Ebbaruha ya Paulo Hali Abarooma
15 Itwe ab’amaani tusemeriire kwetweka obuceke obw’abo abataine amaani kandi tuleke kwesemeza itwenka. 2 Leka buli omu hali itwe asemezege mutaahi we habw’oburungi bwe, nukwo asobole kumwombeka. 3 Habwokuba na Kristo ateesemeze wenka, baitu nkooku kyahandiikirwe kiti: “Ebijumo by’abo abarukukujuma biizire hali nyowe.” 4 Habwokuba ebintu byona ebyahandiikirwe ira, bikahandiikwa habw’okutwegesa, nukwo tusobole kuba n’okunihira kuraba omu kugumiisiriza kwaitu n’okuhuumuzibwa okuruga omu Byahandiikirwe. 5 Leka Ruhanga ow’agaba okugumiisiriza hamu n’okuhuumuzibwa, abasobozese kuba n’enteekereza niyo emu Kristo Yesu ei akaba aine, 6 nukwo inywena hamu omu iraka limu* musobole kunyumiza Ruhanga kandi Ise Mukama waitu, Yesu Kristo.
7 Nahabweki, mutangirrangane* nkooku Kristo na uwe yabatangiriire, nukwo ekitiinisa kisobole kuheebwa Ruhanga. 8 Habwokuba nimbagambira nti, Kristo akafooka muheereza w’abo abasazirwe kwoleka ngu Ruhanga w’amananu, n’okugumya emirago Ruhanga yaraganiize baisenkurubo, 9 kandi n’amahanga gasobole kunyumiza Ruhanga habw’embabazi ze. Nkooku kihandiikirwe kiti: “Niyo ensonga habwaki ndigamba omu rwijwire ngu nkumanyire omu mahanga, kandi ndaaziniraga ibara lyawe ebizina eby’okukugiza.” 10 Kandi ayongera agamba ati: “Musemererwe inywe amahanga, hamu n’abantu be.” 11 Kandi ati: “Mukugize Yahwe,* inywe amahanga goona, kandi leka abantu boona bamukugize.” 12 Isaaya ayongera agamba ati: “Halibaho omwijukuru wa Yese, ow’aliimuka* kulema amahanga kandi amahanga galimunihirramu.” 13 Leka Ruhanga anyakugaba okunihira abaijuze inywena okusemererwa, hamu n’obusinge habwokuba nimumwesiga, nukwo musobole kusaagaana omu kunihira n’amaani g’omwoyo ogurukwera.
14 Hati ab’oruganda, nyowe ninkigumiza kimu ngu, na inywe mwijwire oburungi, mwijwire okumanya kwona, kandi ngu nimusobora kuhaburangana.* 15 Baitu mbahandiikiire ebintu ebimu ntarukubasereka, nukwo nyongere mbaijukye, habw’embabazi enyingi ezanyolekerwe kuruga hali Ruhanga 16 nukwo nsobole kuba muheereza wa Kristo Yesu omu rwijwire hali amahanga. Ninyejumbira omu mulimo ogurukwera ogw’okurangirra amakuru amarungi aga Ruhanga, nukwo amahanga ganu gasobole kuba ekyonzira ekirukwikirizibwa, ekyeziibwe n’omwoyo ogurukwera.
17 Nahabweki, nyine ensonga habwaki ninsemerererwa omu Kristo Yesu ha bw’ebintu ebirukukwata hali Ruhanga. 18 Tindukwija kwongera kubazaaho ekintu kyona, oihireho Kristo eki akozere kuraba omuli nyowe nukwo amahanga gasobole kuba mahulizi, kuraba omu kigambo kyange n’ebikorwa byange, 19 n’amaani ag’obwokurorraho n’ebirukuhuniiriza, n’amaani ag’omwoyo gwa Ruhanga, kuruga Yerusaalemu n’okwetoroora kuhikira kimu Iruliko,* ntebiize buli hamu amakuru amarungi agarukukwata hali Kristo. 20 Kandi omu mulingo gunu, mali nkifoire kigendererwa kyange kutatebeza amakuru amarungi hoona nambere ibara lya Kristo likaba limazire kutebezebwa, nukwo ntombeka ha musingi ogw’omuntu ondi; 21 baitu nkooku kyahandiikirwe kiti: “Abo abataragambiirwe ebirukumukwataho balirora kandi abo abatarahuliire balyetegereza.”
22 Enu niyo ensonga habwaki, emirundi nyingi nalemesiibwe kwija nambere muli. 23 Baitu hati busaho kiikaro kyona omu bicweka binu eki ntaratebiize kandi kumara emyaka nyingi, ntaaha nyine ekihika eky’okwija nambere muli. 24 Nahabweki obu ndaagenda Sipaini, ninnihira ngu niinyija kubarora kandi munsendekerezeeho kake hanyuma y’okusemererwa kuba hamu na inywe. 25 Baitu hati, ndi haihi kugenda Yerusaalemu kuheereza abarukwera. 26 Habwokuba ab’omu Makedoni n’omu Akaya, bahaireyo ebintu byabo n’okusemererwa hali abanaku abali omu barukwera omu Yerusaalemu. 27 Amananu gali ngu, kibasemiize habw’okukikora, kandi mali bakaba baine ibanja ery’okubakoonyera; ab’amahanga obu baraaba babagaine ha bintu byabo eby’omwoyo, na bo bakaba baine ibanja ery’okubakoonyera omu byetaago byabo eby’omubiri. 28 Nahabweki obu ndimara eki, n’okubakwasa ebyahairweyo,* ndibarabaho obu ndiba ningenda Sipaini. 29 Baitu nkimanyire obu ndiija nambere muli, ndiija n’emigisa nyingi kuruga hali Kristo.
30 Inywe ab’oruganda, hati nimbateererra kuraba omu Mukama waitu Yesu Kristo, n’okuraba omu kugonza okw’omwoyo ngu mwekambe hamu na nyowe kusaba Ruhanga habwange, 31 nukwo nsobole kukiraho hali abatarukwikiriza abali omu Buyudaaya kandi ngu obuheereza bwange busobole kwikirizibwa abarukwera, 32 nukwo habw’okugonza kwa Ruhanga nyije nambere muli n’okusemererwa kandi ngarurwemu amaani ndi hamu na inywe. 33 Leka Ruhanga ow’aha obusinge aikale na inywe inywena. Amiina.