko etakakookere kiro kinu, noija kunyehakana emirundi esatu.” 62 Yaturuka aheeru kandi yarra muno.
63 Abasaija abakaba bakwasire Yesu, baatandika kumusekeereza nibamuteera; 64 kandi hanyuma y’okumusweka h’amaiso, baikara nibamukaguza bati: “Obu oraaba oli nabbi, tugambire nooha akutiire?” 65 Baamubazaaho n’ebintu ebindi bingi ebibi kandi ebirukujuma Ruhanga.
66 Obwire obu bwakiire, abakuru b’abantu, bakuru ba banyakatagara, n’abahandiiki baayesorooza hamu, baamutwara omu kyombeko eky’Orukurato Orukuru,* baamugambira bati: 67 “Obu oraaba oli Kristo, tugambire.” Baitu uwe yabagambira ati: “Noobu ndaabagambira, timurukwija kukiikiriza naakake. 68 Kandi kakuba mbakaguza, timurukwija kungarukamu. 69 Baitu kuruga hati, Omwana w’omuntu aliikarra ha mukono ogw’obulyo ogw’amaani ogwa Ruhanga.” 70 Nubwo boona baagamba ngu: “Hati noomanyisa ngu oli Mwana wa Ruhanga?” Yabagarukamu ati: “Niinywe inywenka mwakyegambira ngu ndi Mwana wa Ruhanga.” 71 Baagamba bati: “Hati nitukyayetaaga obwakaiso obundi? Habwokuba twakyehulirra itwenka kuruga omu kanwa ke.”