Nk’Oku Yahandiikirwe Yohana
4 Yesu obu yakimanyire nkooku Abafalisaayo bakaba bahuliire ngu akaba naafoora abantu abaingi abeegeswa kandi naabatiza baingi kukira Yohaana— 2 noobu kiraaba ngu Yesu akaba atarukubatiza baitu abeegeswa be nubo bakaba nibabatiza— 3 yaruga omu Buyudaaya, yagaruka Galiraaya. 4 Baitu kikamwetaagisa kuraba omu Samaliya. 5 Nubwo yaija omu rubuga rwa Samaliya orurukwetwa Sukara, haihi n’ekibanja Yakobbo eki yahaire mutabani we Yusufu. 6 Kandi oku, hakaba haliyo iziba lya Yakobbo. Yesu yaikarra ha iziba* habwokuba akaba ajwahire habw’orugendo. Zikaba ziri nka saaha mukaaga.*
7 Omukazi kuruga Samaliya* yaija kutaha amaizi. Yesu yamugambira ati: “Mpaho amaizi ag’okunywa.” 8 (Abeegeswa be bakaba bagenzere omu rubuga kugura ebyokulya.) 9 Omukazi Omusamaliya yamugambira ati: “Nikiija kita iwe Omuyudaaya kunsaba amaizi ag’okunywa kandi kunu nyowe ndi mukazi Omusamaliya?” (Habwokuba Abayudaaya tibakoragana n’Abasamaliya.) 10 Yesu yamugarukamu ati: “Kakuba obaire omanyire ekisembo kya Ruhanga ekya busa, hamu n’ogu arukukugambira ati: ‘Mpaho amaizi ag’okunywa,’ waakubaire omusabire kandi yaakukuhaire h’amaizi ag’obwomeezi.” 11 Omukazi yamugambira ati: “Waitu, toine ekyokutahisa kandi n’iziba lihamire. Hati, amaizi ag’obwomeezi, iwe noogaiha nkaha? 12 Iwe nookira isenkuruitwe Yakobbo, ayatuhaire iziba linu, kandi eri yanywahoga uwe n’abaana be, hamu n’ente ze?” 13 Yesu yamugarukamu ati: “Ogu weena anyakunywa amaizi ganu alyongera akwatwe iroho. 14 Baitu ogu weena ow’anywa amaizi aga ndaamuha, talyongera kukwatwa iroho, baitu nigaija kufooka omuli uwe ensoro ey’amaizi agarukuha obwomeezi obutahwaho.” 15 Omukazi yamugambira ati: “Waitu, mpa amaizi ago, nukwo ntalyongera kukwatwa iroho, kandi ndeke kwikara niinyija omu kiikaro kinu kutaha amaizi.”
16 Yesu yamugambira ati: “Genda oyete baro kandi mwije hanu.” 17 Omukazi yagarukamu ati: “Tinyine iba nyowe.” Yesu yamugambira ati: “Ohikire kugamba ngu: ‘Tinyine iba nyowe.’ 18 Waakaswerwa abasaija bataano, kandi n’omusaija ow’oine hati tali baro. Eki obalize, mananu.” 19 Omukazi yamugambira ati: “Nindora oli nabbi. 20 Baisenkuruitwe baaramizaaga ha rusozi runu, baitu inywe mugamba ngu Yerusaalemu nikyo ekiikaro nambere abantu basemeriire kuramiza.” 21 Yesu yamugambira ati: “Mukazi iwe, ikiriza eki ndukukugambira, akasumi nikaija obu mutaliramiza Isiitwe ha rusozi runu rundi omu Yerusaalemu. 22 Inywe nimuramya eki mutarukumanya; baitu itwe nituramya eki turukumanya, habwokuba okujunwa nikutandikira hali Abayudaaya. 23 Baitu akasumi nikaija kandi nuko kanu, abarukuramya omu mananu obu baliramya Isiitwe omu mwoyo n’amananu. Mali, Isiitwe naaserra abantu abali nk’abo kumuramya. 24 Ruhanga mwoyo, kandi n’abo abamuramya basemeriire kumuramya omu mwoyo n’amananu.” 25 Omukazi yamugambira ati: “Nkimanyire Masiya naija, arukwetwa Kristo. Ogu obu aliija, alitugambira buli kimu kyona.” 26 Yesu yamugambira ati: “Niinyowe ogu, arukubaza na iwe.”
