Ebbaruha ya Paulo ey’Okubanza Hali Abakolinso
7 Obukirukuhika ha bintu ebi mwahandiikire, kyakubaire kirungi omusaija kutakwataho* omukazi, 2 baitu habw’obusiihani* kweyongera, leka buli musaija atunge omukazi we kandi buli mukazi atunge omusaija we. 3 Leka omusaija ahe mukazi we ekimusemeriire, n’omukazi na uwe ahe iba ekimusemeriire. 4 Omukazi taine busobozi ha mubiri gwe, baitu iba nuwe agwineho obusobozi; omu mulingo nugwo gumu, omusaija taine busobozi ha mubiri gwe baitu omukazi nuwe agwineho obusobozi. 5 Mutaimangana, oihireho obu muraaba mwikirraniize habw’akasumi nukwo musobole kutunga obwire obw’okusaba kandi musobole kwongera kuba hamu, nukwo Sitaani ataikara naaboohya habw’okutaba n’okwetanga. 6 Kinu nkibagambiire kubahabura, tikiri kiragiro. 7 Baitu naakugondeze abantu boona babe nka nyowe. Baitu buli muntu aine ekisembo kye kuruga hali Ruhanga, omu, omu mulingo gunu, ondi omu mulingo ogundi.
8 Hati ningambira abo abatali omu buswere hamu n’abafaakati ngu kirungi kwikara bali nka nyowe oku ndi. 9 Baitu obu baraaba batasobora kwetanga, leka baswere rundi baswerwe, habwokuba kirungi kutaaha obuswere, kukira kulemwa okwegomba okw’omubiri okw’amaani.
10 Abali omu buswere nimbaragira, baitu tali niinyowe arukubaragira baitu Mukama waitu, ngu omukazi tasemeriire kwahukana na iba. 11 Baitu kakuba ayahukana na uwe, leka aikale ataswirwe kitali eki agarukanganemu na iba; kandi n’omusaija tasemeriire kuleka mukazi we.
12 Baitu abandi nimbagambira nti, ego nyowe hatali Mukama waitu: Kakuba ow’oruganda weena aba aine omukazi atali mwikiriza, kandi omukazi naagonza kwikara na uwe, atamuleka; 13 kandi kakuba omukazi aba aine iba atali mwikiriza, kandi iba naagonza kwikara na uwe atalekaho iba. 14 Habwokuba omusaija atali mwikiriza ayezebwa habwa mukazi we, kandi n’omukazi atali mwikiriza ayezebwa habw’ow’oruganda; kakuba kitali kiti, abaana banyu baakubaire bateeziibwe baitu hati beeziibwe. 15 Baitu kakuba ow’atarukwikiriza acwamu kugenda,* muleke agende, omu nyikara nk’egi ow’oruganda rundi munyaanya itwe aba atakyaboherwe habwokuba Ruhanga akabeeta kuba omu businge. 16 Mukazi iwe noomanya ota, obundi olijuna baro? Rundi musaija iwe noomanya ota, obundi olijuna mukazi waawe?
17 Baitu nkooku Yahwe* ahaire buli omu omugabo, leka buli omu arubate nkooku Ruhanga yamwesere. Kandi hati nimpa oburagirizi bunu omu bitebe byona. 18 Haroho omuntu weena ayayeserwe amazire kusarwa? Atafooka nk’ow’atasazirwe. Haroho omuntu weena ayayeserwe atasazirwe? Aleke okusarwa. 19 Okusarwa* n’okutasarwa tikiri kikuru; baitu ekikuru nukwo kworobera ebiragiro bya Ruhanga. 20 Enyikara yoona buli muntu ei akaba arumu obu yayeserwe, leka niyo aikalemu. 21 Okeetwa oli mwiru? Eki kitakweraliikiriza; baitu obu oraaba noosobora kufooka w’obugabe, kozesa omugisa ogu. 22 Weena ayayeserwe omu Mukama waitu ali mwiru, atunga obugabe kandi aba wa Mukama waitu; omulingo nugwo gumu, ogu weena ayayeserwe ali w’obugabe,* mwiru wa Kristo. 23 Mukagurwa n’omuhendo mwingi; muleke kufooka bairu b’abantu. 24 Ab’oruganda, enyikara buli muntu ei akaba arumu obu yayeserwe, leka niyo aikalemu omu maiso ga Ruhanga.
