Ebbaruha ya Paulo Hali Tito
3 Ikara noobaijukya kworobera n’okuhuliiriza abalemi n’ab’obusobozi, kwikara beeteekaniize kukora omulimo gwona omurungi, 2 kutabazaaho kubi omuntu weena, kutaba bantu abarukukungana, baitu kuba abarukwetegereza, nibooleka obuculeezi hali abantu boona. 3 Habwokuba na itwe kara tukaba tuli badomadoma, tuli ntahurra, tuhabire, tuli bairu b’okwegomba n’okwesemeza okwa buli mulingo, nitukora ebintu ebibi, twine ihali, tuli binugwa kandi nitunobangana.
4 Baitu embabazi ez’Omujuni waitu Ruhanga hamu n’okugonza kwe hali abantu obu byayeyolekere 5 (baitu kinu atakikole kusigikirra ha bikorwa byaitu eby’okuhikirra ebi tukaba tukozere, baitu habw’embabazi ze), akatujuna kuraba omu kwogebwa okwatuleesere omu bwomeezi kandi twafoorwa bahyaka kuraba omu mwoyo ogurukwera. 6 Akatuseesaho omwoyo gunu omu bwingi kuraba omu Yesu Kristo Omujuni waitu, 7 nukwo hanyuma y’okwetwa ab’okuhikirra kuraba omu mbabazi enyingi muno ez’ogu, tusobole kuba bagwetwa ab’obwomeezi obutahwaho kusigikirra ha kunihira kwaitu.
8 Ebigambo binu by’okwesiga kandi ningonza oikale noobazaaho ebintu binu, nukwo abo abaikiriize Ruhanga basobole kwikaza ebiteekerezo byabo ha kwikara nibakora ebikorwa ebirungi. Ebintu binu birungi kandi nibigasira abantu.
9 Baitu oteetaahya omu kuteera empaka ez’obudomadoma n’ezirukukwata ha buzaale n’enkungani ezirukukwata ha Biragiro,* habwokuba tibirukugasa kandi busamu kantu. 10 Omuntu arukukurakuraniza enyegesa ez’ebisuba, kakuba omuhabura* omurundi ogw’okubanza n’ogwa kabiri kandi akanga, omwetantale, 11 habw’okukimanya ngu omuntu ogu ahabire yaruga omu muhanda, aliyo naasiisa, kandi ayecweriire wenka omusango.
12 Obu ndaatuma Atema rundi Tukiko nambere oli, okole kyona eki orukusobora kwija nambere ndi omu Nikapoli, habwokuba nuho ninnihira kumara akasumi k’obutiti.* 13 Oteekanirize Zena ow’amanyire kurungi Ebiragiro hamu na Apolo ebi barukwetaaga, nukwo bataburwaho ekintu kyona habw’orugendo rwabo. 14 Baitu leka n’abantu baitu na bo beege kwikara nibakora ebikorwa ebirungi, basobole kukoonyera obu harukuba haroho obwetaago obwa bwangu, bataikara kwonka batarukwana ebyana.
15 Boona abali hamu na nyowe, nibakuramukya. Ondamukize abo abali omu kwikiriza, abarukutugonza.
Embabazi enyingi muno* zibe na inywe inywena.