Ebbaruha ya Paulo eya Kabiri Hali Abakolinso
8 Ab’oruganda, hati nitugonza mumanye embabazi za Ruhanga enyingi muno ezayolekerwe omu bitebe bya Makedoni. 2 Omu kasumi ak’okulengesebwa okw’amaani n’okubonabona, bakooleka okusemererwa kwingi, n’omwoyo ogw’okugaba gukeeyongera* noobu kiraaba ngu bakaba bali banaku muno. 3 Eki ninkigumya ngu bakakikora kusigikirra ha busobozi bwabo, kandi kikahingura na ha busobozi bwabo, 4 habw’okugonza kwabo, bakaikara nibatwesengereza tubahe omugisa ogw’okugaba, nukwo beejumbire omu buheereza obw’okukoonyera abarukwera. 5 Kandi bakakora ekirukukira hali eki, eki tukaba nitunihira, baitu bakabanza kwehayo hali Mukama waitu hamu na hali itwe nkooku Ruhanga yagondeze. 6 Nahabweki, tukeekambisa Tito amalirize omulimo ogw’okusorooza ebisembo byanyu ebi mwahaireyo, nkooku nuwe yagutandikire omuli inywe. 7 Habw’okusaagaana omu buli kimu, okwikiriza kwanyu kugumire, mwine obusobozi obw’okubaza, mwijwire okumanya, nimwekamba muno omu buli kimu kyona eki mukora kandi mali nimugonza abandi nkooku tubagonza, nahabweki na inywe mugumizeemu nimugaba omu mulingo gunu.
8 Nimbaza kinu hatali kubaragira, baitu kubamanyisa obwekambi obw’abandi n’okumanya okugonza kwanyu obu kuraaba kuli kw’amananu. 9 Habwokuba mumanyire embabazi enyingi muno eza Mukama waitu Yesu Kristo, noobu kiraaba ngu akaba ali muguuda, akafooka munaku habwanyu, nukwo musobole kuba baguuda kuraba omu bunaku bwe.
10 Habw’ensonga enu, nimbagambira enteekereza yange nti: Kinu ky’okubagasira, habwokuba omwaka gumu enyuma, mutagarukire ha kutandika kukikora baitu mukooleka ngu nimugonza kukikora. 11 Nahabweki hati, mumaliirize eki mwatandikire kukora, habwokuba nkooku mukaba mwetegekere kukikora musemeriire kukimaliiriza nimukozesa ebi mwine. 12 Kakuba omuntu aba ayetegekere* kugira eki yahayo, nikiikirizibwa kusigikirra ha eki aine hatali eki ataine. 13 Habwokuba tindukugonza kukyanguhizaaho abandi baitu nkakigumanganiza hali inywe; 14 baitu habw’okwinganaingana, mukozese ebi mwine kandi mukozese ebirukuhingura hali ebi, ebi murukwetaaga kukoonyera abandi, nukwo ebi baine, ebirukuhingura ha bibarukwetaaga bikole ha byetaago byanyu, nukwo habeho okwinganaingana. 15 Nkooku kyahandiikirwe kiti: “Omuntu ow’aine bingi atabe na bingi muno, kandi n’ogu ow’aine bike atabe na bike muno.”
16 Ruhanga asiimwe habwokuba Tito abafiireho nkooku itwe tubafaaho, 17 habwokuba aine eki akozereho hanyuma y’okwekambisibwa, kandi habw’okugonza muno kwija oku, naija habwe wenka. 18 Baitu nitutuma hamu na uwe ow’oruganda ow’arukuhaisanizibwa omu bitebe byona habw’ebi arukukora habw’amakuru amarungi. 19 Hatali eki kyonka, akakomwa ebitebe kugendaga na itwe nitugaba ebisembo binu habw’okuhaisa Mukama waitu ekitiinisa kwoleka ngu tweteekaniize kukoonyera abandi. 20 Nahabweki, nitwerinda hatabaho muntu weena ayatujunaana habw’ebisembo binu ebi tuhairwe kugaba. 21 Habwokuba ‘nitwekamba kukora buli kimu kyona n’obwesigwa hatali omu maiso ga Yahwe* honka, baitu n’omu maiso g’abantu.’
22 Kandi hamu na bo, nitutuma ow’oruganda mugenzi waitu, ou tulengeseze emirundi nyingi kandi twakizoora ngu mwekambi muno omu nsonga nyingi, kandi hati mwekambi muno n’okukiraho, habw’obwesige obw’amaani obu abainemu. 23 Obu haraaba haroho ekikaguzo kyona ekirukukwata hali Tito, ogu mutaahi wange kandi mukozi ou ndukukora na uwe kubagasira; rundi obu haraaba haroho ebikaguzo ebirukukwata h’ab’oruganda bagenzi baitu, abo bakwenda b’ebitebe kandi kitiinisa kya Kristo. 24 Nahabweki, mubooleke ngu nimubagonza kandi mwoleke ebitebe habwaki tukaba nitubeesiimisa.