Ebbaruha ya Paulo eya Kabiri Hali Abakolinso

9 Obukirukuhika ha buheereza obw’abarukwera, tikirukunyetaagisa kubahandiikira, 2 habwokuba nkimanyire ngu mwikara mweteekaniize, ekindeetera kubeesiimisa hali Abanyamakedoni, ngu aba Akaya baikaire beeteekaniize kumara omwaka, kandi obwekambi bwanyu buleetiire baingi omuli bo kwekamba. 3 Baitu nimbatumira ab’oruganda, nukwo okwesiima kwaitu habwanyu kutaba kwa busa, kandi ngu musobole kweteekaniza nkooku nabagambiire kwikara mweteekaniize. 4 Kitali eki, kakuba Abanyamakedoni baija na nyowe bakasanga muteeteekaniize kandi kunu tubatairemu obwesige, itwe hamu na inywe tuliswara. 5 Nahabweki, nkakirora ngu kikaba nikyetaagisa kwekambisa ab’oruganda kwija nambere muli kara, kandi muteekanize kara ekisembo eki mwaraganiize, nukwo kiteekanizibwe kara nk’ekisembo ekiheebwayo n’omutima ogw’okugaba hatali ogw’okuhambirizibwa.

6 Baitu obukirukuhika ha nsonga enu, ogu ow’asiga bike, aligesa bike, kandi n’ogu ow’asiga bingi, aligesa bingi. 7 Leka buli omu akole nkooku acwiremu omu mutima gwe, hatali n’okutontorroma rundi kuhambirizibwa, habwokuba Ruhanga agonza omuntu ow’agaba asemeriirwe.

8 Ruhanga naasobora kuleetera embabazi ze enyingi muno kweyongera nambere muli nukwo mwikale mwiniire kimu ebirukubamara n’ebirukwetaagisa omu buli kimu, kusobora kukora omulimo gwona omurungi. 9 (Nkooku kyahandiikirwe kiti: “Agabire omu bwingi; ahaire abanaku. Okuhikirra kwe kwikaraho ebiro n’ebiro.” 10 Ogu ow’aha omusigi embibo omu bwingi n’ebyokulya,* alibaha kandi alikanyisa embibo yanyu ey’okusiga kandi akanyise amagesa ganyu ag’okuhikirra.) 11 Omu buli kimu muheebwa emigisa nukwo musobole kugaba omu bwingi, kandi eki kireetera Ruhanga kusiimwa kuraba omuli itwe; 12 habwokuba omulimo gunu ogu mukozere hali boona tigugarukira ha kuhikyaho abarukwera ebyetaago byabo, baitu gurugamu kusiima muno Ruhanga. 13 Habw’obwakaiso obuheereza bunu* burukuha, banyumiza Ruhanga habwokuba mworobera amakuru amarungi agarukukwata hali Kristo, nkooku mwakirangiriire omu rwijwire, kandi habwokuba mubagabira kandi mugabira boona. 14 Kandi beesengereza habwanyu, nibooleka ngu nibabagonza muno habw’embabazi za Ruhanga enyingi muno ezi aboolekere.

15 Asiimwe Ruhanga habw’ekisembo kye ekya busa, ekitagambwa.