Ebbaruha ya Paulo ey’Okubanza Hali Abakolinso
16 Obukirukuhika ha kusorooza ebintu eby’abarukwera, nimusobora kuhondera oburagirizi obu nahaire ebitebe eby’omu Garatiya. 2 Buli ha kiro eky’okubanza omu wiiki, buli omu omuli inywe naasobora kugira eki yayahura kusigikirra ha busobozi bwe, nukwo obu ndaija hatabaho kusorooza ebintu. 3 Baitu obu ndiija oku, ndituma abasaija aba muliba mukomeremu kusigikirra ha bbaruha zanyu nukwo batwale ekisembo kyanyu Yerusaalemu. 4 Baitu obu kiriba nikyetaagisa nyowe kugendayo, ndigenda na bo.
5 Baitu ndiija nambere muli, hanyuma y’okuraba Makedoni, habwokuba ndiraba Makedoni; 6 kandi obundi, ndiikara na inywe rundi mmale na inywe akasumi ak’obutiti, nukwo munsendekerezeeho kake nambere ndiba ningenda. 7 Habwokuba tindukugonza kubarora hati nimpingura kwonka, nkooku ndukunihira kumara na inywe obwire, Yahwe* obu araagonza. 8 Baitu niinyija kwikara omu Efeeso kuhikya Obugenyi bwa Pentekooti, 9 habwokuba orwigi orukooto orw’emirimo runkinguliirweho, baitu haroho baingi abarukuhakaniza.
10 Kandi Timoseo obu araija, mukigumye ngu tihaabaho kintu kyona ekyamutiinisa obu araaba ali na inywe, habwokuba naakora omulimo gwa Yahwe* nka nyowe. 11 Nahabweki, hatabaho omuntu weena ayamugaya. Mumurage omu businge nukwo aije nambere ndi habwokuba nyowe hamu n’ab’oruganda, tumulindiriire.
12 Kandi ebirukukwata ha w’oruganda mugenzi waitu Apolo, nkamwesengereza muno kwija n’ab’oruganda nambere muli. Akaba ataine kiteekerezo eky’okwijayo hati, baitu aliija obu alitunga omugisa.
13 Mwikale nimurora, mugume omu kwikiriza, mube bamanzi, kandi mube b’amaani. 14 Ebintu byona ebi murukukora, mubikole n’okugonza.
15 Ab’oruganda, hati nimbeesengereza nti: Mukimanyire ngu, ab’omu nju ya Sitefana nubo muganuro ogw’omu Akaya kandi bakeehayo bonka kukoonyera* abarukwera. 16 Na inywe mworoberege abantu abali nk’abo hamu n’abo boona abarukukwataniza hamu na itwe kandi bakakora n’amaani. 17 Baitu ninsemererwa habw’okubaho kwa Sitefana, Forutunata, hamu na Akaikasi, habwokuba babaireho nambere mutabaire. 18 Bahuumwize omwoyo* gwange n’ogwanyu. Nahabweki abasaija nk’abo mubatemu ekitiinisa.
19 Ebitebe eby’omu Asiya bibaramukize. Akura na Purisika, hamu n’ekitebe ekisorrokanira omu nju yabo, babaramukize kuruga ha mutima omu Mukama waitu. 20 Ab’oruganda boona babaramukize. Muramukyangane n’okunywegera okurukwera.
21 Nyowe Paulo, mpandiikire endamukyo zinu n’omukono gwange.
22 Obu haraaba haroho omuntu atarukugonza Mukama waitu, leka akyenwe. Ai Mukama waitu, ija! 23 Embabazi enyingi muno* eza Mukama waitu Yesu, zibe na inywe. 24 Okugonza kwange leka kwikale na inywe inywena omu Kristo Yesu.