Habwaki Tugenda omu Nso’rokano Enkooto?

Omanyire ensonga habwaki abantu abolekerwe hanu basemerirwe muno? Ensonga eri nti, bali omu rumu ha nso’rokano zaitu enkooto. Abaheereza ba Ruhanga abaira bakaragirwa kuso’rokanaga emirundi esatu buli mwaka. Naitwe tulindiira enso’rokano za mulingo nk’ogu. (Ekyebiragiro 16:16) Buli mwaka tuba nʼensoʼrokano isatu enkooto. Haroho ensʼorokano ibiri ezʼekicweka ezimara ekiro kimu kimu. Kandi haroho orusoʼrokano orundi orukooto orumara ebiro bisatu. Enso’rokano zinu zitugasira zita?

Zikurakuraniza engonzi n’obumu omu kitebe Ekikristaayo. Nk’oku Abaisareri basemererwaaga kukugiza Yahwe “omu bitebe,” naitwe tumuramya hamu omu nso’rokano ez’embaganiza. (Zabuli 26:12; 111:1) Enso’rokano zinu zituha omugisa ogw’okutangatangana n’okubazaho n’Abakaiso ba Yahwe ababa barugire omu bitebe ebindi rundi omu nsi ezindi. Esaha ez’ekyamusana tulya ebitubohere tuli n’ab’oruganda nitubaza hamu, ekintu ekyongera okusemererwa omu nso’rokano zinu. (Engeso 2:42) Enso’rokano zituhereza, omugisa ogw’okurorra kimu okugonza okututeraniza hamu nk’ab’oruganda omu nsi yoona.​—1 Petero 2:17.

Zitukonyera kukurakurana omu by’omwoyo. Abaisareri bakagasirwa obu basoboroirwe kandi bayetegereza amakuru g’Ebyahandiikirwe. (Nehemiya 8:8, 12) Omu mulingo nugwo gumu, naitwe tugasirwa muno kuruga omu bitwega kuruga omu Baibuli tuli omu nso’rokano enkooto. Buli ruso’rokano ruba n’omutwe ogurukusigikirra ha Baibuli. Embazo n’ebyokurorraho ebibayo bitukonyera kutwara obwomezi bwaitu nkoku Ruhanga agonza. Tugarurwamu amaani obutuhu’ra omulingo Bakristaayo bagenzi baitu basoboire kulinda obwesigwa bwabu omu biro binu ebya hampero. Omu ruso’rokano orw’ebiro bisatu, habamu emizaano eyetukonyera kwetegereza kurungi ebitusoma kuruga omu Baibuli kandi tukatungamu eby’okwega. Kandi omu nso’rokano zinu habayo okubatiza kwabo abehaireyo kuhereza Ruhanga.

• Habwaki tuba n’okusemererwa omu nso’rokano zaitu enkooto?

• N’osobora kugasirwa ota ogenzere omu ruso’rokano orukooto?