Ebbaruha ya Paulo eya Kabiri Hali Abakolinso
3 Tutandikire kwongera kubagambira niitwe baha? Rundi nk’abantu abandi, nitwetaaga ebbaruha ezirukutubazaaho kuruga hali itwe rundi hali inywe? 2 Inywe inywenka, niinywe bbaruha yaitu, eyahandiikirwe ha mitima yaitu, emanyirwe kandi neesomwa abantu boona. 3 Habwokuba mwolekwa nk’ebbaruha ya Kristo eyahandiikirwe itwe nk’abaheereza, tehandiikirwe na bwino baitu ehandiikirwe n’omwoyo gwa Ruhanga omwomeezi, hatali ha bibbali eby’amabaale, baitu ha bibbali by’omubiri, ha mitima.
4 Kuraba omuli Kristo, twine obwesige nka bunu hali Ruhanga. 5 Titurukugamba ngu itwe habwaitu tusoboire kuhikiiriza ebisemeriire, kukora omulimo gunu, baitu ow’atusobozesa kuhikiiriza ebisemeriire ni Ruhanga, 6 ayatuhaire ebisemeriire kuba baheereza b’ekiragaano* ekihyaka, hatali omu biragiro ebihandiikirwe, baitu habw’omwoyo; habwokuba ebiragiro ebihandiikirwe bicwera omuntu omusango ogw’okufa, baitu omwoyo guha omuntu obwomeezi.
7 Obu kiraaba ngu ebiragiro ebireetaho okufa kandi ebihandiikirwe omu nyuguta h’amabaale bikaija n’ekitiinisa nk’eki, nukwo abaana ba Isaleeri tibaasobora kurora h’amaiso ga Musa habw’ekitiinisa ekikaba kiri h’amaiso ge, kandi ekikaba nikigenda kuhwaho, 8 obuheereza obw’omwoyo tibulikiraho muno kuba bw’ekitiinisa? 9 Obu kiraaba ngu ebiragiro ebireetera omuntu kusingwa omusango bikaba by’ekitiinisa, obuheereza obw’okuhikirra bulikiraho kuba bw’ekitiinisa! 10 Amananu gali, n’eki ekikaba kiri ky’ekitiinisa kiihirweho ekitiinisa habw’ekitiinisa ekirukukikira. 11 Obu kiraaba ngu eki ekikaba kiri ky’okwihwaho kikaleetwa omu kitiinisa, eki ekikaba kiri ky’okwikaraho kyakubaire n’ekitiinisa ekirukukiraho!
12 Habwokuba twine okunihira nk’oku, nitubaliza kimu tutarukutiina, 13 kandi titurukukora nka Musa oku yakoraga obu yaswekaga amaiso ge n’ekitambaara nukwo abaana ba Isaleeri batarora empero y’eki ekikaba nikigenda kwihwaho. 14 Baitu bakaba batakyayetegereza kurungi. Kuhikya na hati, ekitambaara nikyo kimu, kikyaswekeriire ebiteekerezo byabo kandi ekiragaano ekya ira obu kiba nikisomwa, tibasobora kukyetegereza habwokuba kiihwaho kuraba omuli Kristo. 15 Amananu gali, n’okuhikya kasumi kanu ebitabu bya Musa obu bisomwa, ekitambaara kiba kiri ha mitima yabo. 16 Baitu omuntu obu agaruka hali Yahwe,* ekitambaara kimwihwaho. 17 Yahwe* Mwoyo, kandi nambere omwoyo gwa Yahwe* guba, habaho obugabe. 18 Kandi itwe itwena, abataswekerwe h’amaiso twoleka ekitiinisa kya Yahwe* nk’endolerwamu, kandi tuhindurwa omu kisisani nikyo kimu kuruga omu kitiinisa ekimu kugenda omu kitiinisa ekindi,* omu mulingo gwonyini Yahwe* anyakuli Omwoyo nkooku akora.*