Ebbaruha ya Paulo eya Kabiri Hali Timoseo
1 Nyowe Paulo, omukwenda wa Kristo Yesu nkooku Ruhanga arukugonza, kusigikirra ha murago ogw’obwomeezi kuraba omu Kristo Yesu, 2 nimpandiikira Timoseo omwana wange omugonzebwa:
Embabazi enyingi muno,* okuganyira, hamu n’obusinge kuruga hali Ruhanga Isiitwe hamu na Kristo Yesu Mukama waitu, bibe na iwe.
3 Ninsiima muno Ruhanga ou mpeereza omu buheereza oburukwera nkooku baisenkurunyowe baakozere, kandi nyine omuntu ow’omunda omurungi, kandi nyikara ninkwijuka omu kwesengereza kwange nyamusana n’ekiro. 4 Obu nyijuka amaziga gaawe, mba n’ekihika eky’okukurora nukwo nsobole kwijura okusemererwa. 5 Ninyijuka okwikiriza kwawe okutarumu obugobya, okwabandize kuba omu nyokwenkuru Loisi hamu na nyoko Yunike, kandi ninkigumya ngu na iwe okwine.
6 Habw’ensonga enu, ninkwijukya ngu ekisembo kya Ruhanga eki watungire obu nakutaireho emikono, kiikaze nikyaka nk’omurro. 7 Habwokuba Ruhanga atatuhe omwoyo ogw’obutiini, baitu akatuha omwoyo ogw’amaani, ogw’okugonza hamu n’ogw’okwetegereza kurungi. 8 Nahabweki, otakwatwa ensoni habw’okuha obwakaiso oburukukwata hali Mukama waitu, n’oburukukwata hali nyowe ayatairwe omu nkomo habwe, baitu ikara oyeteekaniize kubonabona habw’amakuru amarungi, kuraba omu kwesiga amaani ga Ruhanga. 9 Akatujuna kandi yatweta kuba abarukwera hatali habw’ebikorwa byaitu, baitu habw’ekigendererwa kye hamu n’embabazi ze enyingi muno. Tukoolekwa embabazi zinu enyingi muno kuraba omu Kristo Yesu kurugira kimu omu busumi obwa kara, 10 baitu hati nizeeyolekera kimu kuraba omu kwolekwa kw’Omujuni waitu Kristo Yesu ayaihireho okufa, naatusobozesa kwetegereza omulingo tusobora kutunga obwomeezi n’okutajunda kuraba omu makuru amarungi, 11 aga nakomiirwe kuba omutebezi, omukwenda, kandi omwegesa.
12 Egi niyo ensonga habwaki nimbonabona habw’ebintu binu, baitu tindukukwatwa ensoni habwokuba mmanyire ogu ou naikiririizeemu, kandi ninkigumya ngu naasobora kulinda eki namwahwize kuhika ha kiro kiri. 13 Ikara ogumiire ha rulengo orw’ebigambo ebirungi* ebi wahuliire kuruga hali nyowe, n’okwikiriza hamu n’okugonza ebiruga omu kuba omu bumu na Kristo Yesu. 14 Ekintu kinu eky’omuhendo ekyakukwasiibwe, kirinde kurungi kuraba omu mwoyo ogurukwera, oguli omuli itwe.
15 Okimanyire ngu abantu boona ab’omu isaza lya Asiya bandugireho, otwaliiremu Fugero na Heremogene. 16 Mukama agirre embabazi ab’omuka ya Onesiforo, habwokuba yaikaraga nampuumuza, kandi atakwatwe ensoni habw’enjegere zange ez’enkomo. 17 Baitu obu akaba ali omu Rooma, akatamu muno amaani kunserra, kandi yanzoora. 18 Mukama Yahwe* amugirre embabazi ha kiro kiri. Kandi omanyire kurungi byona ebi yakozere omu Efeeso.