Nk’Oku Yahandiikirwe Yohana
19 Nubwo Piraato yaragira batwale Yesu kandi bamuteere. 2 Kandi abaserikale baaruka ekondo y’amahwa baagimujweka ha mutwe, baamujweka orugoye orwa papo, 3 kandi baikara nibaija nambere ali nibamugambira bati: “Obusinge bube na iwe* Omukama w’Abayudaaya!” Kandi baikara nibamuteera empi h’amaiso. 4 Piraato yayongera yaturuka aheeru yabagambira ati: “Dora! Namubaleetera aheeru, nukwo mukimanye ngu naasanga ataine musango.” 5 Yesu yaturuka aheeru ajwaire ekondo y’amahwa n’orugoye rwa papo. Kandi Piraato yabagambira ati: “Dora! Onu nuwe omusaija!” 6 Baitu bakuru ba banyakatagara* hamu n’abalinzi obu baamurozere baatoka nibagamba ngu: “Ahanikwe ha muti! Ahanikwe ha muti!”* Piraato yabagambira ati: “Inywe mumutwale mumwite,* habwokuba nyowe nsangire ataine musango.” 7 Abayudaaya baamugarukamu bati: “Twine ekiragiro, kandi kusigikirra ha kiragiro eki, asemeriire kufa habwokuba ayefoire Omwana wa Ruhanga.”
8 Piraato obu yahuliire ebi bakaba nibabaza, yayeyongera kutiina, 9 yayongera yataaha omu nju y’omulemi, yagambira Yesu ati: “Owaanyu ninkaha?” Baitu Yesu tiyamugarukamu. 10 Nubwo Piraato yamukaguza ati: “Tokimanyire ngu nyine obusobozi obw’okukulekera kandi nyine obusobozi obw’okukwita?”* 11 Yesu yamugarukamu ati: “Tiwakubaire n’obusobozi bwona hali nyowe kakuba butarakuhairwe kuruga haiguru. Egi niyo ensonga habwaki omuntu ayampaireyo hali iwe aine ekibi ekirukukira ekyawe.”
12 Habw’ensonga egi, Piraato akaikara naaserra omulingo araamulekera, baitu Abayudaaya baatoka nibagamba bati: “Kakuba olekera omusaija onu, toli munywani wa Kaisaali. Ogu weena ow’ayefoora mukama aba naahakaniza Kaisaali.” 13 Piraato hanyuma y’okuhurra ebigambo ebi, yaleeta Yesu aheeru, Piraato yaikarra omu ntebe y’okucweramu omusango* omu kiikaro ekirukwetwa Amabaale Agaaliriirwe baitu omu Ruhebburaniya, ekirukwetwa Gabbasa. 14 Kikaba kiri kiro eky’okuteekaniza Okuhingurwaho; zikaba ziri nka saaha mukaaga* kandi yagambira Abayudaaya ati: “Dora! Omukama waanyu!” 15 Baitu bakatoka bati: “Mutwale! Mutwale! Ahanikwe ha muti!”* Piraato yabakaguza ati: “Nyowe nyite Omukama waanyu?” Bakuru ba banyakatagara baagarukamu bati: “Titwine Omukama, oihireho Kaisaali.” 16 Hanyuma yamubaha bamutwale kumwitira ha muti.
Nahabweki baatwara Yesu. 17 Yayetweka omuti,* yagenda omu kiikaro ekirukwetwa eky’Akahangara, omu Ruhebburaniya ekirukwetwa Gologoosa. 18 Obu baahikireyo, baamuterra emisumaali ha muti, n’abasaija abandi babiri, omu ha rubaju rumu, n’ondi ha rubaju orundi, kandi Yesu ali hagati yabo. 19 Piraato yahandiika ebigambo h’akaapa yabita ha muti. Bikaba nibigamba biti: “Yesu Omunyanazaleesi, Omukama w’Abayudaaya.” 20 Abayudaaya baingi bakasoma ebigambo ebi, habwokuba ekiikaro nambere Yesu yateeriirwe emisumaali ha muti kikaba kiri haihi n’orubuga, kandi bikaba bihandiikirwe omu Ruhebburaniya, Orulatini hamu n’Oruyonaani. 21 Baitu bakuru ba banyakatagara ab’Abayudaaya baagambira Piraato bati: “Otahandiika oti: ‘Omukama w’Abayudaaya,’ baitu handiika oti, akagamba ngu: ‘Niinyowe Omukama w’Abayudaaya.’” 22 Piraato yabagarukamu ati: “Eki mpandiikire nikyo eki.”
