EBBARUHA YA PAULO HALI FIREMOONI

1 Nyowe Paulo, omunyankomo habwa Kristo Yesu, ndi hamu na Timoseo ow’oruganda mugenzi waitu, nimpandiikira Firemooni omukozi mugenzi waitu, omugonzebwa, 2 na Apofiya munyaanya itwe, hamu na Arakipo omuserikale mugenzi waitu na hali ekitebe ekisorrokanira omu nju yaawe:

3 Embabazi enyingi muno* hamu n’obusinge ebiruga hali Isiitwe hamu na Mukama waitu Yesu Kristo, bibe hamu na iwe.

4 Nyikara ninsiima Ruhanga wange obu nkubazaaho omu saara zange, 5 obu nyikara nimpurra okwikiriza kwawe hamu n’okugonza oku oiniire Mukama waitu Yesu hamu n’abarukwera boona. 6 Kandi ninkusabira ngu okwikiriza iwe n’abaikiriza bataahi baawe oku mwine kukusobozese kwetegereza ekintu kyona ekirungi eki twine kuraba omu Kristo. 7 Habwokuba nkatunga okusemererwa kwingi kandi nahuumuzibwa muno, obu nahuliire okugonza kwawe, habwokuba emitima y’abarukwera ehuumuziibwe kuraba omuli iwe, ow’oruganda.

8 Habw’ensonga enu, noobu ndaaba nyine obugabe bwingi obw’okubaza ntarukutiina omu Kristo kukuragira kukora ekihikire, 9 ningonza kukwesengereza ninsigikirra ha kugonza habw’okurora ngu niinyowe Paulo ow’agurusire, ego, hati omunyankomo habwa Kristo Yesu. 10 Ninkwesengereza habwa Onesimo, ayafookere omwana wange obu nkaba ndi omu nkomo. 11 Ha kubanza akaba ataine omugaso hali iwe, baitu hati w’omugaso hali iwe, na nyowe. 12 Hati ogu ou ndukugonza muno kuruga ha mutima, nimmukugarurra.

13 Naakugondeze aikale hanu na nyowe nukwo ampeereze omu kiikaro kyawe ndi omu nkomo habw’amakuru amarungi. 14 Baitu tindukugonza kukora ekintu kyona otanyikiriize, nukwo osobole kukora ebikorwa ebirungi otahambiriziibwe, baitu oyegondiize wenka. 15 Obundi enu niyo ensonga habwaki yakurugireho habw’akacu kake,* nukwo osobole kwongera kuba na uwe habw’ebiro n’ebiro, 16 takyali mwiru, baitu naakira ha ky’okuba mwiru, ali w’oruganda arukugonzebwa muno-muno hali nyowe, baitu kukirayo hali iwe, omu mubiri, n’omu Mukama waitu. 17 Nahabweki obu oraaba ontwara kuba munywani waawe,* mutangirre omu mulingo ogw’embabazi nkooku waakuntangiriire. 18 Obu araaba yakusobiize rundi obu oraaba oine eki orukumutonga, okitonge nyowe. 19 Nyowe Paulo nimpandiika n’omukono gwange: Niinyija kukisasura kandi tikirukunyetaagisa kukugambira ngu, na iwe oine ibanja lyange. 20 Ow’oruganda, ninsaba onkoonyere omu bumu na Mukama waitu; ohuumuze omutima gwange omu Kristo.

21 Ninkigumya ngu noija kukora eki nkusabire kandi niyo ensonga habwaki nkuhandiikiire, nkimanyire ngu noija kukora n’ebirukukira ha binakugambira. 22 Ekindi, onteekanirize ahokwikara, habwokuba ninnihira ngu, kuraba omu saara zaawe niinyija kugaruka nambere muli.*

23 Epafura omunyankomo mugenzi wange omu Kristo Yesu, akuramukize, 24 na Marako, Alisitako, Dema, na Luka, abakozi bataahi bange.

25 Embabazi enyingi muno eza Mukama waitu Yesu Kristo, zibe na inywe habw’omwoyo ogu murukwoleka.