Ebikorwa by’Abakwenda
2 Ha kiro eky’Obugenyi bwa Pentekooti,* boona bakaba bali hamu omu kiikaro kimu. 2 Ahonaaho okuhirra kwaruga omu iguru nk’okuhirra okw’ekiyaga eky’amaani, kwaijura enju yoona nambere bakaba baikaliire. 3 Kandi baarora endimi ezirukusisana nk’omurro zayebaganizaamu kandi buli rulimi rwagenda hali buli omu, 4 boona baijura omwoyo ogurukwera kandi baatandika kubaza endimi ezirukwahukana nkooku omwoyo ogurukwera gwabasobozeseze kubaza.
5 Omu kasumi ako, Abayudaaya abaatiinaga Ruhanga kuruga omu mahanga goona agali hansi y’iguru bakaba bali omu Yerusaalemu. 6 Okuhirra obu kwabaireho, ekitebe ky’abantu baayesorooza hamu bahuniriire habwokuba buli omu akahurra abeegeswa nibabaza orulimi rwe. 7 Mali bakahunirra muno, baagamba bati: “Banu boona abali hanu nibabaza, tibali Banyagaliraaya? 8 Nikisoboka kita ngu buli omu hali itwe naahurra nibabaza orulimi rwe orw’enzaarwa? 9 Abapaazi, Abameedi, Aberamiti, n’abaikazi ba Mesopotamiya, Buyudaaya, Kapadokiya, Ponto, n’ab’omu isaza lya Asiya, 10 Furugiya, Pamufuliya, Misiri, n’ebicweka bya Libbiya haihi na Kulene, hamu n’abagenyi kuruga Rooma, Abayudaaya, n’abahinduki, 11 Abakulete hamu n’Abaharabbu—nituhurra nibabaza omu ndimi zaitu ha bintu bya Ruhanga eby’amaani.” 12 Boona baahunirra baatiina, baagambirangana bati: “Kinu nikimanyisa ki?” 13 Baitu abandi baabasekeereza, nibagamba bati: “Batamiire amaarwa agarukunulirra.”*
14 Petero hamu n’abandi ikumi n’omu, baayemerra baababaliza omu iraka erya haiguru bati: “Basaija inywe aba Buyudaaya, n’abaikazi aba Yerusaalemu, mumanye kinu kandi muhuliirize n’obwegendereza ebigambo byange. 15 Abantu banu tibatamiire nkooku murukuteekereza, habwokuba ziri saaha isatu eza nyenkyakara.* 16 Baitu kinu nikyo kyagambirwe kuraba omu nabbi Yoweri ati: 17 ‘“Kandi omu biro ebya ha mpero,” agambire Ruhanga, “Ndiseesa omwoyo gwange h’abantu aba buli mulingo kandi batabani banyu n’abahara banyu baliranga obunabbi, n’abasigazi banyu balirora okwolekwa, n’abagurusi banyu baliroota ebirooto, 18 kandi na h’abairu bange abasaija n’abakazi ndibaseesaho omwoyo gwange omu biro ebi, kandi baliranga obunabbi. 19 Ndikora ebirukuhuniiriza omu iguru n’obwokurorraho omu nsi—esagama, omurro, n’omwika. 20 Izooba lirifooka omwirima, n’okwezi kufooke esagama, ekiro kya Yahwe* ekikuru kandi eky’ekitiinisa kitakahikire. 21 Kandi ogu weena ow’akunga ibara lya Yahwe,* alijunwa.”’
22 “Abasaija aba Isaleeri, muhurre ebigambo binu: Ruhanga akakiboolekera kimu ngu akatuma Yesu Omunyanazaleesi kandi kuraba omuli uwe, akakora ebyamahano, ebirukuhuniiriza n’obwokurorraho hagati omuli inywe nkooku na inywe mumanyire. 23 Omusaija onu, akaheebwayo kusigikirra nkooku Ruhanga akaba acwiremu, kandi akaba akimanyire kitakabaireho, mukamuterra emisumaali ha muti nimukozesa abasaija enkozi z’ebibi, kandi mwamwita. 24 Baitu Ruhanga akamuhumbuura naamwiha omu busaasi obw’okufa, habwokuba kikaba kitarukusoboka uwe kwikara akwatiirwe omu kufa. 25 Habwokuba Daudi naamubazaaho ati: ‘Nyikaza Yahwe* omu maiso gange obwire bwona, habwokuba ali ha mukono gwange ogw’obulyo nukwo ntalitengesebwa. 26 Habw’ensonga egi, omutima gwange gukakyanganuka, n’orulimi rwange rwasemererwa muno. Kandi ndiikara omu kunihira; 27 habwokuba tolindeka omu Kituuro* noobu kwakuba kuleka omwesigwa waawe kujunda. 28 Ommanyisize emihanda ey’obwomeezi, kandi olinyijuza okusemererwa okw’amaani ndi omu maiso gaawe.’
