Ebbaruha ya Paulo Hali Abarooma
6 Hati turaagamba ki? Turaagumizaamu omu kibi nukwo embabazi za Ruhanga enyingi muno zisobole kweyongera? 2 Nangwa! Nkooku twafiire hali ekibi, nitusobora tuta kukiikaramu? 3 Rundi timukimanyire ngu itwena abaabatiziibwe omu Kristo Yesu tukabatizibwa n’omu kufa kwe? 4 Nahabweki tukaziikwa na uwe kuraba omu kubatizibwa kwaitu twataaha omu kufa kwe, nukwo nkooku Kristo yahumbwirwe kuruga omu bafu, kuraba omu kitiinisa kya Ise, na itwe tusemeriire kurubatira omu bwomeezi obuhyaka. 5 Obu turaaba tuteeraniziibwe na uwe omu kufa okurukusisana n’okwe, na itwe tuliteeranizibwa na uwe omu kuhumbuuka okurukusisana nk’okwe. 6 Habwokuba tukimanyire ngu omuntu waitu owa ira akahanikwa hamu na uwe ha muti nukwo omubiri gwaitu ogw’ekibi guburwe amaani, nukwo tuleke kwikara tuli bairu b’ekibi. 7 Habwokuba ogu ow’afiire aba aihirweho* ekibi kye.
8 Kandi obu turaaba twafiire hamu na Kristo, nitwikiriza ngu nitwija kwomeera hamu na uwe. 9 Habwokuba tukimanyire ngu Kristo akahumbuurwa kuruga omu bafu, talyongera kufa; kandi okufa tikukyamwineho obusobozi. 10 Habwokuba akafa omurundi gumu yamara kwihaho ekibi, baitu obwomeezi obu aine, abwine nukwo asobole kukora Ruhanga ebi agonza. 11 Omu mulingo nugwo gumu, na inywe mwerolege nk’abafiire obukirukuhika ha kibi, baitu nk’abarukwomeera kusobora kukora Ruhanga ebi agonza, kuraba omu Kristo Yesu.
12 Nahabweki, mutaikiriza ekibi kwikara nikirema nk’omukama omu mibiri yanyu enyakufa nukwo mukahondera okwegomba kw’omubiri. 13 Kandi mutaikara nimuhayo emibiri yanyu hali ekibi, nk’ebikwato eby’okukora eby’okutahikirra,* baitu mweheyo hali Ruhanga nk’abo aboomiire kuruga omu bafu, kandi emibiri yanyu mugiheyo hali Ruhanga nk’ebikwato eby’okukora okuhikirra.* 14 Ekibi tikisemeriire kubalema habwokuba timuli hansi y’ebiragiro, baitu hati muli hansi y’embabazi za Ruhanga enyingi muno.
15 Hati tukole ki? Tusiise habwokuba tituli hansi y’ebiragiro, baitu ngu tuli hansi y’embabazi za Ruhanga enyingi muno? Nangwa! 16 Timukimanyire ngu, kakuba mwehayo hali omuntu weena kumworobera nk’abairu, muba mufookere bairu b’ogu ou mworobera, kandi ngu muba bairu b’ekibi ekirukuhikya omu kufa, rundi obuhulizi oburukuhikya omu kuhikirra? 17 Baitu Ruhanga asiimwe, noobu kiraaba ngu mukaba muli bairu b’ekibi, mukafooka bahulizi kuruga ha mutima hali okwegesa oku mwatungire. 18 Kandi nkooku mwalekiirwe kuruga omu kibi, mukafooka bairu b’okuhikirra. 19 Habw’obuceke bw’emibiri yanyu, ninkozesa ebigambo abantu barukwetegereza; nkooku mwahaireyo emibiri yanyu kuba bairu b’ebikorwa ebitasemiire, n’ebikorwa ebibi nukwo mukole ebintu ebibi. Hati muheyo emibiri yanyu ha by’okuhikirra nukwo mukole ebirukwera. 20 Obu mukaba muli bairu b’ekibi, mukaba muli b’obugabe hali okuhikirra.
21 Hati, byana bya mulingo ki ebi mwayanaga kasumi ako? Ebintu hati ebirukubakwasa ensoni. Habwokuba empero y’ebintu ebi nukwo okufa. 22 Baitu habwokuba hati mukalekerwa kuruga omu kibi, mwafooka bairu ba Ruhanga, nimwana ebyana omu mulingo ogurukwera, kandi ekirugamu obwomeezi obutahwaho. 23 Habwokuba empeera y’ekibi nukwo okufa, baitu ekisembo Ruhanga eki agaba nubwo obwomeezi obutahwaho kuraba omu Kristo Yesu Mukama waitu.