Ebbaruha ya Paulo eya Kabiri Hali Abakolinso
4 Nahabweki, nkooku twine obuheereza bunu obwatuhairwe kuraba omu mbabazi ezatwolekerwe, titurukujwaha. 2 Baitu twecwireho ebirukuswaza, n’ebikorwa omu nsita, tutarukwetwaza nk’abagobya rundi kufurungura ekigambo kya Ruhanga; baitu kuraba omu kumanyisa amananu, tufookere ekyokurorraho ekirungi hali abantu boona omu maiso ga Ruhanga. 3 Amananu gali, amakuru amarungi aga turukurangirra obu garaaba gaswekeriirwe, gaswekeriirwe hali abo abarukuhwerekerra, 4 omuli bo, ruhanga ow’enteekaniza ey’ebintu* enu aswekeriire ebiteekerezo by’abatarukwikiriza, nukwo ekyererezi eky’amakuru amarungi ag’ekitiinisa agarukukwata hali Kristo, anyakuli kisisani kya Ruhanga kitabamulikira. 5 Habwokuba titutebeza ebirukutukwataho, baitu tutebeza ebirukukwata hali Yesu Kristo ngu nuwe Mukama waitu kandi itwe tuli bairu banyu habwa Yesu. 6 Habwokuba Ruhanga nuwe yagambire ati: “Leka ekyererezi kyakire omu mwirima,” kandi nuwe amulikiire emitima yaitu n’okumanya okw’ekitiinisa okurukukwata hali Ruhanga kuraba h’amaiso ga Kristo.
7 Baitu twine eky’obuguuda kinu omu bibindi eby’ibumba, nukwo amaani agarukukira ha ga buli kiro gabe ga Ruhanga hatali agaitu. 8 Tumigiriziibwe omu miringo yoona, baitu titufunziibwe; tusobiirwe, baitu twine ah’okwirukira; 9 nituhiiganizibwa, baitu titulekerweho; tunagirwe hansi, baitu tituhwerekereziibwe. 10 Butoosa nitugumiisiriza omu mibiri yaitu okubonabona okurugamu okufa okwahikire hali Yesu, nukwo obwomeezi bwa Yesu busobole kweyoleka omu mibiri yaitu. 11 Habwokuba itwe aboomeezi twikara tuli omu kabi k’okufa habwa Yesu, nukwo n’obwomeezi bwa Yesu busobole kweyoleka omu mibiri yaitu ey’erukufa. 12 Nahabweki, okufa nikukorra omuli itwe, baitu obwomeezi omuli inywe.
13 Habwokuba twine omwoyo nugwo gumu ogw’okwikiriza, okwahandiikirweho kuti: “Nkaikiriza, kandi nikyo mbaliza”; na itwe twikiriza kandi nikyo turukubaliza, 14 nitumanya ngu Ogu ayahumbwire Yesu, na itwe alituhumbuura tube hamu na Yesu, kandi alitutwara omu maiso ge, itwe hamu na inywe. 15 Habwokuba ebintu binu byona biroho habwanyu, nukwo embabazi enyingi muno zisobole kweyongera n’okukiraho habwokuba abandi baingi nibasiima Ruhanga kandi eki nikimuhaisa ekitiinisa.
16 Nahabweki, titurukujwaha, baitu noobu kiraaba ngu omubiri gwaitu ogwa haruguru niguhwaho, nitukigumiza kimu ngu eki, eki tuli omunda nikyeyongera kugarurwa buhyaka buli kiro. 17 Noobu kiraaba ngu emihito y’akacu* kake kandi terukulemeera, eturugirramu ekitiinisa ekirukwikara nikyeyongera* kandi eky’ebiro n’ebiro; 18 obu tutarukwikaza amaiso gaitu ha bintu ebirukurorwa, baitu nitugaikaza ha bintu ebitarukurorwa. Habwokuba ebintu ebirukurorwa by’akacu kake, baitu ebintu ebitarukurorwa by’ebiro n’ebiro.