EKICWEKA 5

Okusandaara kw’Amaizi—Nibaha Abahulirize? Nibaha Abatarahulirize?

Abantu abarukukira obwingi omu kasumi ka Nuha bakakora ebintu bibi. Okubanza 6:5

Bamaraika ababi bajwaire emibiri y’abantu bali hamu n’abakazi

Adamu na Hawa obu bazaire abaana, abantu bakakanya omu nsi. Akasumi obu karabireho, bamaraika abamu baketeraniza ha bujeemi bwa Setani.

Bakaija omu nsi bayejweka emibiri y’abantu basobole kuswera abakazi. Abakazi bakazara abaana abafookere agantu ag’amaani maingi muno kandi agarukutiinisa.

Omukazi ahimbire enkerembe kandi omwojo n’amutera; abanefirimu, abaana babamaraika ababi, nibarwana

Ensi ekaijura abantu abakoraga ebintu bibi. Baibuli egamba: “Obubi bwomuntu bwingi omu nsi, nokulenge’ra kwona okwebitekerezo byomutimagwe kukaba kuli kubi obutosa.”

Nuha akahuliriza Ruhanga kandi y’ayombeka eryato. Okubanza 6:13, 14, 18, 19, 22

Nuha akaba ali musaija murungi. Yahwe akagambira Nuha ngu akaba n’agenda kuhwerekereza abantu ababi mu kusandaara kw’amaizi.

Ruhanga akagambira Nuha kwombeka eryato erikooto muno, atahyemu ab’omunju ye n’ebisoro eby’emiringo yoona.

Nuha n’ahabura abantu ha kusandaara kw’amaizi okwali nikugenda kwija baitu abantu nibamusekereza

Nuha akarabura abantu ha kusandaara kw’amaizi okwali nikugenda kwija, baitu batamuhulirize. Abamu bakamuseke’ra; n’abandi bamunoba.

Nuha n’eka ye nibasorooza ebisoro kubitwara omu ryato

Eryato obu ryahoire kwombekwa, Nuha akalitahyamu ebisoro.