Ebbaruha ya Paulo Hali Abarooma
2 Nahabweki, koobe muntu wa mulingo ki, toine eky’okwekwasa kyona kakuba ocwera abandi omusango; obu ogubacwera, na iwe wenka oba noogwecwera, habwokuba iwe arukucwa omusango, na iwe nookora ebintu nibyo bimu. 2 Hati tukimanyire ngu abo abakora ebintu nk’ebi Ruhanga abacwera omusango omu mananu.
3 Baitu obu oraaba noocwera omusango abo abarukukora ebintu nk’ebi kandi na iwe noobikora, nooteekereza oraakira omusango gwa Ruhanga? 4 Rundi noogaya obuguuda bw’embabazi ze, n’obukwatampora bwe, n’okugumiisiriza kwe? Tokimanyire ngu, omu mulingo gw’embabazi, Ruhanga naalengaho kukuleetera kwegarukamu? 5 Baitu habw’obutahurra bwawe n’omutima ogutarukwegarukamu, nooyeyahurra ekiniga kandi Ruhanga alikufubira ha kiro ky’ekiniga kye obu alicwa omusango ogw’okuhikirra. 6 Kandi buli omu alimusasura kusigikirra ha bikorwa bye: 7 obwomeezi obutahwaho hali abo abarukuserra ekitiinisa n’emibiri etarukujunda, kandi abagumiisiriza omu kukora ebirungi; 8 baitu hali abo abakungana, n’abatoorobera amananu baitu boorobera obutahikirra, balihikwaho ekiniga kye n’okubiihirwa kwe. 9 Emihito n’obujune birihika ha muntu weena ow’akora ebintu ebibi, kubandiza ha Muyudaaya kandi hanyuma na ha Muyonaani; 10 baitu buli muntu weena ow’akora ebirungi naija kutunga okunyumizibwa, ekitiinisa, n’obusinge, kubandiza ha Muyudaaya, kandi hanyuma na ha Muyonaani. 11 Habwokuba Ruhanga tasoroora.
12 Abo boona abaasiisire hataroho biragiro nibaija kuhwerekerra hataroho biragiro; baitu abo boona abaasiisire bali hansi y’ebiragiro* balicwerwa omusango kusigikirra ha biragiro. 13 Baitu abo abanyakuhurra ebiragiro, tibali nubo abanyakuhikiriire omu maiso ga Ruhanga, baitu abanyakworobera ebiragiro, balyetwa ab’okuhikirra. 14 Habwokuba abantu ab’amahanga abataine biragiro, bakora ebintu ebiri omu biragiro, noobu baraaba batamanyire ebiragiro, ebiragiro ebi biri omu mitima yabo. 15 Nubo bakyolekera kimu ngu ebiragiro ebi bihandiikirwe omu mitima yabo, obu omuntu wabo ow’omunda naabaheera obwakaiso, baitu ebiteekerezo byabo bibajunaana rundi bibaihaho omusango. 16 Kinu kiribaho ha kiro Ruhanga kuraba omu Kristo Yesu, obu alicwera abantu omusango habw’ebintu ebi bakora omu nsita, kusigikirra h’amakuru amarungi aga ndukurangirra.
17 Obu oraaba nooyetwa Omuyudaaya kandi nooyesiga ebiragiro, nooyenyumiriza omuli Ruhanga, 18 kandi omanyire ebi agonza, kandi osiima ebintu ebirukukira oburungi habwokuba okeegesebwa Ebiragiro, 19 kandi nookigumiza kimu ngu nooyebembera abafu b’amaiso, kandi oli kyererezi hali abo abali omu mwirima, 20 omuhabuzi ow’abataine magezi, omwegesa ow’abaana abato, kandi oyetegereza ebintu ebikuru ebirukukwata ha kumanya n’amananu ebiri omu Biragiro— 21 baitu iwe arukwegesa abandi, oyeyegesa? Iwe arukutebeza ngu: “Otaiba,” oiba? 22 Iwe, anyakugamba ngu: “Otalisiihana,” osiihana? Iwe, anyakunuga ebisisani, oiba omu yekaru?* 23 Iwe, ow’arukwesiimisa ebiragiro, ojumisa Ruhanga kuraba omu kucwa Ebiragiro? 24 Habwokuba “ibara lya Ruhanga nirijumwa omu mahanga habwanyu,” nkooku kyahandiikirwe.
25 Ky’amananu ngu okusarwa nikwija kukugasira kakuba ohondera ebiragiro, baitu obu oraaba noocwa ebiragiro, ofookere nk’ow’atakasarwaga. 26 Baitu omuntu ow’atasazirwe kakuba akora ebintu eby’okuhikirra ebirukwetaagisa omu Biragiro, noobu araaba atasazirwe, talibarwa nk’omuntu ow’asazirwe? 27 Kandi omuntu ow’atasazirwe omu omubiri obu ahondera Ebiragiro, acwera omusango iwe arukucwa ebiragiro noobu kiraaba ngu oine ebiragiro omu buhandiiki kandi osazirwe. 28 Habwokuba Omuyudaaya* weenyini tali ogu owa haruguru kandi n’okusarwa kwonyini tikuli oku okwa haruguru, okwa ha mubiri. 29 Baitu Omuyudaaya weenyini nuwe ogu ow’omunda kandi okusarwa kwe nukwo oku okw’omu mutima, kuraba omu mwoyo hatali kuhondera ebiragiro ebihandiikirwe. Omuntu ogu okuhaisanizibwa kwe kuruga hali Ruhanga hatali omu bantu.