Ebbaruha ya Paulo Hali Abarooma
10 Ab’oruganda, eki ndukugonza omu mutima gwange n’okusaba kwange hali Ruhanga habwabo nikyo ngu bajunwe. 2 Habwokuba nimbaheera obwakaiso ngu, beekamba kuheereza Ruhanga baitu batarukusigikirra ha kumanya okuhikire. 3 Habw’okutamanya endengo za Ruhanga ez’okuhikirra, baitu habw’okugonza kweteeraho ezaabo bonka, tibahondera endengo za Ruhanga ez’okuhikirra. 4 Habwokuba Kristo nuwe mpero y’Ebiragiro,* nukwo buli omu arukumwikiririzaamu asobole kutunga okuhikirra.
5 Habwokuba Musa akahandiikaho okuhikirra okurukusigikirra ha Biragiro ati: “Omuntu ow’akora ebintu binu alyomeera habwabyo.” 6 Baitu okuhikirra okuruga omu kwikiriza nikugamba kuti: “Otaligamba omu mutima gwawe oti: ‘Nooha alitemba omu iguru?’ ekirukumanyisa kusirimura Kristo omu nsi, 7 rundi ngu: ‘Nooha alisirimuka omu kiina ekitaine bugarukiro?’* ekirukumanyisa kwiha Kristo omu bafu.” 8 Baitu ekyahandiikirwe nikigamba ki? Nikigamba kiti: “Ekigambo kikuli haihi, omu kanwa kaawe n’omu mutima gwawe”; ekirukumanyisa “ekigambo” eky’okwikiriza eki turukutebeza. 9 Kakuba okirangirra omu rwijwire n’akanwa kaawe ngu Yesu nuwe Mukama, kandi okaikiriza omu mutima gwawe ngu Ruhanga akamuhumbuura kuruga omu bafu, noija kujunwa. 10 Habwokuba omuntu aikiriza n’omutima gwe kutunga okuhikirra, baitu n’akanwa ke ayatura omu rwijwire kutunga okujunwa.
11 Habwokuba ekyahandiikirwe kigamba kiti: “Busaho n’omu ow’amwikiririzaamu aliswara.” 12 Habwokuba busaho mbaganiza hagati y’Omuyudaaya n’Omuyonaani. Boona Mukama wabo ali omu, anyakugabira omu bwingi abo boona abamukunga. 13 Habwokuba “ogu weena ow’akunga ibara lya Yahwe* alijunwa.” 14 Baitu baraamukunga bata obu baaraba batarukumwikiririzaamu? Baraamwikiririzaamu bata ogu ou batakahurrahoga? Kandi baraahurra bata, hataroho muntu ow’araatebeza? 15 Kandi baraatebeza bata, batatumirwe? Nkooku kyahandiikirwe kiti: “Mali ka bisemiire, ebigere by’abo abarukurangirra amakuru amarungi ag’ebintu ebirungi!”
16 Baitu tibali boona abaayorobiire amakuru amarungi. Habwokuba Isaaya agamba ati: “Yahwe,* nooha aikiririize omu bintu ebi ahuliire kuruga hali itwe?”* 17 Nahabweki, okwikiriza kwija hanyuma y’okuhurra ekigambo. Hanyuma, ekigambo kihulirwa omuntu obu atebezaaho ebirukukwata hali Kristo. 18 Baitu kankaguze, Batahurre? Mali bakahurra, habwokuba, “iraka lyabo likahika omu nsi yoona kandi n’obutumwa bwabo bukahika omu nsi zoona.” 19 Baitu kankaguze, Isaleeri etamanye? Eky’okubanza Musa naagamba ati: “Ndibaleetera kuba n’ihali ninkozesa abantu ab’amahanga agandi; Ndibaleetera kukwatwa ekiniga eky’amaani kuraba omu ihanga eridomadoma.” 20 Baitu Isaaya n’obumanzi bwingi akagamba ati: “Nkazoorwa abakaba batarukunserra; nkamanywa abo abakaba batarukukaguza ebirukunkwataho.” 21 Baitu abazaaho Isaleeri ati: “Ekiro kyona, nyanjwire emikono yange hali abantu abatarukuhurra kandi abagumangaine.”