Ebbaruha ya Paulo Hali Abefeeso
2 Ekindi, Ruhanga akabafoora boomeezi, noobu kiraaba ngu mukaba mufiire omu kusiisa kwanyu n’omu bibi byanyu, 2 ebi mwagenderamuga kara nimusigikirra ha nteekaniza ey’ebintu ey’ensi* enu, na ha mulemi ow’obusobozi obw’orwoya, omwoyo ogurukukorra hati omu baana entahurra. 3 Mali na itwe obu tukaba tuli omuli bo kara, twahonderaga okwegomba okw’emibiri yaitu, nitukora emibiri yaitu n’ebiteekerezo byaitu ebi byegomba, kandi tukaba tuzairwe tuli baana b’ekiniga nk’abandi boona. 4 Baitu habwokuba Ruhanga muguuda omu mbabazi, habw’engonzi ze enyingi muno ezi yatwolekere, 5 akatufoora boomeezi hamu na Kristo, noobu tukaba tufiire omu kusiisa—habw’embabazi ze enyingi muno,* mujunirwe. 6 Ruhanga akatuhumburra hamu na uwe kandi yatwikaliza hamu omu biikaro eby’omu iguru tuli omu bumu na Kristo Yesu, 7 nukwo omu nteekaniza ey’ebintu* erukwija, asobole kwoleka obuguuda obwingi muno obw’embabazi ze enyingi muno, omu burungi bwe hali itwe abali omu bumu na Kristo Yesu.
8 Habw’embabazi zinu enyingi muno, mujunirwe kuraba omu kwikiriza kandi kinu mutakyekorre inywenka; baitu kiri kisembo kya Ruhanga. 9 Nangwa, kitabeho habw’ebikorwa nukwo omuntu weena atagira eki yasigikirraho kwehaisa. 10 Tuli mulimo ogwakozerwe engaro za Ruhanga kandi tukahangwa tuli omu bumu na Kristo Yesu, nukwo tusobole kukora emirimo enungi Ruhanga ei yatuteekaniriize kara kugirubatiramu.
11 Nahabweki, mwijuke ngu inywe abaazairwe muli bantu ab’amahanga, abo “abasazirwe” n’emikono y’abantu omu mubiri, niinywe baayetaga “abatasazirwe.” 12 Omu kasumi ako, mukaba mutaine Kristo mubaganiziibwe hali ihanga lya Isaleeri, kandi mukaba mutamanyirwe omu biragaano eby’omurago; mukaba mutaine okunihira kandi mutaine Ruhanga omu nsi. 13 Baitu hati, nkooku muli omu bumu na Kristo Yesu, inywe abakaba bali hara muno, mwiriziibwe haihi kuraba omu sagama ya Kristo. 14 Habwokuba nuwe businge bwaitu, ayateeraniize hamu ebitebe bibiri byafooka ekitebe kimu, kandi yahwerekereza ekisiika ekyabibaganizaamuga. 15 Kuraba omu mubiri gwe, akaihaho obunyanzigwa, ebi nibyo Ebiragiro* ebyaragiirwe n’ebyatairweho, nukwo asobole kuteeraniza hamu ebitebe bibiri omu bumu hamu na uwe kuba muntu omu omuhyaka hamu n’okuleetaho obusinge, 16 hamu n’okuteeraniza hamu omu bwijwire abantu bombi omu mubiri gumu hali Ruhanga kuraba omu muti* habwokuba akaihaho obunyanzigwa kuraba omuli uwe. 17 Kandi akaija yarangirra amakuru amarungi ag’obusinge hali inywe abakaba bali hara, n’obusinge hali abo abali haihi, 18 habwokuba kuraba omuli uwe, itwe itwembi twine obugabe obw’okuhika hali Isiitwe kuraba omu mwoyo* gumu.
19 Nahabweki, timukyali bantu abatamanyirwe kandi abanyamahanga, baitu muli baikazi bataahi baitu n’abarukwera kandi muli ab’omu nju ya Ruhanga, 20 kandi mwombekerwe ha musingi ogw’abakwenda na banabbi, kandi Yesu Kristo weenyini nuwe ibaale erya ha nsonda* ery’omusingi. 21 Omuli uwe, ekyombeko kyona kiteeraniziibwe hamu kurungi, nikikura kufooka yekaru ya Yahwe* erukwera. 22 Omuli uwe, na inywe nimwombekwa hamu omu bumu, kufooka ekiikaro kya Ruhanga eky’okwikaramu omu mwoyo.*