Ebbaruha ya Paulo ey’Okubanza Hali Timoseo
1 Nyowe Paulo, omukwenda wa Kristo Yesu, habw’ekiragiro kya Ruhanga Omujuni waitu, na Kristo Yesu, okunihira kwaitu, 2 nimpandiikira Timoseo* omwana wange mali omu kwikiriza:
Embabazi enyingi muno,* okuganyira hamu n’obusinge ebiruga hali Ruhanga Isiitwe na Kristo Yesu Mukama waitu, bibe na iwe.
3 Nkooku nakuteereriire kwikara omu Efeeso obu nkaba ndi haihi kugenda omu Makedoni, na hati ninkuteererra oikaleyo, nukwo osobole kuragira abamu kuteegesa enyegesa ez’ebisuba, 4 noobu kwakuba kuta omutima ha nganikyo ez’ebisuba, rundi kuseruliiriza ha by’obuzaale. Ebintu nk’ebi tibiri by’omugaso kandi birugamu kuteebereza omu kiikaro ky’okwegesa ebintu ebirugire hali Ruhanga ebigumya okwikiriza. 5 Mali, ekigendererwa eky’oburagirizi bunu kiri ky’okukukoonyera kuba n’okugonza okuruga omu mutima ogusemiire, n’okuruga omu muntu w’omunda omurungi, hamu n’omu kwikiriza okutarumu obugobya. 6 Habw’okutahondera ebintu ebi, abamu bahugukire baatandika kubaza ebitaine makuru. 7 Bagonza kuba beegesa b’ebiragiro baitu tibarukwetegereza ebintu ebi barukubaza, noobu byakuba ebintu ebi barukulemeraho muno.
8 Tukimanyire ngu Ebiragiro* birungi kakuba omuntu abita omu nkora nkooku kisemeriire,* 9 akakyetegereza ngu ebiragiro tibiteebwaho habw’omuntu ow’okuhikirra, baitu biteebwaho habw’abo abacwa ebiragiro, abajeemu, abatatiina Ruhanga, abasiisi, abatali beesigwa,* abatarukutamu ekitiinisa ebintu ebirukwera, abaita baisebo na banyinabo, kandi bakaita n’abandi, 10 abantu abasiihani,* abakuuhya,* abarukubuzaaho abantu, ababaza ebisuba, abarahira ebisuba, n’ebintu ebindi byona ebirukuhakaniza enyegesa ey’ehikire,* 11 erukusigikirra h’amakuru amarungi ag’ekitiinisa kya Ruhanga anyakusemeriirwe, aga nakwasiibwe.
12 Ninsiima Kristo Yesu Mukama waitu, ayampaire amaani habwokuba akarora ngu ndi mwesigwa kandi yankwasa obuheereza, 13 noobu kiraaba ngu kara najumaga Ruhanga, nimpiiganiza abandi, kandi ntarukubatamu ekitiinisa. Baitu nabwo nkoolekwa embabazi habwokuba nabikoraga omu butamanya kandi nkaba ntaine okwikiriza. 14 Baitu Mukama akaanyoleka embabazi enyingi muno, kandi natunga okwikiriza n’okugonza ebiruga hali Kristo Yesu. 15 Ebigambo binu by’okwesiga kandi bisemeriire kwikirizibwa omu bwijwire ngu, Kristo Yesu akaija omu nsi kujuna abasiisi. Kandi omuli abo, niinyowe ow’okubanza. 16 Baitu nabwo nkoolekwa embabazi nukwo kuraba omuli nyowe ow’okubanza omu basiisi, Kristo Yesu asobole kwoleka okugumiisiriza kwe, nukwo nsobole kuba ekyokurorraho hali abo boona abarukwija kumwikiririzaamu nukwo basobole kutunga obwomeezi obutahwaho.
17 Omukama ow’ebiro n’ebiro, atahwaho, atarorwa, kandi Ruhanga omu wenka, aheebwe ekitiinisa n’okukugizibwa ebiro n’ebiro. Amiina.
18 Oburagirizi bunu nimbuha iwe omwana wange Timoseo, nibusigikirra ha bunabbi obu baakugambireho kara, nukwo kuraba omu bunabbi bunu ogumizeemu noorwana obulemu kurungi, 19 kandi ogumizeemu oine okwikiriza, n’omuntu ow’omunda omurungi abamu ou banagire, ekibarugiiremu okwikiriza kwabo kuhwerekerra nk’emeeri ey’ecwekacwekere. 20 Bamu hali bo ni Humenayo na Alekizanda, kandi banu mbahaireyo hali Sitaani nukwo bahanwe kibeegese kutajuma Ruhanga.