Ebbaruha ya Paulo Hali Abarooma
9 Nimbaza amananu omu Kristo; tindukubiiha ebisuba, habwokuba omuntu wange ow’omunda nampeera obwakaiso omu mwoyo ogurukwera, 2 ngu nyine obujune bw’amaani n’okusaasa okw’omu mutima okutarukuhwaho. 3 Habwokuba nyowe naakugondeze nyebaganize hali Kristo nk’ogu ow’akyenerwe habw’abagenzi bange kandi abanyabuzaale bange kusigikirra ha mubiri, 4 abo nubo Abaisaleeri. Nubo Ruhanga yafoire abaana be, baaheebwa ekitiinisa, ebiragaano, Ebiragiro,* obuheereza oburukwera, n’emirago. 5 Nubo baijukuru ba baisenkuruitwe, kandi omuli bo nuho haarugire Kristo kusigikirra ha mubiri. Ruhanga, anyakuli haiguru ya byona, akugizibwe ebiro n’ebiro. Amiina.
6 Baitu eki tikirukumanyisa ngu ekigambo kya Ruhanga kiremere kuhikirra. Habwokuba tikiri ngu boona abaarugire omu Isaleeri* bali “Baisaleeri” kwo. 7 Noobu kiraaba ngu bali ruzaaro rwa* Ibburahimu, tikirukumanyisa ngu boona baana be kwo; baitu kikahandiikwa kiti: “Ogu alyetwa oruzaaro rwawe* aliraba omu Isaka.” 8 Eki nikimanyisa ngu abaana ba Ibburahimu ab’omubiri tibali baana ba Ruhanga bonyini, baitu abaana abaazairwe kusigikirra ha murago nubo babarwa nk’oruzaaro rwe.* 9 Habwokuba omurago gukaba nigugamba guti: “Ndiija obwire nka bunu kandi Saara aliba azaire omwana omwojo.” 10 Tikiri eki kyonka, baitu na Rebbeka obu yatwaire enda y’abarongo kuruga ha musaija omu, Isenkuruitwe Isaka, 11 obu bakaba batakazairwe kandi batakakozere ekintu kyona ekirungi rundi ekibi, ekigendererwa kya Ruhanga ekirukukwata ha kukoma kurora ngu kyagumizaamu kitarukusigikirra ha bikorwa, baitu hali Ogu arukweta, 12 Rebbeka akagambirwa ati: “Omukuru aliba mwiru w’omuto.” 13 Nkooku kyahandiikirwe kiti: “Nkagonza Yakobbo, baitu Esau namunoba.”
14 Hati tugambe ki? Tugambe ngu Ruhanga tali w’obwinganiza? Nangwa! 15 Habwokuba akagambira Musa ati: “Ndyoleka embabazi weena ou ndigonza kuzooleka, ndisaalirirwa weena ou ndigonza kusaalirirwa.” 16 Nahabweki tikisigikirra ha kugonza kw’omuntu rundi amaani omuntu agaatamu,* baitu kisigikirra hali Ruhanga, anyakwine embabazi. 17 Omu byahandiikirwe, Ruhanga agambira Faraaho* ati: “Enu niyo ensonga habwaki nkulekereho, nukwo nsobole kwoleka amaani gange kuraba omuli iwe kandi n’ibara lyange lisobole kurangirirwa omu nsi yoona.” 18 Nahabweki ayoleka embabazi ogu weena ou agonza, baitu aleka weena ou agonza kugumangana.
19 Nahabweki noija kungambira oti: “Habwaki naakyajunaana abantu? Nooha asobora kumutanga kukora eki arukugonza?” 20 Baitu mali muntu iwe, niiwe oha kujunaana Ruhanga? Ekintu ekibumbirwe nikisobora kukaguza ayakibumbire kiti: “Habwaki wambumbire oti?” 21 Mali eki nikisoboka? Omubumbi* taine obusobozi ha ibumba, ngu omu ntonge emu ey’ibumba naasobora kukoramu ekibindi eky’ekitiinisa n’ekindi ekitali ky’ekitiinisa? 22 Noobu kiraaba ngu Ruhanga akagonza kwoleka ekiniga kye n’okumanyisa amaani ge, akagumiisiriza muno ebibindi eby’ekiniga ebikaba bisemeriire kuhwerekerezebwa. 23 Kandi kinu akakikora nukwo asobole kumanyisa ekitiinisa kye ekingi muno hali ebibindi by’embabazi ebi yateekaniriize ira kuheebwa ekitiinisa, 24 kandi ebibindi ebi, niitwe, aba yayesere, hatali kuruga omu Bayudaaya bonka baitu n’omu b’amahanga. 25 Kiri nkooku yayongiire yagamba omu Hoseya ati: “Abo abatali bantu bange ndibeeta ‘abantu bange,’ kandi n’omukazi ow’akaba atarukugonzebwa ndimweta ‘omugonzebwa’; 26 kandi omu kiikaro nambere baagambiirwe ngu: ‘Timuli bantu bange,’ oku balyetwa ‘abaana ba Ruhanga omwomeezi.’”
27 Ekindi, Isaaya atokera omu iraka erya haiguru naabazaaho Isaleeri ati: “Omuhendo gwa Isaleeri noobu gwakwingana omusenyi gwa ha nyanja, halisigaraho bake abalijunwa. 28 Habwokuba Yahwe* alicwa omusango, agumaliirize kandi alikikora omu bwangu.” 29 Kandi nkooku Isaaya yarangire ati: “Kakuba Yahwe* ow’amahe ataratusigiire oruzaaro,* twakubaire tufookere nka Sodomu, kandi twakubaire tusisaine Gomora.”
30 Hati, tugambe ki? Ngu abamahanga noobu bakaba batarukutamu amaani kufooka ab’okuhikirra, bakahika ha kuhikirra, okuhikirra okuruga omu kwikiriza; 31 baitu Abaisaleeri noobu baraaba batamu amaani kuhondera ebiragiro eby’okuhikirra, batahikiirize ebiragiro ebi. 32 Habwaki? Habwokuba bakabihondera batarukusigikirra ha kwikiriza baitu ha bikorwa. Bakategwa ‘ibaale erirukutabaijura’ baatabaijuka, 33 nkooku kyahandiikirwe kiti: “Dora! Nimbyara omu Sayuni* ibaale erirukutabaijura n’omwandara ogurugirraho kugwa, baitu ogu agwikiririzaamu taliswara.”