Ebbaruha ya Paulo ey’Okubanza Hali Abakolinso
11 Muunnyegereho, nkooku nyowe ndukwegera hali Kristo.
2 Nimbasiima habwokuba omu bintu byona nimunyijuka kandi mugumiire ha bintu byona ebi nabeegeseze nkooku nabibahaire. 3 Baitu ningonza mumanye kinu ngu, omutwe gw’omusaija weena nuwe Kristo; kandi omutwe gw’omukazi nuwe omusaija; kandi omutwe gwa Kristo nuwe Ruhanga. 4 Omusaija weena ow’asaba rundi akaranga obunabbi aswekeriire omutwe gwe, aswaza omutwe gwe; 5 baitu omukazi weena ow’asaba rundi akaranga obunabbi ataswekeriire omutwe gwe, aguswaza, habwokuba aba naasisana nk’omukazi ow’amwire isoke. 6 Habwokuba omukazi kakuba ataswekerra omutwe gwe, asemeriire kusara isoke rye; baitu obu kiraaba nikimuswaza kusara isoke rye rundi kulimwa, asemeriire kweswekerra omutwe.
7 Omusaija tasemeriire kuswekerra omutwe gwe habwokuba ali kisisani kya Ruhanga kandi kitiinisa kye, baitu omukazi ali kitiinisa ky’omusaija. 8 Habwokuba omusaija ataruge omu mukazi baitu omukazi nuwe yarugire omu musaija. 9 Kandi omusaija atahangirwe omukazi, baitu omukazi akahangirwa omusaija. 10 Egi niyo ensonga habwaki omukazi asemeriire kujwara ha mutwe gwe akokurorraho akarukwoleka ngu naayorobera obusobozi habwa bamalaika.
11 Oihireho eki, obukirukuhika omu Mukama waitu, omukazi tabaho nambere omusaija atali, kandi n’omusaija tabaho nambere omukazi atali. 12 Nkooku omukazi yarugire omu musaija, n’omusaija na uwe azaarwa kuraba omu mukazi; baitu ebintu byona biruga hali Ruhanga. 13 Mwecweremu inywenka: Kihikire omukazi kusaba hali Ruhanga ataswekeriire omutwe gwe? 14 Obuhangwa nabwo tibwegesa ngu omusaija kukuza isoke eriraihire kimuswaza, 15 baitu omukazi obu aba n’isoke eriraihire kiba kitiinisa hali uwe? Habwokuba isoke rye limuhairwe omu kiikaro ky’eky’okweswekerra ha mutwe. 16 Baitu omuntu weena obu araaba naagonza kuhakana, habw’okugonza kukora ebintu omu mulingo ogundi, titwine omulingo ogundi noobu byakuba ebitebe bya Ruhanga.
17 Omu kubaha oburagirizi bunu, tindukubasiima habwokuba obu musorrokana, timusorrokana habw’oburungi, baitu habw’obubi. 18 Eky’okubanza, nimpurra ngu obu musorrokana hamu omu kitebe, habamu okwebaganizaamu omuli inywe kandi eki na nyowe ninsobora kukiikiriza. 19 Mananu kwo omuli inywe nimwija kwecwamu obutebe, nukwo abo abarukusiimwa Ruhanga basobole kumanywa.
20 Obu mwesorooleza omu kiikaro kimu, mali muba mutaizire kulya Ekiihuro kya Mukama Waitu Ekya Rwebagyo.* 21 Habwokuba obu mwija kukirya, buli omu aba amazire ira kulya ekiihuro kye ekya rwebagyo, nukwo omu aba naarumwa enjara kandi ondi aba amazire ira kutamiira. 22 Timwine amaju nambere musobora kuliira n’okunywera? Rundi nimugaya ekitebe kya Ruhanga kandi nimuleetera abo abataine akantu kuswara? Mbagambire ki? Mbasiime? Kinu tinsobora kukibasiimira.
23 Habwokuba ebi natungire kuruga hali Mukama waitu na nyowe nibyo nabahaire, ngu ha kiro Mukama waitu Yesu eki akaba naagenda kugobezebwa akakwata omugaati, 24 kandi hanyuma y’okusiima, yagucwamu kandi yagamba ati: “Gunu nigukiikirra omubiri gwange, oguraaheebwayo habwanyu. Nukwo mukolege muti okunyijukaga.” 25 Yakwata ekikopo yakora ekintu nikyo kimu obu baamazire kulya ekiihuro ekya rwebagyo, yagamba ati: “Ekikopo kinu nikikiikirra ekiragaano* ekihyaka ekikozerwe habw’esagama yange. Mwikale nimukora kinu, buli murundi muraakinywahoga, okwijuka nyowe.” 26 Habwokuba buli murundi mulya omugaati kandi mukanywa ha kikopo kinu, mwikara nimurangirra okufa kwa Mukama waitu, kuhikya obu aliija.
27 Nahabweki, weena anyakulya omugaati rundi akanywa ha kikopo kya Mukama waitu atasemeriire, alijunaanwa omusango gw’okusiisira omubiri n’esagama ya Mukama waitu. 28 Omuntu abanze ayekebere kurungi akigumye ngu asemeriire, obu nubwo alye omugaati kandi anywe ha kikopo. 29 Habwokuba ogu ow’alya kandi akanywa atabandize kwetegereza amakuru g’omubiri, ayeriira kandi ayenywera omusango. 30 Enu niyo ensonga habwaki baingi omuli inywe muli baceke, murwaire kandi baingi omuli inywe mugwijagiire omu kufa.* 31 Baitu obu turaayekebera tukamanya kiki kyonyini eki tuli, titurukwija kucwerwa omusango. 32 Baitu obu tucwerwa omusango, Yahwe* aba naatuhana, nukwo tutafubirwa hamu n’ensi. 33 Nahabweki ab’oruganda, obu muraayesoroozaaga hamu kulya Ekiihuro kya Mukama Waitu Ekya Rwebagyo, mulindanganege. 34 Obu haraaba haroho omuntu weena arukurumwa enjara, leka aliire omu ka ye nukwo obu muraayesooroza hamu mutacwerwa omusango. Baitu ensonga ezindi ezisigaire, ndizitereekereza obu ndiija nambere muli.