Ebbaruha ya Paulo ey’Okubanza Hali Abakolinso

2 Nahabweki ab’oruganda, obu naizire nambere muli, ntaije nimbagambira ebigambo ebirukuhuniiriza rundi amagezi obu nkaba nindangirra ensita ya Ruhanga ey’erukwera hali inywe. 2 Habwokuba nkacwamu kutamanya ekintu kyona omuli inywe, oihireho Yesu Kristo ayaitiirwe ha muti. 3 Kandi nkaija nambere muli omu buceke, omu kutiina n’okutukumira; 4 kandi ebi nabazaaga n’ebi natebezaaga bikaba bitarumu ebigambo eby’okusoonasoona eby’amagezi, baitu ebigambo byange bikooleka omwoyo gwa Ruhanga n’amaani ge, 5 nukwo okwikiriza kwanyu kutasigikirra h’amagezi g’abantu, baitu h’amaani ga Ruhanga.

6 Hati, nitubaza eby’amagezi hali abo abakuzire omu by’omwoyo, baitu tigali magezi ag’enteekaniza ey’ebintu* enu, rundi ag’abalemi ab’enteekaniza ey’ebintu enu, abarukwija kuhwerekerra. 7 Baitu nitubazaaho amagezi ga Ruhanga agali omu nsita erukwera, amagezi agaserekerwe, Ruhanga agayateekaniize kara, enteekaniza ey’ebintu enu etakabaireho habw’ekitiinisa kyaitu. 8 Amagezi ganu, busaho n’omu h’abalemi ab’enteekaniza ey’ebintu enu ayagamanyire, habwokuba kakuba baagamanyire, tibaakwitiire Mukama waitu ow’ekitiinisa ha muti.* 9 Baitu nkooku kyahandiikirwe kiti: “Eriiso tiriboine, n’okutu tikuhuliire, kandi n’omutima gw’omuntu tiguteekeriize ha bintu Ruhanga ateekaniriize abo abamugonza.” 10 Itwe Ruhanga abitusuukuliire kuraba omu mwoyo gwe, habwokuba omwoyo guseruliiriza omu bintu byona, n’omu bintu bya Ruhanga ebihamire.

11 Muntu ki ow’amanyire ebintu by’omuntu, oihireho omwoyo* ogumurumu? Nahabweki, busaho n’omu ow’amanyire ebintu bya Ruhanga, oihireho omwoyo gwa Ruhanga. 12 Itwe tutatunge omwoyo gw’ensi, baitu tukatunga omwoyo kuruga hali Ruhanga, nukwo tusobole kumanya ebintu Ruhanga ebi atuhaire habw’embabazi ze. 13 Ebintu ebi, nibyo na itwe tubaza tutarukukozesa ebigambo ebi twayegesiibwe kuraba omu magezi g’abantu, baitu omwoyo ebi gwatwegeseze, obu nitusoborra* ebintu eby’omwoyo nitukozesa ebigambo eby’omwoyo.

14 Baitu omuntu ow’omubiri taikiriza* ebintu eby’omwoyo gwa Ruhanga, habwokuba hali uwe by’obudomadoma, kandi tasobora kubimanya habwokuba aine kubyekebiija naakoonyerwa omwoyo ogurukwera. 15 Baitu omuntu ow’eby’omwoyo, ayekebiija ebintu byona, baitu uwe busaho muntu weena ow’amwekebiija. 16 “Nooha amanyire ebiteekerezo bya Yahwe* nukwo asobole kumwegesa?” Baitu twine enteekereza ya Kristo.