23 Abaserikale obu baamazire kuterra Yesu emisumaali ha muti, baakwata ebijwaro bye ebya haruguru baabibaganizaamu ebicweka bbina, buli muserikale yatwara ekicweka kimu kandi baatwara n’ekijwaro kye eky’omunda. Baitu ekijwaro kye eky’omunda kikaba kitaine rubaziiro, habwokuba kikaba kirukirwe kyona kuruga haiguru kuhika ha mukugiro. 24 Baagambirangana bati: “Tutakitaagura, leka tutome kucwamu nooha araakitwara.” Kinu kikabaho kuhikiiriza ekyahandiikirwe ekirukugamba kiti: “Bakabagana ebijwaro byange, kandi bakatoma habw’ebijwaro byange.” Mananu kwo ebintu binu bikakorwa abaserikale.
25 Harubaju rw’omuti Yesu ogu akaba ahanikirweho, hakaba heemeriireho nyina na nyinento, Malyamu mukazi wa Kileopasi, na Malyamu Magadalene. 26 Yesu obu yarozere nyina hamu n’omwegeswa ou yagonzaaga muno beemeriire haihi aho, yagambira nyina ati: “Mukazi, dora! Mutabani waawe!” 27 Hanyuma yagambira omwegeswa ati: “Dora! Nyoko!” Kandi kuruga kasumi ako, omwegeswa akatwara nyina Yesu omu ka ye.
28 Hanyuma y’ebi, Yesu obu yakimanyire ngu hati ebintu byona bimazire kuhikirra, kusobora kuhikiiriza ebyahandiikirwe, yagamba ati: “Nyine iroho.” 29 Aho hakaba haroho ekibindi ekiijwire amaarwa agarukusarra. Baateeka siponji ijwire amaarwa agarukusarra h’akati ka izobu,* baagimuta ha munwa. 30 Obu yamazire kurozaaho amaarwa ago agarukusarra, Yesu yagamba ati: “Kihoire!” yainamya omutwe gwe, yafa.*
31 Nkooku kikaba kiri kiro eky’Okuteekaniza, kandi Abayudaaya bakaba batarukugonza emitumbi ikale ha miti ha kiro kya Sabbiiti habwokuba (Sabbiiti egi ekaba eri nkuru muno), baasaba Piraato amaguru g’abasaija abo gahendwe kandi emitumbi yabo ehanuurwe kuruga ha miti. 32 Kandi abasaija bakaija baahenda amaguru g’omusaija ow’okubanza n’ag’omusaija ondi ow’akaba ahanikirwe harubaju rwe. 33 Baitu obu baahikire hali Yesu, baasanga amazire ira kufa, nahabweki batahende amaguru ge. 34 Omu h’abaserikale yamucumita icumu omu rubaju rwe, kandi ahonaaho haarugamu esagama n’amaizi. 35 Kandi ogu ayakiboine nuwe arukuha obwakaiso bunu, obwakaiso bwe bw’amananu kandi akimanyire ngu ebi arukubaza by’amananu, nukwo na inywe musobole kwikiriza. 36 Mananu kwo ebintu binu bikabaho nukwo bisobole kuhikiiriza ekyahandiikirwe kinu: “Busaho igufa lye na limu eririhendwa.”* 37 Kandi ekyahandiikirwe ekindi nikigamba kiti: “Balirora ogu ou baacumisire.”
38 Hanyuma y’ebintu ebi, Yusufu owa Alimaseya, ow’akaba ali mwegeswa wa Yesu baitu ow’omu nsita habwokuba akaba naatiina Abayudaaya, yasaba Piraato amwikirize atwale omutumbi gwa Yesu. Kandi Piraato yamwikiriza. Nahabweki yaija yagutwara. 39 Nikodemu, ow’akaba amwiziire ha kubanza omu bwire bw’ekiro, na uwe yaija, yaleeta ebirukuboya ebitabwirwe, ebya alowe na miira ebirukwingana nka kilo 33.* 40 Nahabweki, baakwata omubiri gwa Yesu baaguzinga omu ngoye z’ekitaani n’ebirukuboya kusigikirra ha ngeso y’Abayudaaya ey’okuziika. 41 Omu kiikaro nambere baamwitiire ha muti, hakaba haroho omusiri kandi omu musiri ogu hakaba harumu ekituuro* ekihyaka ekitakazikwamuga omuntu weena. 42 Habwokuba kikaba kiri kiro ky’Abayudaaya eky’Okuteekaniza, kandi ekituuro kiri haihi, baabyamyayo omubiri gwa Yesu.