Ebbaruha ya Paulo Hali Abarooma
1 Nyowe, Paulo, omwiru wa Kristo Yesu, ayayeserwe kuba omukwenda, ayakomerwemu kurangirra amakuru amarungi aga Ruhanga, 2 agayaraganiize ira kuraba omu banabbi n’Ebyahandiikirwe ebirukwera, 3 kandi agarukukwata ha Mwana we, ayazairwe omu nsi nk’oruzaaro rwa* Daudi, 4 kuraba omu maani g’omwoyo ogurukwera yahumbuurwa kuruga omu bafu kandi kinu kyayoleka ngu akaba ali Mwana wa Ruhanga kandi ogu nuwe Yesu Kristo Mukama waitu. 5 Kuraba omuli uwe tukatunga embabazi enyingi muno kandi twayetwa kuba abakwenda n’ekigendererwa eky’amahanga goona okuba mahulizi habw’okumwikiririzaamu, kandi eki, nikihaisa ibara lye ekitiinisa. 6 Na inywe mukeetwa kuruga omu mahanga ago, kuba bantu ba Yesu Kristo— 7 nimpandiikira abo boona abali omu Rooma, Ruhanga abaarukugonza muno kandi abeeserwe kuba abarukwera:
Embabazi enyingi muno n’obusinge ebiruga hali Ruhanga Isiitwe, hamu na Mukama waitu Yesu Kristo biikale na inywe.
8 Eky’okubanza, ninsiima Ruhanga wange kuraba omu Yesu Kristo habwanyu inywena, habwokuba okwikiriza kwanyu nikubazibwaho omu nsi yoona. 9 Ruhanga ou mpeereza n’omutima gwange gwona, obu nintebeza amakuru amarungi agarukukwata ha Mwana we, nampeera obwakaiso ngu butoosa mbabazaaho omu saara zange, 10 ninyesengereza ngu obu kiraaba nikisoboka haakire nyije nambere muli, Ruhanga obu araaba agondeze. 11 Nyine ekihika eky’amaani eky’okubarora nukwo nsobole kubaha ekisembo eky’eby’omwoyo nukwo mugumibwe; 12 rundi musobole kungarramu amaani habw’okwikiriza kwanyu, na nyowe nsobole kubagarramu amaani kuraba omu kwikiriza kwange.
13 Baitu ab’oruganda, ningonza mukimanye ngu emirundi nyingi nkagonza kwija nambere muli nukwo nsobole kutunga bimu ha byana kuruga omuli inywe, nkooku nabitungire kuruga omu mahanga agandi, baitu n’okuhikya hati nkyalemesiibwe. 14 Abayonaani n’abamahanga agandi,* abeegesiibwe, n’abateegesiibwe boona nibambanja; 15 nahabweki, nyina ekihika eky’amaani eky’okubatebeza amakuru amarungi na inywe abali omu Rooma. 16 Habwokuba tindukukwatwa ensoni habw’amakuru amarungi, habwokuba guli mulingo Ruhanga ogu akozesa kuleetera abo boona abarukwikiriza kujunwa, kutandikira h’Abayudaaya kandi hanyuma na h’Abayonaani. 17 Habwokuba kuraba omu makuru amarungi, okuhikirra kwa Ruhanga nikweyoleka hali abo abooleka okwikiriza kandi kinu kigumya okwikiriza kwabo, nkooku kyahandiikirwe kiti: “Baitu omuntu ow’okuhikirra, alyomeera habw’okwikiriza.”
18 Ruhanga naayoleka ekiniga kye kuruga omu iguru hali abo boona abatarukumutiina, n’abatali b’okuhikirra abakora ebintu ebitali by’okuhikirra kulemesa abantu kumanya amananu, 19 habwokuba ebisobora kuba bimanyirwe hali Ruhanga, nibyeyolekera kimu omuli bo, habwokuba Ruhanga akabiboolekera kimu. 20 Habwokuba emiringo ye etarukurorwa, amaani ge agatahwaho, n’Obwaruhanga bwe, nibirolerwa kimu kuruga ensi ehangwa omuli ebi ebyahangirwe, nukwo batagira ekintu kyona eky’okwekwasa. 21 Noobu kiraaba ngu bakaba bamanyire Ruhanga, batamukugize nka Ruhanga noobu kwakuba okumusiima, baitu bakateekereza ebitarumu kandi emitima yabo ey’obudomadoma yaijura omwirima. 22 Noobu kiraaba ngu bakaba nibeeyeta ab’amagezi, bakafooka badomadoma 23 kandi omu kiikaro ky’okukugiza Ruhanga ow’atasobora kufa, baakugiza ebisisani ebirukusisana abantu abafa, ebinyonyi, ebisoro eby’amaguru ana, hamu n’ebyekurra.
24 Nahabweki, habwokuba bakaba nibagonza kuhondera okwegomba okw’emitima yabo, Ruhanga akabaleka bakole ebintu ebitasemiire, nukwo emibiri yabo esobole kuswazibwa omuli bo. 25 Bakahingisa amananu ga Ruhanga, omu kiikaro kyago baatamu ebisuba, baaramya kandi baaheereza ebyahangirwe omu kiikaro ky’Omuhangi, ow’akugizibwa ebiro n’ebiro. Amiina.* 26 Egi niyo ensonga habwaki Ruhanga yabahaireyo hali okwegomba okw’okuteerana okurukuswaza, habwokuba abakazi baabo bakahindura emibiri yabo baagikozesa eki etarahangiirwe kukora, 27 n’abasaija baaleka ekikorwa eky’obuhangwa eky’okuteerana n’abakazi, baatunga okwegomba okw’amaani okw’okuteerana n’abasaija bataahi baabo, nibakora ebirukuhemura, baatunga omu bwijwire ekifubiro ekisemeriire okusiisa kwabo.
28 Habwokuba batagonze kumanya Ruhanga, Ruhanga akabaleka kuba n’enteekereza ei atarukusiima, nukwo bakole ebintu ebitasemeriire. 29 Kandi bakaba baijwire okutahikirra okwa buli mulingo, obubi, omururu,* engeso embi, baijwire itima, obwisi, enkungani, ebisuba, enobi, orugambo,* 30 abarukugeya, abanoba Ruhanga, ab’emyehembo, abeekuliiriza, abakora enteekaniza ez’okukora ebibi,* abatarukuhurra abazaire, 31 abatarukwetegereza, abatarukuhikiiriza ebi baraganiize, abatagonzangana, kandi abataine embabazi. 32 Banu noobu baraaba bamanyire kurungi ekiragiro kya Ruhanga eky’okuhikirra—ngu abarukukora ebintu nk’ebi basemeriire kufa—tibagarukira ha kwikara nibabikora kyonka, baitu basagika n’abo abarukubikora.