Ebbaruha ya Paulo eya Kabiri Hali Abakolinso

2 Ncwiremu kutongera kubasaaliza obu ndaija nambere muli. 2 Habwokuba obu ndaabasaaliza, nooha arandeetera okusemererwa, oihireho abo aba nasaaliize? 3 Nkabahandiikira ebintu ebi, nukwo obu ndiija ntasaalirwa habw’abo abasemeriire kundeetera kusemererwa, habwokuba ninkigumya ngu ekindeetera okusemererwa na inywe inywena kibaleetera okusemererwa nukwo kumu. 4 Habw’obujune bwingi n’okusaasa omu mutima, nkabahandiikira ndi omu kurra amaziga, hatali kubasaaliza, baitu kubamanyisa okugonza okw’amaani oku mbainiire.

5 Omuntu weena obu araaba aleesereho okusaaliza, tasaaliize nyowe nyenka, baitu na inywe inywena—kandi tinaakugondeze kubaza n’obukaali. 6 Okuhana okw’abantu abaingi okuhairwe omuntu nk’ogu nikumara; 7 hati musemeriire kumuganyira kandi mumuhuumuze nukwo aleke kwetuntura ekihinguraine habw’obusaasi. 8 Nahabweki, nimbateererra kumwoleka okugonza. 9 Egi niyo ensonga habwaki na nyowe nabahandiikiire, kukigumya obu muraaba muli bahulizi omu bintu byona. 10 Kakuba muganyira omuntu habw’ekintu kyona, na nyowe mmuganyira. Amananu gali, kyona eki naganyiire omuntu, (obu ndaaba nakimuganyiire) nkakikora habwanyu omu maiso ga Kristo, 11 nukwo tutasingurwa* Sitaani, habwokuba tumanyire emitego ye.*

12 Obu nahikire Terowa kurangirra amakuru amarungi agarukukwata hali Kristo, kandi orwigi rwankingulirwaho omu Mukama waitu, 13 omwoyo* gwange gutateekaane habwokuba ntasangeyo Tito ow’oruganda mugenzi wange. Nahabweki nkabaraga nagenda Makedoni.

14 Baitu Ruhanga asiimwe, ow’aikara naatwebembera omu rugendo orw’obusinguzi tuli hamu na Kristo kandi kuraba omuli itwe Ruhanga naararangya okuboya okw’okumumanya, buli hamu! 15 Habwokuba hali Ruhanga tuli okuboya okurungi okwa Kristo omuli abo abarukujunwa kandi n’omuli abo abarukuhwerekerra; 16 hali abo abarukuhwerekerra kiri kijunde eky’okufa ekirukuhikya omu kufa, hali abo abarukwomeera kuli kuboya okw’obwomeezi okurukuhikya omu bwomeezi. Nooha ahikire kukora ebintu ebi? 17 Niitwe, habwokuba titutunda ekigambo kya Ruhanga nkooku abantu baingi bakora, baitu obu tutebeza, tubaza amananu nk’abatumirwe Ruhanga, ego, omu maiso ga Ruhanga kandi tuli hamu na Kristo.