Ebbaruha ya Paulo eya Kabiri Hali Abasesalonika

1 Nyowe Paulo, ndi na Sirwano,* hamu na Timoseo, nimpandiikira ab’omu kitebe kya Sesalonika abali omu bumu na Ruhanga Isiitwe hamu na Mukama waitu Yesu Kristo:

2 Embabazi enyingi muno* n’obusinge kuruga hali Isiitwe na Mukama waitu Yesu Kristo zibe na inywe.

3 Ab’oruganda, butoosa tuhurra twine kusiima Ruhanga habwanyu. Kinu nukwo kisemeriire, habwokuba okwikiriza kwanyu nikweyongerra kimu kandi n’okugonza buli omu oku ainiire mutaahi we nikweyongera. 4 Ekirugiremu, nitubeesiimisa omu bitebe bya Ruhanga habw’okugumiisiriza kwanyu n’okwikiriza omu kuhiiganizibwa kwanyu kwona n’omu mitalibaine* ei murukurabamu. 5 Bunu bwakaiso oburukwoleka ngu Ruhanga acwa emisango ey’okuhikirra, kinu kibarugiiremu kubarwa nk’abasemeriire Obukama bwa Ruhanga, kandi niyo ensonga habwaki nimubonabona.

6 Kinu ky’okuhikirra hali Ruhanga kufubira abo abarukubabonabonesa. 7 Baitu inywe abarukuraba omu mihito, nimwija kuhuumuzibwa hamu na itwe ha kusuukururwa kwa Mukama waitu Yesu kuruga omu iguru, ali hamu na bamalaika be ab’amaani 8 omu murro ogurukwaka, obu naahoora enzigu hali abo abatamanyire Ruhanga, hamu n’abo abatarukworobera amakuru amarungi agarukukwata hali Mukama waitu Yesu. 9 Banu bonyini baliheebwa ekifubiro eky’okuhwerekerra ebiro n’ebiro baihwe omu maiso ga Mukama waitu n’omu kitiinisa eky’amaani ge, 10 omu kasumi obu aliija kunyumizibwa ali hamu n’abarukwera be, kandi ha kiro eki, abo boona abaliba baine okwikiriza balihunirra habwokuba mukaikiriza obwakaiso obu twabahaire.

11 Enu niyo ensonga habwaki twikara nitubasabira, Ruhanga abarole nk’abasemeriire okwetwa kwe, kandi habw’amaani ge, akorre kimu buli kintu kyona ekirukumusemeza nukwo amaliirize ebi mubaire nimukora habw’okwikiriza kwanyu. 12 Kinu kiri kiti, nukwo ibara lya Mukama waitu Yesu linyumizibwe omuli inywe, kandi na inywe muli omu bumu na uwe, kusigikirra ha mbabazi enyingi muno eza Ruhanga waitu hamu na Mukama waitu Yesu Kristo.