Nk’Oku Yahandiikirwe Yohana
15 “Niinyowe omuzabbibbu ogw’amananu, kandi Isenyowe nuwe omulimi. 2 Aihaho itaagi lyona eriri omuli nyowe eritarukwana ebijuma, kandi asemeza eryo erirukwana ebijuma, nukwo lyeyongere kwana ebijuma ebindi. 3 Inywe musemeziibwe habw’ekigambo eki mbagambiire. 4 Mwikale omu bumu na nyowe kandi na nyowe ndaikara na inywe omu bumu. Nkooku itaagi litasobora kwana ebijuma habwalyo lyonka rundi buli liikaire ha muzabbibbu, na inywe timusobora kwana rundi buli mwikaire omu bumu na nyowe. 5 Niinyowe muzabbibbu; inywe muli mataagi. Weena anyakwikara omu bumu na nyowe kandi na nyowe nkaikara omu bumu hamu na uwe, ogu ayana ebijuma bingi; habwokuba nambere ntali timusobora kwana ekijuma kyona. 6 Omuntu weena obu ataikara omu bumu na nyowe, anagwa hansi nk’itaagi kandi ayoma. Abantu basorooza hamu amataagi ago, baganaga omu murro kandi gahya. 7 Kakuba mwikara muli omu bumu na nyowe, kandi ebigambo byange bikaikara omuli inywe, musabe kyona eki murukugonza kandi kirikorwa. 8 Isenyowe anyumizibwa omuli kinu, obu mwikara nimwana ebijuma bingi kandi mukooleka ngu mali muli beegeswa bange. 9 Nkooku Isenyowe yangondeze, na nyowe nukwo mbagondeze; mwikale omu kugonza kwange. 10 Obu muraayorobera ebiragiro byange, nimwija kwikara omu kugonza kwange, nkooku nyorobera ebiragiro bya Isenyowe kandi nyikara omu kugonza kwe.
11 “Ebintu binu mbibagambiire, nukwo okusemererwa kwange kusobole kuba omuli inywe kandi okusemererwa kwanyu kusobole kwijura. 12 Kinu nikyo ekiragiro kyange, mugonzangane nkooku nyowe mbagondeze. 13 Busaho anyakwine okugonza okurukukira kunu, omuntu kuhayo obwomeezi bwe habw’abanywani be. 14 Muba banywani bange obu mukora ebi ndukubaragira. 15 Tinkyabeeta bairu, habwokuba omwiru tamanya mukama we eki arukukora. Mbeesere banywani bange habwokuba mbamanyisize ebintu byona ebi nahuliire kuruga hali Isenyowe. 16 Tali niinywe abaankomere, baitu niinyowe ayabakomere, kandi nkabakoma nukwo mugende mwikale nimwana ebijuma kandi ebijuma byanyu biikaleho, nukwo kyona eki muraasabaga Isenyowe omu ibara lyange, alikibaha.
17 “Nabaragira ebintu binu, nukwo musobole kugonzangana. 18 Kakuba ensi ebanoba, mukimanye ngu ekabanza kunnoba etakabanobere. 19 Kakuba mubaire kicweka ky’ensi, yakubagondeze nk’abaayo. Baitu habwokuba timuli kicweka ky’ensi, kandi mbakomere kuruga omu nsi, niyo ensonga habwaki ensi neebanoba. 20 Mwijuke ekigambo eki nabagambiire ngu: Omwiru tasobora kukira mukama we. Obu baraaba baampiganiize, na inywe nibaija kubahiiganiza; obu baraaba boorobiire ekigambo kyange, n’ekyanyu nibaija kukyorobera. 21 Baitu balibakora ebintu ebi byona nibabatura ibara lyange, habwokuba tibamanyire Ogu ayantumire. 22 Kakuba ntaraizire kandi nkabagambira, baakubaire bataine ekibi. Baitu hati tibaine ky’okwekwasa habw’ekibi kyabo. 23 Ogu weena anyakunnoba aba anobere na Isenyowe. 24 Kakuba ntarakozere omuli bo ebikorwa omuntu ondi weena ebi atakakoraga, baakubaire bataine ekibi; baitu hati bandozere kandi baanoba nyowe hamu na Isenyowe. 25 Baitu kinu kikabaho, kuhikiiriza ekyahandiikirwe omu Biragiro* byabo kiti: ‘Bakannobera busa.’ 26 Omukoonyezi ou ndibasindikira kuruga hali Isenyowe obu aliija, kandi ogu nugwo omwoyo gw’amananu, ogu alimpeera obwakaiso; 27 kandi na inywe mulimpeera obwakaiso, habwokuba mwikaire hamu na nyowe kurugira kimu ha kubanza.