29 “Basaija inywe, ab’oruganda, nikiikirizibwa kubaza na inywe ebirukukwata hali isenkuruitwe Daudi ntarukutiina, nkooku yafiire kandi yaziikwa, kandi ekituuro kye kiri hanu kuhikya n’akasumi kanu. 30 Habwokuba akaba ali nabbi kandi akaba akimanyire ngu Ruhanga amurahiriire ngu aliikaliza omu h’ab’oruzaaro rwe* ha kitebe kye eky’obukama, 31 akamanya ebiribaho kandi yabazaaho okuhumbuuka kwa Kristo, ngu talirekwa omu Kituuro* noobu kwakuba omubiri gwe kujunda. 32 Ruhanga akahumbuura Yesu ogu, kandi kinu itwena nitukiheera obwakaiso. 33 Nahabweki, habwokuba akanyumizibwa ha mukono ogw’obulyo ogwa Ruhanga, kandi yatunga omwoyo ogurukwera ogwaraganiziibwe kuruga hali Ise, atuseesereho omwoyo ogu murukurora kandi ogu murukuhurra. 34 Daudi atagende omu iguru, baitu uwe weenyini naagamba ati: ‘Yahwe* akagambira Mukama wange ati: “Ikarra ha mukono gwange ogw’obulyo 35 kuhikya obu ndifoora abanyanzigwa baawe nk’akatebe ak’ebigere byawe.”’ 36 Nahabweki, leka enju ya Isaleeri yoona ekimanye ngu Yesu onu, ou mwaitiire ha muti, Ruhanga akamufoora Mukama waitu kandi Kristo.”
37 Obu baahuliire eki, baacumitwa ha mutima kandi baagambira Petero n’abakwenda abandi bati: “Basaija inywe, ab’oruganda, tukole ki?” 38 Petero yabagambira ati: “Mwegarukemu, kandi buli omu hali inywe abatizibwe omu ibara lya Yesu Kristo nukwo musobole kuganyirwa ebibi byanyu, kandi nimwija kutunga ekisembo eky’omwoyo ogurukwera. 39 Habwokuba omurago gunu gwanyu, n’abaana banyu, n’abo boona abali hara, hamu n’abo boona Yahwe* Ruhanga waitu abaalyeta kwija nambere ali.” 40 Kandi Petero yabaza ebigambo ebindi bingi naaha obwakaiso omu bwijwire kandi yaikara naabateererra naagamba ati: “Mwecweho obusinge bunu oburamaire, nukwo mutahwerekerezebwa.” 41 Abo boona abaikiriize ekigambo kye n’okusemererwa baabatizibwa, kandi ha kiro eki, abantu nka 3,000 baabeeteeranizaaho. 42 Kandi baagumizaamu nibateeka omutima ha nyegesa z’abakwenda, nibaba hamu,* nibaliira hamu, kandi nibasabira hamu.
43 Abantu boona baatandika kutiina, kandi abakwenda baakora ebyamahano bingi, n’obwokurorraho bwingi. 44 Kandi abo boona abaikiriize bakaba bali hamu, baabaganaga ebintu byabo byona ebi bakaba baine, 45 baatundaga ebintu byabo n’amataka gaabo, kandi sente ezaarugamuga baazibaganaga kusigikirra ha bwetaago bwa buli omu. 46 Kandi buli kiro baasorrokanaga omu yekaru baine ekigendererwa kimu, nibaliira hamu ebiihuro omu maka agarukwahukana, kandi baabaganaga ebyokulya byabo n’okusemererwa kwingi baihire ha mutima, 47 nibakugiza Ruhanga kandi nibasiimwa abantu boona. Kandi buli kiro, Yahwe* akaikara naabongeraho abantu abaajunwaga.