Ebikorwa by’Abakwenda
16 Nahabweki yahika Derebbe na Rusitura. Kandi hakaba haliyo omwegeswa arukwetwa Timoseo, mutabani w’omukazi Omuyudaaya ayaikiriize baitu ise akaba ali Muyonaani, 2 kandi Timoseo akaba naabazibwaho kurungi ab’oruganda ab’omu Rusitura na Ikoniyo. 3 Paulo yagonza kugenda na Timoseo, kandi yamutwara yamusara habw’Abayudaaya ab’omu kiikaro eki, habwokuba boona bakaba bakimanyire ngu ise akaba ali Muyonaani. 4 Obu bakaba nibaraba omu mbuga, baamanyisaaga ab’oruganda encwamu ezikaba zikozerwe abakwenda n’abagurusi abakaba bali omu Yerusaalemu, nukwo basobole kuzihondera. 5 Nubwo ebitebe byayeyongera kugumibwa omu kwikiriza, n’omuhendo gw’abantu abarukwikiriza gwayeyongera kukanya buli kiro.
6 Ekindi, bakaraba omu Furugiya n’omu ihanga lya Garatiya, habwokuba omwoyo ogurukwera gukabatanga kutebeza ekigambo omu isaza lya Asiya. 7 Obu baasirimukire baahika Misiya, baalengaho muno kugenda Bituniya, baitu omwoyo gwa Yesu gwabatanga. 8 Nahabweki baaraba Misiya kandi baasirimuka Terowa. 9 Kiro eki omu bwire bw’ekiro, Paulo yatunga okwolekwa—omusaija Omunyamakedoni akaba ayemeriire aho naamwesengereza ati: “Ija Makedoni* otukoonyere.” 10 Ahonaaho obu yamazire kurora okwolekwa, twalengaho kugenda Makedoni, habwokuba tukakyetegereza ngu Ruhanga akaba atwesere kubatebeza amakuru amarungi.
11 Nubwo twagenda ha nyanja twayambuka kuruga Terowa twagenderaho Samosarakiya tuteemeriire ahantu hoona, baitu ekiro ekyahondiireho twagenda Niyapoli; 12 kandi obu twarugire oku, twagenda Firipi, orubuga orukaba ruli hansi y’obusobozi bwa Rooma, kandi orukaba nirukirayo obukuru omu isaza lya Makedoni. Twaikara omu rubuga oru kumara ebiro bike. 13 Ha kiro kya Sabbiiti, twaturuka orubuga nitukozesa omulyango twagenda ha rubaju rw’ekisaaru, nambere twateekeriize ngu haliyo ekiikaro eky’okusabiramu, kandi twaikarra twatandika kubaza n’abakazi abakaba beesoroize. 14 Kandi omukazi arukwetwa Lidiya kuruga omu rubuga rwa Swatira, ayatundaga engoye za papo kandi ow’akaba ali muheereza wa Ruhanga, akaba naahuliiriza, kandi Yahwe* yakingura omutima gwe yateekaho omutima Paulo ebi akaba naabaza. 15 Uwe n’ab’omu ka ye boona obu baabatiziibwe, yatwesengereza ati: “Obu muraaba mundozere ngu ndi mwesigwa hali Yahwe,* mwije mwikale omu nju yange.” Kandi yatwikirizisa kugendayo.
16 Obu tukaba nitugenda omu kiikaro eky’okusabiramu, omwisiki omuzaana ow’akaba aine omwoyo omubi ogwamuleeteraga kuragura,* yatutangaana. Omwisiki onu yaleeteraga bakama be itungo lingi habw’okuragura kwe. 17 Omwisiki ogu akaikara naahondera Paulo hamu na itwe kandi naatokera haiguru naagamba ati: “Abasaija banu, baheereza ba Ruhanga Anyakuli Haiguru Muno kandi nibabarangirra omuhanda ogw’okujunwa.” 18 Akaikara naakora ekintu kinu kumara ebiro bingi. Hanyuma Paulo yakijwaha kandi yahinduka yagambira omwoyo omubi ati: “Ninkuragira omu ibara lya Yesu Kristo, omurugemu.” Kandi gwamurugamu omu bwire obu bwonyini.