25 Obukirukuhika h’abatali omu buswere,* tinyine kiragiro kyona kuruga hali Mukama waitu, baitu nimbaha enteekereza yange nk’ogu ayayolekerwe embabazi za Mukama waitu, nukwo mbe mwesigwa. 26 Nahabweki, ninteekereza ngu kirungi muno omusaija kwikara nkooku ali habw’ebizibu ebiroho. 27 Okagaitwa n’omukazi? Otaahukana na uwe. Toine omukazi? Leka kuserra omukazi. 28 Baitu kakuba otaaha obuswere, oba otakozere kibi. Kandi omuntu ow’atali omu buswere obu abutaaha, aba atakozere kibi. Baitu abo abataaha obuswere balitunga obujune omu mibiri yabo. Baitu nindengaho kubakoonyera nukwo mutahikwaho obujune obu.
29 Ab’oruganda, kinu ninkibagambira nti obwire obusigaireyo buke. Kuruga hati, abo abaine abakazi, beetwaze nk’abatabaine, 30 abo abarukurra beetwaze nk’abatarukurra, abo abasemeriirwe beetwaze nk’abatasemeriirwe, n’abo abarukugura ebintu beetwaze nk’abatabiine. 31 Kandi n’abo abarukukozesa ebintu by’ensi, baleke kubyemarraho; habwokuba enyikara y’ensi enu eriyo neehinduka. 32 Mali tindukugonza mwetuntule. Omusaija ow’atali omu buswere atunturra ebintu bya Mukama waitu, omulingo asobora kusiimwa Mukama waitu. 33 Baitu omusaija ow’aswire atunturra ebintu by’ensi, omulingo asobora kusemeza* mukazi we, 34 kandi aba abaganiziibwemu. Omukazi ataswirwe rundi omwisiki atakateeranaga n’omusaija, ayetunturra ebintu bya Mukama waitu nukwo asobole kuba arukwera omu mubiri n’omu mwoyo. Baitu omukazi ow’aswirwe atunturra ebintu eby’ensi, omulingo asobora kusemeza* iba. 35 Baitu nimbaza kinu habw’okugasira inywe hatali kubalemesa,* baitu kubeekambisa kukora ekihikire n’okwemarra hali Mukama waitu mutaine ekirukubahugura.
36 Baitu omuntu weena kakuba ateekereza ngu kwikara atataahire obuswere nikimuleetera kwetwaza omu mulingo ogutasemeriire, kandi ahingwire akasumi ak’obusigazi omubiri obu guba gucamukiriire, kinu nikyo asemeriire kukora: Leka akole eki arukugonza habwokuba naaba atasiisire. Leka bataahe obuswere. 37 Baitu omuntu weena kakuba ahurra ateekaine omu mutima gwe, kandi ataine ekyetaago kinu, kandi naasobora kwetanga kandi acwiremu omu mutima gwe kwikara atataahire obuswere, naija kuba akozere kurungi. 38 N’ogu ow’ataaha obuswere aba akozere kurungi, baitu ogu ow’atabutaaha aba akizireho kukora kurungi.
39 Omukazi aba aboherwe iba obu aba akyali mwomeezi. Baitu iba obu agwijagira omu kufa, aba aine obugabe obw’okuswerwa omusaija weena ou arukugonza, baitu omu Mukama waitu honka. 40 Baitu nyowe ninteekereza ngu, kakuba omukazi asigara nkooku ali, aba n’okusemererwa okurukukiraho; kandi ninkigumya ngu na nyowe nyine omwoyo gwa Ruhanga.