Ebbaruha ya Paulo eya Kabiri Hali Abakolinso
13 Gunu nugwo omurundi ogwa kasatu niinyija nambere muli. “Ensonga yoona eraagumibwaga haroho obwakaiso obw’abantu* babiri rundi basatu.” 2 Noobu kiraaba ngu tindi na inywe hati, ninsisana nk’ow’ali na inywe omurundi ogwa kabiri, kandi nimpabura kara abo abaasiisire, n’abandi boona ngu obu ndiija ndibahana, 3 nkooku murukuserra obwakaiso ngu Kristo ow’atali muceke nambere muli baitu w’amaani omuli inywe, nuwe arukubaza kuraba omuli nyowe. 4 Amananu gali, akaitirwa ha muti habw’obuceke, baitu hati mwomeezi habw’amaani ga Ruhanga, nukwo na itwe tuli baceke hamu na uwe, baitu nitwija kwomeera hamu na uwe habw’amaani ga Ruhanga agali omuli inywe.
5 Mwikale nimwekebera kurora obu muraaba muli omu kwikiriza; mwikale nimwerengesa nukwo mumanye kiki kyonyini eki muli. Rundi timukimanyire ngu Yesu Kristo ali omu bumu na inywe? Rundi buli obu muraaba mutarukusiimwa. 6 Amananu gali, ninnihira ngu nimwija kukyetegereza ngu itwe nitusiimwa.
7 Baitu hati, nitusaba Ruhanga ngu mutakora ekintu kyona ekibi, hatali ngu nitugonza kuzooka nkabarukusiimwa, baitu ngu mukole ekirungi, itwe noobu twakuzooka nk’abatarukusiimwa. 8 Habwokuba titurukusobora kukora ekintu kyona ekirukuhakaniza amananu, baitu nitukora ebirukusagika amananu. 9 Mali na itwe tusemererwa obu tuba tuli baceke, baitu inywe muli b’amaani. Kinu nikyo turukusaba ngu na inywe mutereekerezebwe. 10 Enu niyo ensonga habwaki nimbahandiikira ebintu binu obu ndukuba ntali na inywe, nukwo obu ndaija nambere muli ntaba mukaali muno obu ndaaba ninkozesa obusobozi Mukama waitu obu yampaire, kubombeka hatali kuseesa hansi.
11 Eky’okumalirra ab’oruganda, mugumizeemu nimusemererwa, nimutereekerezebwa, nimuhuumuzibwa, mwine enteekereza emu, muli hamu omu businge, kandi Ruhanga ow’okugonza kandi ow’obusinge araikaraga na inywe. 12 Muramukyangane n’okunywegera okurukwera. 13 Abarukwera boona babaramukize.
14 Embabazi enyingi muno eza Mukama waitu Yesu Kristo n’okugonza kwa Ruhanga n’omwoyo ogurukwera itwena ogu turukubagana bibe na inywe.