Ebbaruha ya Paulo Hali Abakolosai
2 Ningonza mumanye emitalibaine ey’amaani ei ndukurabamu habwanyu, hamu n’abo abali omu Laodikiya na habw’abo boona abatakandozere.* 2 Kinu kiri kiti nukwo emitima yabo esobole kuhuumuzibwa kandi basobole kuteeranizibwa hamu omu kugonza kandi basobole kutunga obuguuda bwona oburuga omu kwetegerereza kimu, nukwo batunge okumanya okuhikire okw’ensita erukwera* eya Ruhanga kandi ensita egi, nuwe Kristo. 3 Omuli uwe nuho haserekerwe eby’obuguuda byona eby’amagezi n’okumanya. 4 Nimbagambira kinu nukwo hatabaho omuntu weena ayabahabisa naakozesa ebigambo ebirukusoonasoona. 5 Noobu kiraaba ngu tindi na inywe omu mubiri, ndi na inywe omu mwoyo, kandi ninsemererwa kurora enteekaniza yanyu enungi, n’okwikiriza kwanyu okugumire omu Kristo.
6 Nahabweki, nkooku mwikiriize Kristo Yesu Mukama waitu, mugumizeemu nimugendera omu bumu na uwe, 7 muhamire kandi mwombekerwe omuli uwe, mutarukutengesebwa omu kwikiriza nkooku mwayegesiibwe kandi musaagaane omu kusiima.
8 Mwerinde hatabaho muntu weena ayabafoora bairu naakozesa ebifirosoofa n’ebisuba ebitarumu naasigikirra ha migenzo y’abantu, n’ebintu eby’omu nsi eby’okubandizaaho, hatali kusigikirra hali Kristo; 9 habwokuba emiringo ya Ruhanga yoona eri omuli uwe omu bwijwire. 10 Nahabweki mwine buli kimu kyona kuraba omuli uwe, ogu nuwe omutwe ogw’obulemi bwona hamu n’obusobozi bwona. 11 Habw’enkoragana ei mwine na uwe, na inywe mukasarwa mutarukusarwa n’emikono mwaihwaho omubiri ogw’enyama, baitu mukatunga okusarwa* kwa Kristo. 12 Habwokuba mukaziikwa hamu na uwe omu kubatizibwa kwe, kandi habw’enkoragana ei mwine hamu na uwe, na inywe mukahumbuurwa hamu na uwe kuraba omu kwikiririza omu mirimo ya Ruhanga ey’amaani, ayamuhumbwire kuruga omu bafu.
13 Ekindi, noobu kiraaba ngu mukaba mufiire omu bibi byanyu n’omu kutasarwa kwanyu okw’omubiri, Ruhanga akabafoora boomeezi hamu na uwe. Akatugirra embabazi yatuganyira ebibi byaitu byona 14 kandi akaihaho* endagaano eyahandiikirwe ey’ekaba erumu ebiragiro* kandi ekaba eri munyanzigwa waitu. Akagiihaho kuraba omu kugiterra emisumaali ha muti.* 15 Akasingura obulemi n’obusobozi kandi yabyoleka omu rwijwire nk’ebisingwirwe, naabyebembera omu kitebe eky’abasinguzi kuraba omu muti.*
16 Nahabweki, mutaikiriza omuntu weena kubacwera omusango habw’ebi murukulya n’ebi murukunywa, rundi obukirukuhika ha kujaguza obugenyi rundi kujaguza okuboneka okw’okwezi, rundi Sabbiiti.* 17 Ebintu ebi kiituuru ky’ebintu ebirukugenda okwija, baitu ekintu kyonyini nuwe Kristo. 18 Mutaikiriza omuntu weena arukusemerererwa obwebundaazi obw’ebisuba hamu n’okuramya bamalaika, kubalemesa kutunga ekisembo. Habwokuba omuntu nk’ogu “agumira” ha bintu ebi aba arozere. Ayetwara kuba wa haiguru hataroho nsonga ey’ehikire ei arukusigikirraho habw’enteekereza ye ey’omubiri, 19 kandi tagumira ha mutwe, hali ogu omubiri gwona nambere gutungira ebi gurukwetaaga kandi niguteeranizibwa hamu engiga n’ebinywa kandi nigweyongera kukura, nigukuzibwa Ruhanga.
20 Obu muraaba mwafiire hamu na Kristo, obukirukuhika ha bintu eby’okubandizaaho eby’omu nsi, habwaki nimutwaza obwomeezi bwanyu nk’abakyali kicweka ky’ensi, nimuhondera ebiragiro ebirukugamba biti: 21 “Otatwara rundi otaroza, rundi otakwata,” 22 kumanyisa ebintu ebiraahwerekerra hanyuma y’okukozesebwa kusigikirra ha biragiro n’enyegesa z’abantu? 23 Ebiragiro binu nibizooka nk’ebirukuha amagezi, baitu tibirukukoonyera abantu kwangirra okwegomba kwabo okw’omubiri. Kinu kibaho habwokuba abantu beecweramu bonka omulingo baraaramyamu Ruhanga, beefoora abarukwebundaaza baitu baleetera emibiri yabo kubonabona.