Ebbaruha ya Paulo Hali Abafiripi
1 Nyowe Paulo hamu na Timoseo, abairu ba Kristo Yesu, nimpandiikira abarukwera boona abali omu bumu na Kristo Yesu abali Firipi hamu n’abaroleerezi n’abaheereza:*
2 Embabazi enyingi muno* hamu n’obusinge kuruga hali Ruhanga Isiitwe hamu na Mukama waitu Yesu Kristo, bibe na inywe.
3 Nsiima Ruhanga wange butoosa obu mbaijuka 4 omu buli kwesengereza kwange kwona habwanyu inywena. Nyesengereza nyine okusemererwa, 5 habw’ebintu ebi mukozere* habw’amakuru amarungi, kurugira kimu ha kiro eky’okubanza kuhika n’akasumi kanu. 6 Habwokuba ninkigumiza kimu ngu ogu ayatandikire omulimo gunu omurungi omuli inywe, aligukora agumaliirize kuhikya ha kiro kya Mukama waitu Kristo Yesu. 7 Kihikire nyowe okubateekerezaaho nti inywena, habwokuba mundi ha mutima, inywe abarukubagana na nyowe omu mbabazi za Ruhanga enyingi muno, n’omu kubohwa kwange kandi n’omu kurwanirra amakuru amarungi, n’okugagumya kuraba omu kukozesa ebiragiro.
8 Ruhanga nuwe kaiso wange nkooku nyine ekihika eky’amaani eky’okuba hamu na inywe inywena, habwokuba mbainiire okugonza nka Kristo Yesu oku aine. 9 Kandi kinu nikyo nyikara ninsaba ngu okugonza kwanyu kwikale nikweyongera muno omu kumanya okuhikire, n’omu kwetegereza okwijwire; 10 musobole kumanya ebintu ebirukukirayo obukuru, nukwo mutaba n’eky’okujunaanwa kandi mutatabaijura abandi kuhikya ha kiro kya Kristo; 11 kandi musobole kwijura ebyana eby’okuhikirra, kuraba omuli Yesu Kristo, nukwo Ruhanga asobole kuheebwa ekitiinisa kandi akugizibwe.
12 Hati ab’oruganda, ningonza mukimanye ngu ebimpikireho, bireetiire amakuru amarungi kweyongera kuraranga, 13 habwokuba Abalinzi b’Omukama* hamu n’abantu abandi boona bakimanyire ngu nkateekwa omu nkomo habwa Kristo. 14 Hati, ab’oruganda abarukukira obwingi omu Mukama waitu, beeyongiire kuguma habw’okubohwa kwange, kandi nibooleka obumanzi bwingi omu kutebeza ekigambo kya Ruhanga batarukutiina.
15 Ky’amananu ngu abamu nibatebeza hali Kristo habw’ihali n’okugonza empaka, baitu abandi nibakikora habw’omutima omurungi. 16 Abo abarukukikora habw’omutima omurungi, nibatebeza hali Kristo habw’okugonza, habwokuba bakimanyire ngu nkakomwa nukwo ndwanirre amakuru amarungi; 17 baitu abarukukikora habw’okugonza kuhakaniza bataine ekigendererwa ekirungi, bakikora kunyongera obusaalizi omu kubohwa kwange. 18 Kiki ekirugiremu? Omu buli mulingo gwona, ka gube omu kwefoora rundi omu mananu, Kristo aliyo naarangirirwa, kandi ninsemererwa habwa kinu. Amananu gali, niinyija kwikara ninsemererwa, 19 habwokuba nkimanyire ngu kinu nikiija kurugamu okujunwa kwange kuraba omu kwesengereza kwanyu hamu n’obusagiki obw’omwoyo gwa Yesu Kristo. 20 Kinu nikihikaana n’ekihika ekingi eki nyine hamu n’okunihira kwange ngu tindukwija kuswara omu mulingo gwona, baitu habw’okutatiina kubaza, hati Kristo naija kunyumizibwa omu mubiri gwange nkooku kiikaire kiri, ka kibe kuraba omu bwomeezi, rundi kuraba omu kufa.
21 Baitu habwange, kakuba nyomeera, nyomeera habwa Kristo kandi kakuba nfa, gaba magoba. 22 Hati obu ndaaba ndi w’okweyongera kwomeera omu mubiri, kinu nikyo ekyana eky’omulimo gwange; baitu eki naakugondeze kucwamu, tinkimanyisize omuntu weena. 23 Nsobiirwe habw’ebintu binu bibiri, ningonza ndekerwe kandi mbe hamu na Kristo, kandi amananu gali, eki nikyo kirukukirayo oburungi. 24 Baitu nikinyetaagisa kwikara omu mubiri habwanyu. 25 Nahabweki, habwokuba eki ninkigumya, nkimanyire ngu niinyija kwikara ndi omu mubiri kandi ngumizeemu ndi hamu na inywe inywena habw’okukurakurana kwanyu n’okusemererwa kwanyu omu kwikiriza, 26 nukwo okusemererwa kwanyu omu Kristo Yesu kusobole kwijura kuseeseke* habwange, obu ndaayongera kuba na inywe.
27 Mwetwaze* omu mulingo omurungi ogusemeriire amakuru amarungi agarukukwata hali Kristo, nukwo obu ndaija kubarora rundi noobu ndaaba ntaizire, nsobole kuhurra ebirukubakwataho kandi mmanye ngu mwemeriire mugumire omu mwoyo gumu muli muntu omu,* nimwekamba kukwataniza hamu habw’okwikiriza okurukukwata h’amakuru amarungi, 28 kandi omu mulingo gwona mutarukutiinisirizibwa abo abarukubahakaniza. Ekintu kinu kyonyini, buli bwakaiso obw’okuhwerekerra kwabo, baitu hali inywe bwakaiso oburukugumya ngu nimwija kujunwa, kandi kinu nikiruga hali Ruhanga. 29 Habwokuba timuhairwe omugisa ogw’okwikiririza omuli Kristo gwonka, baitu n’okubonabona habwe. 30 Habwokuba nimuhikwaho emitalibaine niyo emu ei mwarozere nindabamu, kandi ei murukuhurra ngu ninkyarabamu na hati.