Ebbaruha Kuruga Hali Akatebe Akalemi

Obutumwa Hali Iwe Arukugonza Yahwe:

Yesu akagamba ngu “Kandi mulimanya amananu, namananu galibafora bobugabe.” (Yohana 8:32) Ebigambo ebi kanibigarramu amaani! Hataroho kugurukyagurukya, nikisoboka kumanya amananu, n’obu turaaba tuli “Omubiro ebyahanyuma” ebyakabi kaingi ebijwiremu ebisuba. (2 Timoseo 3:1) Noijuka omurundi gwawe ogw’okubanza kumanya amananu kuruga omu Kigambo kya Ruhanga? Ekyo kiine kuba kyakusemiize muno!

Baitu n’obukiraaba kiri kikuru kumanya amananu n’okwekamba kugagambiraho abandi, tusemeriire kurubasiza obwomezi bwaitu ha mananu agatwegere. Ekiratukonyera nukwo kwerindira omu kugonza kwa Ruhanga. Kinu nikitwarramu ki? Ebigambo Yesu yabalize omu kiro akyamaliriire atakafiire nibigarukamu ekikaguzo kinu. Akagambira abegeswa be abesigwa ati: “Obumukwata ebiragiro byange, muliikara omu kugonza kwange; nka nyowe okunakwasire ebiragiro bya Isenyowe, ninyikara omu kugonzakwe.”​—Yohana 15:10.

Wetegereze ngu Yesu akerindira omu kugonza kwa Ruhanga habw’okukwata ebiragiro bya Ise. Nikyo kimu naitwe omu kasumi kanu. Obu turaaba tuli ab’okwerindira omu kugonza kwa Ruhanga, tusemeriire kuhondera amananu agatwegere omu bwomeezi bwaitu obwa buli kiro. Omu kiro eki kyonyini, Yesu akagamba: ‘Muraba mubimayire ebi, munyina omugisa obu mubikora.’​—Yohana 13:17.

Twine okunihira ngu akatabu kanu nikaija kwongera kukukonyera kurubatira omu mananu kandi oyeyongere kwerindira omu “kugonza kwa Ruhanga. . . . Nukwo otunge obwomezi obutahwaho.”​—Yuda 21.