Nk’Oku Yahandiikirwe Yohana
21 Hanyuma y’ebi, Yesu yayongera yabonekera abeegeswa be ha nyanja eya Tibberiya. Gunu nugwo mulingo yababonekiiremu. 2 Simooni Petero, Tomasi (ayayetwaga Omurongo), Nasaneeri kuruga Kana eya Galiraaya, batabani ba Zebedaayo hamu n’abeegeswa abandi babiri bakaba bali hamu. 3 Simooni Petero yabagambira ati: “Ningenda kusoha.” Na bo baamugambira bati: “Nitugenda na iwe.” Baagenda baikarra omu lyato, baitu omu bwire bw’ekiro bwona batakwate kantu koona.
4 Baitu obwire obu bukaba buliyo nibukya, Yesu yayemerra ha musa gw’enyanja baitu abeegeswa be bateetegereze ngu nuwe. 5 Nubwo Yesu yabagambira ati: “Baana bange, mwine ekyokulya kyona?”* Baamugarukamu bati: “Nangwa!” 6 Yabagambira ati: “Munage ekitimba harubaju rw’obulyo orw’eryato kandi nimwija kukwata.” Nahabweki baakinagamu baitu batasobole kukisikamu habwokuba kikaba kiijwire encu nyingi. 7 Hanyuma omwegeswa Yesu ou yagonzaaga muno, yagambira Petero ati: “Ni Mukama waitu!” Simooni Petero obu yahuliire ngu ni Mukama waitu, yajwara* ekijwaro kye ekya haruguru, habwokuba akaba ali busa,* yayesimba omu nyanja. 8 Baitu abeegeswa abandi baizira omu kaato akataito, nibasika ekitimba ekiijwire encu habwokuba bakaba batali hara n’omusa gw’enyanja, nka fuuti 300.*
9 Obu baahikire ha musa gw’enyanja, baarora amakara agarukwaka gatalikirweho encu n’omugaati. 10 Yesu yabagambira ati: “Muleete zimu ha ncu ezi mwaruga kukwata.” 11 Nubwo Simooni yatemba eryato, yasika ekitimba, yakireeta ha musa gw’enyanja kiijwire encu 153 enkooto. Noobu kiraaba ngu zikaba ziri nyingi muno, ekitimba kitataaguke. 12 Yesu yabagambira ati: “Mwije mulye ekya nyenkyakara.” Baitu busaho n’omu h’abeegeswa be ow’akaba aine obumanzi obw’okumukaguza ati: “Niiwe oha?” habwokuba bakaba bakimanyire ngu ni Mukama waitu. 13 Yesu yaija yakwata omugaati, yagubaha kandi yabaha n’encu. 14 Gunu gukaba murundi gwa kasatu Yesu naabonekera abeegeswa be, hanyuma y’okuhumbuurwa kuruga omu bafu.
15 Obu baamazire ekya nyenkyakara, Yesu yagambira Simooni Petero ati: “Simooni mutabani wa Yohaana, nongonza muno kukira binu?” Yamugarukamu ati: “Ego Mukama wange, okimanyire ngu ninkugonza.” Yesu yamugambira ati: “Liisa entaama zange.” 16 Yayongera yamukaguza omurundi ogwa kabiri ati: “Simooni mutabani wa Yohaana, nongonza?” Yamugarukamu ati: “Ego Mukama wange, okimanyire ngu ninkugonza.” Yesu yamugambira ati: “Liisa entaama zange.” 17 Yayongera yamugambira omurundi ogwa kasatu ati: “Simooni mutabani wa Yohaana, nongonza?” Petero yayetuntura habwokuba akamukaguza omurundi ogwa kasatu ati: “Nongonza?” Nahabweki yamugambira ati: “Mukama wange, omanyire ebintu byona; kandi okimanyire ngu ninkugonza.” Yesu yamugambira ati: “Liisa entaama zange. 18 Mananu kwo ninkugambira nti, obu okaba okyali muto, wayejwekaga noogenda nambere orukugonza. Baitu obu oligurusa, oligorra emikono yaawe omuntu ondi akujweke kandi akuhimbe akutwale nambere otarukugonza.” 19 Akabaza eki kwoleka omulingo Petero yaakufiiremu, kunyumiza Ruhanga. Hanyuma y’okubaza eki, yagambira Petero ati: “Gumizaamu nompondera.”
20 Petero yahinduka enyuma yarora omwegeswa Yesu ou yagonzaaga muno abahondiire, ayaigamiire ekifuba kye ha kiihuro ekya rwebagyo, yagamba ati: “Mukama waitu, nooha arukwija kukugobeza?” 21 Petero obu yamurozere, yakaguza Yesu ati: “Mukama waitu, kandi omusaija onu?” 22 Yesu yamugarukamu ati: “Obu ndaaba ningonza aikaleho kuhikya obu ndigaruka, iwe kyakukwatiraho nkaha? Gumizaamu nompondera.” 23 Nahabweki ebigambo binu byararanga omu bagenzi baabo ngu omwegeswa onu talifa. Baitu Yesu atagambe ngu tarukwija kufa baitu akagamba ati: “Obu ndaaba ningonza aikaleho kuhikya obu ndigaruka, iwe kyakukwatiraho nkaha?”
24 Onu nuwe omwegeswa ayahaire obwakaiso oburukukwata ha bintu binu, kandi nuwe yahandiikire ebintu binu kandi tukimanyire ngu obwakaiso bwe bw’amananu.
25 Amananu gali, haroho ebintu ebindi bingi Yesu ebi yakozere, kakuba byona byahandiikirwe omu bwijwire, ninteekereza ensi tiyakusoboire kwijuramu emizingo eyaakuhandiikirwe.