27 Omu bwire obu abeegeswa be baija, kandi baahunirra habwokuba akaba naabaza n’omukazi. Baitu busaho n’omu ayamukagwize ati: “Nooserra ki hanu?” rundi ngu: “Habwaki noobaza n’omukazi?” 28 Omukazi yasigaho ensoha ye ey’amaizi, yagenda omu rubuga, yagambira abantu ati: 29 “Mwije murole omusaija ow’angambiire ebintu byona ebi nakozere. Onu ka naasobora kuba nuwe Kristo?” 30 Abantu baaruga omu rubuga baija hali Yesu.
31 Omu kasumi ako, abeegeswa be bakaba nibamwesengereza bati: “Rabbi, lya.” 32 Baitu yabagambira ati: “Nyine ebyokulya inywe ebi mutarukumanya.” 33 Abeegeswa baagambirangana bati: “Haroho omuntu weena ow’amuleetiire ekyokulya?” 34 Yesu yabagambira ati: “Ebyokulya byange nukwo kukora Ogu ayantumire ebi agonza n’okumalirra omulimo gwe. 35 Timurukugamba ngu, nihaburayo emyezi ena akasumi ak’okugesa kahike? Dora! Nimbagambira nti: Mwimukye amaiso murole emisiri, nkooku ehikire kugesa. 36 Omugesi hati naatunga empeera ye kandi naasorooza ebijuma eby’obwomeezi obutahwaho, nukwo omusigi n’omugesi basobole kusemererwa hamu. 37 Habw’ensonga enu, ebigambo binu by’amananu: Omu musigi, kandi ondi mugesi. 38 Nkabatuma kugesa ebi mutaratalibaniire. Abandi nubo barukutalibana, baitu nimugasirwa omu kutalibana kwabo.”
39 Abasamaliya baingi kuruga omu rubuga oru bakamwikiririzaamu habw’ebigambo by’omukazi ayamuheeriire obwakaiso, naagamba ati: “Angambiire ebintu byona ebi nakozere.” 40 Nahabweki Abasamaliya obu baizire nambere ali, baamusaba aikale na bo, kandi yaikara na bo kumara ebiro bibiri. 41 Ekyarugiremu, abandi baingi baamwikiririzaamu habw’ebi yabalize, 42 kandi baagambira omukazi bati: “Titurukwikiriza habw’ebintu otugambiire; habwokuba na itwe tubyehuliriire itwenka kandi nitukimanya ngu omusaija onu mali mujuni w’ensi.”
43 Hanyuma y’ebiro bibiri, yarugayo oku yagenda Galiraaya. 44 Baitu Yesu weenyini akakigamba ngu, nabbi taheebwa ekitiinisa omu kicweka ky’owabu. 45 Obu yahikire Galiraaya, Abanyagaliraaya baamutangirra habwokuba bakaba barozere ebintu byona ebi akaba akozere omu Yerusaalemu, habwokuba na bo ha bugenyi bakaba baliyo.
46 Yayongera yaija omu Kana ey’omu Galiraaya nambere akaba ahindwire amaizi yagafoora amaarwa. Hakaba haliyo omunyoro w’omukama ow’akaba aine omutabani arwaire omu Kaperenaumu. 47 Obu yahuliire ngu Yesu akaba arugire Buyudaaaya yaija Galiraaya, yagenda nambere ali yamusaba aije akize mutabani we, habwokuba akaba ali kubi, ali haihi kufa. 48 Baitu Yesu yamugambira ati: “Bantu inywe obu mutarora ebyamahano n’obwokurorraho, timusobora kwikiriza.” 49 Omunyoro w’omukama yamugambira ati: “Mukama wange, ija tugende omwana wange atakafiire.” 50 Yesu yamugambira ati: “Wegendere, omwana waawe akizire.” Omusaija yaikiriza ebigambo bya Yesu, kandi yagenda. 51 Baitu obu akaba ali omu muhanda naasirimuka, abairu be baija kumutangaana bamugambire nkooku omwojo akizire.* 52 Yabakaguza akizire saaha zingaha. Baamugarukamu bati: “Akizire omuswija, ijo saaha musanju.”* 53 Ise yakimanya ngu omu saaha egi yonyini Yesu nubwo amugambiirege ati: “Omwana waawe akizire.” Nubwo uwe n’ab’omu ka ye baikiriza. 54 Kinu nikyo kyamahano ekya kabiri Yesu eki yakozere obu yarugire Buyudaaya.