Omuhangaizima Ogw’okubanza

NOMANYA ekintu ky’okubanza Nuha ekiyakozire obu yarugire omu ryato n’amaka ge? Akahayo ekihongwa rundi ekisembo hali Ruhanga. Nosobora n’okukirora omu kisisani hansi. Nuha akahayo ekisembo ky’ebisoro okusiima Ruhanga okukizaho amaka ge kuruga omu kusandaara kw’amaizi.

Notekereza ekisembo kinu Yahwe akakisiima? Ego. Akanihiza Nuha ngu taligarukira kuhwerekereza ensi n’okusandaara kw’amaizi.

Ensi yoona obu yayomere, Nuha hamu n’amaka ge bakatandika obwomezi obuhyaka aheru y’eryato. Ruhanga akabaha omugisa kandi yabagambira ati: ‘Muzalege, mukanyege, mwijuze ensi.’

Baitu abantu obu bakuhulirege ha kusandaara kw’amaizi, bakutiinire muno ngu kinu nikisobora kugaruka kubaho. Nahabwekyo Ruhanga akataho ekintu ekyakwijukizege abantu ngu taligaruka kwijuza ensi yoona n’amaizi obundi. Nomanya ekiyataireho okubaijukiza? Kyali omuhangaizima.

Omuhangaizima gurorwa haiguru obu omusana gujwa hanyuma y’enjura kugwa. Omuhangaizima gwine erangi nyingi enungi. Oragurozire? Ogw’omukisisani ogurozire?

Kinu nikyo Ruhanga yagambire: ‘Nindaganiza ngu abantu n’ebisoro tibirigarukira kuhwerekerezebwa n’amaizi omurundi ogundi. Ntaireho omuhangaizima omubicu. Kandi omuhangaizima obu gurabahoga, ndaijuka omurago gwange.’

Obu orora omuhangaizima, gukwijukya ki? Ego, okunihiza kwa Ruhanga ngu taligarukira kuhwerekereza ensi obundi n’okusandaara kw’amaizi.