Ebikorwa by’Abakwenda
22 “Basaija inywe, ab’oruganda, bataata, muhurre okwetonganaho kwange hati.” 2 Obu baahuliire naabaza na bo omu Ruhebburaniya, boona baaculeera kandi yagamba ati: 3 “Ndi Muyudaaya, enzaarwa ya Taruso eya Kirikiya kandi nkegesebwa Gamalyeri omu rubuga runu, nayegesebwa kukwatira kimu Ebiragiro* byona ebya baisenkuruitwe, kandi nayekambaga kuheereza Ruhanga nkooku na inywe muli hati. 4 Nkahiiganiza abo abarukuhondera Omuhanda gunu, nabohaga abasaija n’abakazi nimbahayo omu nkomo, 5 kandi nyakatagara omukuru* n’orukurato rwona orw’abakuru b’abantu, nibasobora kumpeera obwakaiso. Kandi kuruga hali bo, nkatunga ebbaruha nzitwarre ab’oruganda omu Damasiko, kandi nkaba ndi omu muhanda ningenda kukwata ab’oku mbaleete omu Yerusaalemu baboherwe, nukwo bafubirwe.
6 “Baitu obu nkaba ningenda ndi haihi kuhika Damasiko, nk’omu ihangwe, ahonaaho ekyererezi eky’amaani kuruga omu iguru kyanyehinguliriza, 7 nagwa hansi kandi nahurra iraka niringambira liti: ‘Saulo, Saulo, habwaki nompiiganiza?’ 8 Nagarukamu nti: ‘Niiwe oha Mukama wange?’ Kandi yangambira ati: ‘Niinyowe Yesu Omunyanazaleesi ou oliyo noohiiganiza.’ 9 Nubwo abasaija abakaba bali na nyowe baarora ekyererezi baitu batahurre iraka ly’ogu ow’akaba naabaza na nyowe. 10 Nubwo nakaguza nti: ‘Mukama wange, kiki eki nsemeriire kukora?’ Mukama waitu, yangambira ati: ‘Imuka, ogende Damasiko kandi oku nuho oraamanyisibwa ebintu byona ebi osemeriire kukora.’ 11 Baitu nkooku nkaba ntasobora kurora ekintu kyona habw’ekitiinisa eky’ekyererezi eki, nkahika Damasiko nyebembiirwe abantu abakaba bali na nyowe, bankwasire ha mukono.
12 “Hanyuma omusaija arukwetwa Ananiya, ayatiinaga Ruhanga kusigikirra ha Biragiro, ayabazibwahoga kurungi Abayudaaya boona abarukwikarayo, 13 yaija nambere ndi. Yayemerra nambere ndi, yangambira ati: ‘Ow’oruganda Saulo, iguka amaiso.’ Kandi omu kaire ako, nkarora haiguru naamurora. 14 Yagamba ati: ‘Ruhanga owa baisenkuruitwe akukomere kumanya ebi agonza, kurora ow’ahikiriire, n’okuhurra iraka kuruga omu kanwa ke, 15 habwokuba noija kumuheera obwakaiso hali abantu boona habw’ebintu ebi orozere kandi wahurra. 16 Kandi hati habwaki nookeerererwa, imuka obatizibwe oyeyogyeho ebibi byawe kuraba omu kweta ibara lye.’
17 “Baitu obu nkaba ngarukire Yerusaalemu ninsaba omu yekaru, nkatunga okwolekwa, 18 namurora nangambira ati: ‘Rahuka oruge omu Yerusaalemu habwokuba tibarukwija kwikiriza obwakaiso oburukunkwataho.’ 19 Kandi nagamba nti: “Mukama wange, bo bakimanyire kurungi ngu nabohaga abo abarukukwikiriza, n’okubaterra omu masorrokaniro agarukwahukana; 20 kandi esagama ya Sitefano kaiso waawe obu ekaba neeseeswa, nkaba ndoho nyemeriire, ninsagika ekikorwa eki kandi ndinzire ebijwaro ebya haruguru eby’abo abakaba nibamwita.’ 21 Kandi yangambira ati: ‘Genda habwokuba ndikutuma omu mahanga agali hara.’”
22 Baikara nibamuhuliiriza kandi hanyuma y’okubaza ebigambo ebi, baatokera haiguru nibagamba bati: “Omusaija ogu mumwite, habwokuba tasemeriire kuba mwomeezi!” 23 Habwokuba bakaba nibatokera haiguru, nibanaga ebijwaro byabo ebya haruguru kandi nibamiisa ecuucu omu mwanya, 24 omuduumizi w’amahe yaragira batwale Paulo omu nkambi y’abaserikale, bamukaguliirize nibamuteera kibboko nukwo amanye ensonga habwaki abantu baikaire nibatoka habwa Paulo. 25 Obu baamazire kumuboha nibagenda kumuteera, Paulo yagambira mukuru w’amahe ow’akaba ayemeriire aho ati: “Kihikire omu biragiro iwe kuteera Omurooma* atakacweriirwe omusango?”* 26 Mukuru w’ihe obu yakihuliire, yagenda hali omuduumizi w’amahe yakimugambira, naagamba ati: “Noogenda kukora ki? Habwokuba omusaija onu, Murooma.” 27 Nubwo omuduumizi w’amahe yagenda nambere ali, yamukaguza ati: “Ngambira, oli Murooma?” Paulo yamugarukamu ati: “Ego.” 28 Omuduumizi w’amahe yamugambira ati: “Nyowe kutunga obwikazi omu Rooma, nkasasura sente nyingi muno.” Paulo yagamba ati: “Baitu nyowe nkazaarwa ndi Murooma.”
29 Ahonaaho abasaija abakaba bali haihi kumukaguliiriza nibamuteera, baamuleka; kandi omuduumizi w’amahe yatiina, obu yakimanyire ngu Paulo akaba ali Murooma kandi ngu akaba amubohere n’enjegere.
30 Ekiro ekyahondiireho, habwokuba akaba naagonza kumanya ensonga yonyini habwaki Abayudaaya bakaba nibamujunaana, yamusumurra kandi yaragira bakuru ba banyakatagara* na boona abali omu Rukurato Orukuru* kwesorooza hamu. Hanyuma yaleeta Paulo yamwemereza hagati yabo.