19 Bakama be obu baarozere ngu ekintu ekibaire nikibaleetera amagoba tikikyaroho, baakwata Paulo na Siira babasika baabatwara omu katale hali abalemi. 20 Obu baabahikize omu maiso g’abalemi,* baagamba bati: “Abasaija banu nibatabangura muno orubuga rwaitu. Bayudaaya, 21 kandi nibarangirra emigenzo ei tutasobora kwikiriza rundi kuhondera kusigikirra ha biragiro byaitu nk’Abarooma.” 22 Ekitebe ky’abantu baabaimukirra kandi hanyuma y’abalemi kutaagura ebijwaro byabo, baaragira babateere emiigo. 23 Obu baamazire kubateera muno, baabata omu nkomo kandi baaragira omulinzi w’enkomo kubalinda kurungi. 24 Habwokuba nukwo yaragiirwe ati, yabateeka omu kisiika eky’omunda y’enkomo kandi amaguru gaabo yagaboha omu mbaaho.*
25 Baitu nk’ekiro omu itumbi, Paulo na Siira bakaba nibasaba kandi nibazina ebizina ebirukukugiza Ruhanga, kandi abanyankomo bakaba babahuliiriize. 26 Ahonaaho omusisa gw’amaani gwateera, omusingi gw’enkomo gwatengesebwa, enyigi z’enkomo zaakinguka, kandi byona ebi bakaba bababoheseze byasumurruka. 27 Omulinzi w’enkomo obu yasisiimukire, yarora enyigi z’enkomo zikingukire, yasomorayo empirima ye yagonza kweyita naateekereza ngu abanyankomo batorokere. 28 Baitu Paulo yamweta omu iraka erikooto naagamba ati: “Oteekora kubi, habwokuba itwena tuli hanu.” 29 Yasaba eky’okumulikisa, yarahuka yataaha omunda yagwa omu maiso ga Paulo na Siira naatukumira. 30 Nubwo yabaleeta aheeru, yabakaguza ati: “Bakama bange, kiki eki nsemeriire kukora kujunwa?” 31 Baamugarukamu bati: “Ikiriza Mukama waitu Yesu, kandi noija kujunwa, iwe n’ab’omu nju yaawe.” 32 Nubwo baamugambira ekigambo kya Yahwe* ali hamu n’ab’omu nju ye boona. 33 Ha saaha egi yonyini omu bwire bw’ekiro, yabatwara yanaabya ebihuta byabo. Nubwo uwe n’ab’omu nju ye boona baabatizibwa ahonaaho. 34 Yabaleeta omu nju ye yabaha ebyokulya, kandi uwe n’ab’omu nju ye baasemererwa muno habwokuba akaba aikiriize Ruhanga.
35 Obwire obu bwakiire, abalemi baatuma abaserikale bamugambire bati: “Lekera abasaija abo.” 36 Mukuru w’enkomo yagambira Paulo ebigambo byabo ati: “Abalemi batumire abaserikale hali nyowe ngu mbalekere inywe babiri. Nahabweki, muturuke aheeru, mugende n’obusinge.” 37 Baitu Paulo yabagambira ati: “Batutiirege omu rwijwire, batatucweriire omusango, kandi baatuta omu nkomo noobu kiraaba ngu tuli Barooma. Hati nibagonza kutulekera omu nsita? Nangwa, eki tikirukusoboka! Leka bo bonyini baije batwihemu kandi batusendekereze.” 38 Abaserikale baagenda baagambira abalemi ebigambo binu. Kandi baatiina muno obu baahuliire ngu abasaija banu Barooma. 39 Baija baabeesengereza, kandi hanyuma y’okubasendekereza, baabasaba baruge omu rubuga oru. 40 Obu baarugire omu nkomo, baagenda omu ka ya Lidiya; kandi obu baarozere ab’oruganda, baabagarramu amaani kandi baarugayo.