Ebbaruha ya Paulo Hali Abakolosai

1 Nyowe Paulo omukwenda wa Kristo Yesu kuraba omu kugonza kwa Ruhanga, ndi hamu na Timoseo ow’oruganda mugenzi waitu, 2 nimpandiikira abarukwera hamu n’ab’oruganda abeesigwa abali omu bumu na Kristo ab’omu Kolosai:

Embabazi enyingi muno* hamu n’obusinge kuruga hali Isiitwe bibe na inywe.

3 Twikara nitusiima Ruhanga, Ise Mukama waitu Yesu Kristo, obu tuba nitubasabira, 4 habwokuba tukahurra okwikiriza kwanyu omu Kristo Yesu hamu n’okugonza oku mwiniire abarukwera boona 5 habw’okunihira okubaahuliirwe omu iguru. Okunihira kunu mukaba mukuhuliireho kuraba omu butumwa obw’amananu obw’amakuru amarungi 6 agaabahikireho. Nkooku amakuru amarungi galiyo nigaana ebyana kandi nigeeyongera omu nsi yoona, kandi n’omuli inywe nukwo gakozere gati, kurugira kimu ha kiro obu mwahuliire kandi mwamanya ebihikire ebirukukwata ha mbabazi za Ruhanga enyingi muno omu mananu. 7 Ebi nibyo mwayegere kuruga hali Epafura omwiru mutaahi waitu omugonzebwa, anyakuli omuheereza wa Kristo omwesigwa habwaitu. 8 Kandi atumanyisize okugonza kwanyu habw’obukoonyezi bw’omwoyo gwa Ruhanga.*

9 Egi niyo ensonga habwaki kurugira kimu obu twakihuliire, titukalekaga kubasabira kandi nitusaba ngu mwijule okumanya okuhikire okw’ebintu Ruhanga ebi agonza, omu magezi goona n’omu kwetegereza kurungi eby’omwoyo, 10 nukwo musobole kurubata nkooku kisemeriire omu maiso ga Yahwe,* nukwo mumusemeze omu bwijwire obu nimugumizaamu kwana ebyana omu mulimo gwona omurungi, mweyongere kutunga okumanya okuhikire okurukukwata hali Ruhanga; 11 kandi mugumibwe omu maani goona kusigikirra ha kitiinisa eky’obusobozi bwe nukwo musobole kugumira byona mwine okugumiisiriza n’okusemererwa, 12 obu nimusiima Isiitwe, ayabasobozeseze kubagana ha bugwetwa obw’abarukwera abali omu kyererezi.

13 Akatujuna kuruga omu busobozi obw’omwirima kandi yatutwara omu bukama obw’Omwana we ou agonza muno, 14 kandi omuli ogu tukalekerwa kuraba omu kicunguro, twaganyirwa ebibi byaitu. 15 Nuwe kisisani ekya Ruhanga atarorwa, omuzigaijo* omu byahangirwe byona; 16 habwokuba kuraba omuli uwe ebintu byona bikahangwa omu iguru n’omu nsi, ebintu ebirukurorwa n’ebitarukurorwa, ka bibe ebitebe by’obukama, rundi obulemi, rundi obusobozi. Ebintu ebindi byona bikahangwa kuraba omuli uwe kandi habwe. 17 Ekindi, nuwe yabandize ebintu ebindi byona kandi kuraba omuli uwe ebintu ebindi byona bikahangwa, 18 kandi nuwe mutwe ogw’omubiri, eki nikyo ekitebe. Nuwe ntandiko, kandi omuzigaijo kuruga omu bafu,* nukwo asobole kuba ow’okubanza omu bintu byona; 19 habwokuba Ruhanga kikamusemeza kuleka ebintu byona bibe omuli uwe omu bwijwire, 20 kandi ateeranize ebintu ebindi byona hali uwe kuraba omuli ogu, obu naaleetaho obusinge kuraba omu sagama eyaseeserwe ha muti,* ka bibe ebintu ebiri omu nsi rundi ebintu ebiri omu iguru.

21 Mali, kara mukaba mubaganiziibwe hali Ruhanga kandi muli banyanzigwa be habwokuba ebiteekerezo byanyu mwabiikazaaga ha bikorwa ebibi, 22 baitu hati muteeraniziibwe hamu na uwe kuraba omu mubiri gw’ogu n’okuraba omu kufa kwe, nukwo abaheyo muli abarukwera, mutaine kamogo koona kandi mutaine eki murukujunaanwa omu maiso ge— 23 baitu musemeriire kwikara omu kwikiriza, musigikire ha musingi kandi mutarukutengesebwa, mutarukuhabisibwa kuruga ha kunihira okw’amakuru amarungi ago aga mwahuliire kandi gaatebezebwa hali ebihangirwe byona ebiri hansi y’iguru. Habw’amakuru ganu amarungi, nyowe Paulo, nkafooka omuheereza.

24 Hati ninsemerererwa omu kubonabona kwange habwanyu, kandi nimbonabona nka Kristo baitu nabwo nyine kuraba omu kubonabona habw’omubiri gwa Kristo, kandi eki nikyo ekitebe. 25 Nkafooka muheereza w’ekitebe kinu kusigikirra ha bukeeto obwampairwe kuruga hali Ruhanga habwanyu kutebeza ekigambo kya Ruhanga omu bwijwire, 26 ensita erukwera* eyaserekerwe kurugira kimu omu myaka eya ira* n’okuruga omu businge obwa ira. Baitu hati esuukuliirwe abarukwera be, 27 Ruhanga abaasiimire kumanyisa omu mahanga eby’obuguuda eby’ekitiinisa eby’ensita egi, kandi ensita egi nuwe Kristo ali omu bumu na inywe, okunihira okw’ekitiinisa kye. 28 Ogu nuwe turukurangirra, nituteererra buli muntu weena kandi nitwegesa buli muntu weena omu magezi goona, nukwo tusobole kuleeta hali Ruhanga buli muntu weena ataine eki arukuburwaho omu bumu na Kristo. 29 Egi niyo ensonga habwaki ninkora n’amaani, ninyekamba muno habw’amaani ge agarukukorra omuli nyowe.