Ebikorwa by’Abakwenda
6 Omu biro ebi, abeegeswa obu bakaba nibeeyongera kukanya, Abayudaaya abaabazaaga Oruyonaani bakatandika kuhyema habw’Abayudaaya abaabazaaga Oruhebburaniya, habwokuba abafaakati baabo tibaheebwaga ebyokulya ebyagabibwaga buli kiro. 2 Nubwo abakwenda Ikumi na Babiri baasorooza ekitebe ky’abeegeswa abandi, baabagambira bati: “Tikihikire* itwe kuleka ekigambo kya Ruhanga, tukagaba ebyokulya. 3 Nahabweki, ab’oruganda, mukomemu omuli inywe abasaija musanju abarukwesigwa,* abaijwire omwoyo n’amagezi, nukwo tusobole kubakwasa obujunaanizibwa bunu obukuru, 4 baitu itwe nitwija kuteeka omutima gwaitu ha kusaba n’okwekambira obuheereza obw’okutebeza ekigambo.” 5 Eki baagambire kikasemeza boona kandi baakoma Sitefano, omusaija ow’aijwire okwikiriza n’omwoyo ogurukwera, Firipo, Porokoro, Nikanoli, Timoni, Pamena, hamu na Nikora omuhinduki owa Antyokiya. 6 Baabaleeta hali abakwenda, hanyuma y’okusaba, baabateekaho emikono.
7 Ekigambo kya Ruhanga kyayeyongera kuraranga kandi omuhendo gw’abeegeswa gwaikara nigweyongera muno omu Yerusaalemu; kandi banyakatagara baingi baikiriza.
8 Sitefano ow’akaba naasiimwa Ruhanga kandi aijwire amaani, akaba naakora ebyamahano bingi n’obwokurorraho omu bantu. 9 Baitu abasaija abamu ab’ekitebe ekirukwetwa Isorrokaniro ery’Abasaija ab’Obugabe, n’Abakulene, n’Abaalekizanderiya, n’abamu kuruga Kirikiya, na Asiya, baija omu maiso baatandika kuhakana na Sitefano. 10 Baitu batasobole kumusingura habw’amagezi ge n’omwoyo ogurukwera ogwamukoonyeraga kubaza. 11 Baasoonasoona abasaija omu nsita, bagambe bati: “Tumuhuliire naagamba ebigambo eby’okujuma hali Musa na Ruhanga.” 12 Baimukiriza abantu, abakuru b’abantu, hamu n’abahandiiki, ahonaaho baamwizira baamukwata kifuba, baamutwara omu Rukurato Orukuru.* 13 Kandi baaleeta bakaiso ab’ebisuba, abaagambire bati: “Omusaija onu, naikara naabazaaho kubi ekiikaro kinu ekirukwera hamu n’Ebiragiro.* 14 Ekyokurorraho, tumuhuliire naagamba ngu Yesu Omunyanazaleesi naija kuseesa ekiikaro kinu kandi ahindule emigenzo Musa ei yaturagiire kuhondera.”
15 Kandi abo boona abakaba baikaliire omu Rukurato Orukuru, baamwikazaaho amaiso baarora ngu h’amaiso ge naasisana nka malaika.