Ebbaruha ya Paulo eya Kabiri Hali Abakolinso
10 Hati nyowe Paulo, nimbeesengereza omu buculeezi n’embabazi za Kristo, noobu kiraaba ngu nikizooka ngu ningaywa omuli inywe, baitu mba w’amaani obu mba ntali na inywe. 2 Ninsaba ngu obu ndiba na inywe, ntaba n’obumanzi nkakozesa amaani nkooku ndukunihira kugakozesa hali abamu abakitwara ngu nitwetwaza* kusigikirra hali eki, eki tuli omu mubiri. 3 Noobu kiraaba ngu tuli bantu b’omubiri, titurwana kusigikirra hali eki, eki tuli omu mubiri. 4 Habwokuba eby’okurwanisa byaitu ebi tukozesa omu bulemu, tibiri by’omubiri, baitu by’okurwanisa eby’amaani Ruhanga ebi atuhaire kumeenya* ebintu ebigumire kandi ebihamire muno nk’emihama.* 5 Habwokuba nitumeenya* enteekereza, n’ekintu kyona ekirukulemesa abantu kumanya Ruhanga, kandi nitusingura buli kiteekerezo kyona, nitukifoora kihulizi hali Kristo; 6 kandi tweteekaniize kufubira omuntu weena ow’araayoleka okutahurra okwa buli mulingo gwona, ahonaaho mumazire kukyoleka ngu muli bahulizi.
7 Murora ebintu kusigikirra ha nzooka yabyo. Kakuba omuntu weena aba naakigumya ngu ali wa Kristo, ayongere ayecumiitirizeeho ensonga enu: Nkooku ali wa Kristo, na itwe tuli be. 8 Noobu naakwehaisa ekirukukiraho habw’obusobozi Mukama waitu yatuhaire kubombeka hatali kubaseesa, tinaakukwasirwe ensoni. 9 Habwokuba tindukugonza kusisana oti rundi nindengaho kubatiinisa habw’ebbaruha zange. 10 Habwokuba bagamba bati: “Ebbaruha ze niziremeera kandi ziine amaani, baitu uwe obu aba ali na itwe taba w’amaani kandi ebi abaza tibiine makuru.” 11 Omuntu nk’ogu akimanye ngu ebi tubaza omu bbaruha, nibyo byonyini turukwija kukora obu turaaba tuli na inywe. 12 Titurukugonza kweteeka haiguru rundi kwerengesaniza n’abamu rundi kwehaisa. Baitu obu beekebera, basigikirra ha ndengo zaabo rundi beerengesaniza bonka na bonka, tibaine okwetegereza.
13 Itwe titurukwija kwenyumiriza aheeru y’emitaano ey’ekicweka ekyatuhairwe, baitu nitwija kwenyumiriza omu kicweka Ruhanga eki yatupimiire kandi omu kicweka eki, na inywe nuho muli. 14 Amananu gali, itwe tutahingule ha mitaano ey’ekicweka eki twahairwe oti rundi ngu inywe tutabahikeho, habwokuba niitwe twabandize kubahikaho nitutebeza amakuru amarungi agarukukwata hali Kristo. 15 Nangwa, titurukwenyumiriza aheeru y’ekicweka eki twahairwe omu mulimo ogw’omuntu ondi, baitu nitunihira ngu okwikiriza kwanyu obu kuraagenda nikweyongera, ebi tukozere nibiija kweyongera omu kicweka kyaitu. Obu nubwo turaayeyongera, 16 nukwo tusobole kurangirra amakuru amarungi omu bicweka ebindi kuhingura owaanyu nukwo tuteenyumiriza habw’eki ekimazire ira kukorwa omu kicweka eky’omuntu ondi. 17 “Baitu ogu arukwenyumiza, leka ayenyumirize omuli Yahwe.”* 18 Habwokuba ogu arukwenyumiza tali nuwe arukusiimwa, baitu ogu Yahwe* ou anyumiza.