Ebbaruha ya Paulo Hali Abagaratiya
5 Kusobora kutunga obugabe obu, Kristo akatufoora b’obugabe. Nahabweki, mwemerre mugume kandi mutaikiriza kwongera kuboherwa omu kikoligo ky’obwiru.
2 Dora! Nyowe, Paulo nimbagambira nti, kakuba musarwa,* Kristo naija kuba atakyabagasira. 3 Niinyongera nimpeera obwakaiso omuntu weena ow’asarwa ngu, asemeriire kworobera Ebiragiro* byona. 4 Mwecwireho Kristo, inywe abarukulengaho kweyeta ab’okuhikirra kuraba omu biragiro; murugire omu mbabazi ze enyingi muno. 5 Baitu itwe, abarukwebemberwa omwoyo n’ekihika tulindiriire okuhikirra okwanihiziibwe okurukuruga omu kuba n’okwikiriza. 6 Omu Kristo Yesu, okusarwa n’okutasarwa tikiine mugaso gwona, baitu okwikiriza okurukukorra omu kugonza nikyo kikuru.
7 Mukaba nimwiruka kurungi. Nooha ayabatangire kugumizaamu nimworobera amananu? 8 Okusoonasoona kwona okwa mulingo gunu, tikukuruga hali Ogu arukubeeta. 9 Ekitumbisa ekike, kitumbisa entonge enkooto yoona ey’ensaano ey’ekanzirwe. 10 Ninkigumiza kimu ngu inywe abali omu bumu na Mukama waitu, timurukwija kuteekereza kundi; baitu ogu arukubatalibaniza k’abe oha, naija kucwerwa omusango ogumusemeriire. 11 Baitu nyowe, ab’oruganda, obu ndaaba ninkyatebeza ha kusarwa, habwaki ninkyahiiganizibwa? Obu kiraaba nukwo kiri kiti, ekitabaijura eky’omuti,* kiihirweho. 12 Naakugondeze abantu abarukulengaho kubaburanganiza beekone bonka.*
13 Ab’oruganda mukeetwa hali obugabe, mutakozesa obugabe bunu nk’omugisa ogw’okuhondera okwegomba kwanyu kw’omubiri, baitu kuraba omu kugonza, muheerezangane. 14 Habwokuba Ebiragiro byona, bihikiiriziibwe* omu kiragiro kinu kimu, “Osemeriire kugonza mutaahi waawe nkooku oyegonza wenka.” 15 Baitu obu muraikara nimunenangana kandi nimutaagurangana, mwerinde mutahwerekerezangana.
16 Baitu nimbagambira nti, mwikale nimurubatira omu mwoyo kandi timulikora okwegomba kwona okw’omubiri. 17 Habwokuba omubiri gurwanisa omwoyo omu kwegomba kwagwo, n’omwoyo nagwo gurwanisa omubiri; binu bihakanizangana nukwo mutakora ebintu byonyini ebi murukugonza kukora. 18 Kandi obu muraaba nimwebemberwa omwoyo, timuli hansi y’ebiragiro.
19 Hati, ebikorwa eby’omubiri nibirolerwa kimu kandi nibyo binu, obusiihani,* okutasemera, engeso ezijunzire,* 20 okuramya ebisisani, oburaguzi,* enobi, okukungana, ihali, ekiniga, okuteera empaka, okwebaganizaamu, okwecwamucwamu obutebe, 21 itima, obutamiizi, amagenyi agarumu akajagarro, hamu n’ebintu ebirukusisana nk’ebi. Nimbahabura kara ha bintu ebi, nkooku nkaba nsangirwe mbahabwire ngu, abo abakora ebintu nka binu, tibaligwetwa Obukama bwa Ruhanga.
22 Harubaju orundi, ebiri omu kyana ky’omwoyo nibyo binu, okugonza, okusemererwa, obusinge, okugumiisiriza, embabazi, oburungi, okwikiriza, 23 obuculeezi hamu n’okwetanga. Obukirukuhika ha bintu nka binu, busaho kiragiro. 24 Ekindi, abo abali ba Kristo Yesu, omubiri gwabo n’okwegomba kwabo babiteeriire emisumaali ha muti.
25 Obu turaaba nitwomeera habw’omwoyo, leka tugumizeemu niturubata kurungi habw’omwoyo. 26 Tuleke kwetwara nk’abarukukira abandi, tutaleetaho kugonza kukirangana, tutakwatirwangana ihali.