Ebbaruha ya Paulo Hali Abarooma
13 Buli omu ayorobere ab’obusobozi, habwokuba busaho obusobozi obutaruga hali Ruhanga; kandi ab’obusobozi abaroho bali omu biikaro byabo ebirukwahukana habwa Ruhanga. 2 Nahabweki, weena anyakuhakaniza ab’obusobozi aba ahakaniize enteekaniza ya Ruhanga; kandi abo abagihakaniza balicwerwa omusango. 3 Habwokuba abo abarukukora ebirungi tibatiina abalemi, baitu abo abarukukora ebibi nubo babatiina. Noogonza kwikara otarukutiina ab’obusobozi? Ikara nookora ebirungi, kandi balikusiima habw’eki; 4 habwokuba muheereza wa Ruhanga hali inywe habw’oburungi bwanyu. Baitu obu oraaba nookora ebibi, obe n’okutiina, habwokuba tibakwatira busa empirima. Muheereza wa Ruhanga anyakufubira* abo abakora kubi.
5 Nahabweki haroho ensonga enungi ey’esemeriire kukuleetera kuboorobera, hatali habw’okutiina kufubirwa kyonka, baitu na habw’omuntu waawe ow’omunda. 6 Egi niyo ensonga habwaki na inywe nimusasura emisoro; habwokuba bali baheereza ba Ruhanga abaikara nibaheereza abantu habw’ekigendererwa eki. 7 Mubahe byona ebi basaba; hali ogu ow’asaba omusoro, mumusasule omusoro; hali ogu ow’asaba obusuuru, mumusasule obusuuru; hali ogu ow’asaba okutiinwa, mumutiine; hali ogu ow’asaba ekitiinisa, mumutemu ekitiinisa.
8 Mutaba n’ibanja hali omuntu weena, oihireho okugonzangana inywenka; habwokuba ogu weena anyakugonza mutaahi we aba ahikiiriize ebiragiro. 9 Habwokuba ebiragiro bigamba biti: “Otalisiihana, otaliita, otaliiba, otalyegomba,” kandi n’ebiragiro ebindi byona biteeranizibwa hamu omu bigambo binu: “Osemeriire kugonza mutaahi waawe nkooku oyegonza wenka.” 10 Omuntu ow’aine okugonza takora kubi mutaahi we; nahabweki, okugonza kuhikiiriza ebiragiro.
11 Musemeriire kukora eki habwokuba mumanyire akasumi, kandi nkooku esaaha ehikire inywe kusisiimuka omu turo, habwokuba hati okujunwa kwaitu kweyongiire kwirra haihi kukira obu twafookere abaikiriza. 12 Obwire buli haihi kukya; ekiro kiri haihi kuhika. Leka twejuuleho ebikorwa eby’omwirima kandi leka tujwale eby’okurwanisa eby’ekyererezi. 13 Leka twetwaze* kurungi nk’abali omu kyererezi ekya nyamusana, twetantale amagenyi agarumu akajagarro, okutamiira, twetantale obusiihani n’engeso ezijunzire,* okukungana n’ihali. 14 Baitu mujwale Mukama waitu Yesu Kristo, kandi mutateekaniza kara kukora eby’okwegomba okw’omubiri.