Habwaki Ruhanga Aine Ekitebe Ekitekaniziibwe Kurungi?

1. Habwaki Ruhanga Y’atekaniize ihanga lya Isareri eryeira?

Ruhanga akatekaniza abaijukuru ba Iburahimu y’abafoora ihanga kandi y’abaha ebiragiro. Ihanga eryo akalyeta “Isareri.” Akalikwasa Ekigambo kye n’agonza nilyo lyebembere okuramya okw’amananu. (Zabuli 147:19, 20) Amahanga agandi g’akurorire hali lyo.​—Soma Okubanza 22:18.

Ruhanga akakoma Abaisareri kuba abakaiso be. Ebyafaayo byabu byoleka omulingo abantu bagasirwa obu bahondera ebiragiro bya Ruhanga. (Ekyebiragiro 4:6) Kuraba omu Baisareri, abantu abandi bakusoboire kumanya Ruhanga ow’amananu.​—Soma Isaya 43:10, 12.

2. Habwaki nikyetaagisa Abakristaayo ab’amananu kuba batekaniziibwe kurungi?

Akasumi kakahika Abaisareri balekaho kuhondera ebiragiro bya Ruhanga nawe y’abaleka. Omu kikaro kyabu akatekaho ekitebe ky’Abakristaayo. (Matayo 21:43; 23:37, 38) Hati Abakristaayo ab’amananu nubo barukuheereza nk’Abakaiso ba Yahwe omu kikaro ky’Abaisareri.​—Soma Engeso 15:14, 17.

Yesu akatekaniza abegeswa be kutebeza n’okufoora abantu abegeswa omu mahanga goona. (Matayo 10:7, 11; 24:14; 28:19, 20) Omulimo gw’okutebeza niguhika ha kumalira omu kasumi ak’empero y’entekaniza y’ebintu enu embi. Yahwe akozere ekintu ekitakabahoga n’ateraniza hamu abantu kuruga omu mahanga goona omu kuramya okw’amananu. (Okusuku’rwa 7:9, 10) Abakristaayo ab’amananu batekaniziibwe n’ekigendererwa eky’okukonyerangana n’okugarranganamu amaani. Okwehinguliriza ensi yoona, baine entekaniza niyo emu ey’okwegesebwa kuruga omu Baibuli bali omu nso’rokano zaabu.​—Soma Abaheburaniya 10:24, 25.

3. Ekitebe ky’Abakaiso ba Yahwe ekiroho hati kikatandika kita?

Ekitebe ky’Abakaiso ba Yahwe ekiroho hati kikatandika omu myaka ya 1870, akatebe ak’abeegi ba Baibuli obu katandikire kuseruliriza ha mananu agali omu Baibuli. Bakaba bakimanyire ngu Yesu akatekaniza ekitebe ky’Abakristaayo basobole kutebeza, nahabwekyo bakatandika okurangirra amakuru ag’obukama omu nsi zoona. Ibara Abakaiso ba Yahwe bakalitunga omu mwaka 1931.​—Soma Engeso 1:8; 2:1, 4; 5:42.

4. Abakaiso ba Yahwe batekaniziibwe bata?

Omu kyasa ekyokubanza ebitebe by’Aby’Abakristaayo omu nsi nyiingi bikagasirwa kuruga omu bwebembezi bw’akatebe akalemi akatwaraga Yesu nk’Omutwe gw’ekitebe Ekikristaayo. (Engeso 16:4, 5) N’omu bwire bwaitu Abakaiso ba Yahwe nibagasirwa kuruga omu bwebembezi bw’akatebe akalemi ak’abagurusi abatendekerwe kurungi. Nikarolerra amataagi g’Abakaiso ba Yahwe, agahindura, gateera, kandi gagaba ebitabu ebirukusigikirra ha Baibuli mu ndiimi ezirukuhingura 600. Omu mulingo ogu akatebe kanu nikasobora kuterekereza n’okugarramu amaani ebitebe ebirukuhingura 100,000 omu nsi yoona. Mu buli kitebe, abasaija abakuzire omu by’omwoyo baheereza nk’abagurusi rundi abarolerezi. Abasaija banu barolerra igana lya Ruhanga n’okugonza.​—Soma 1 Petero 5:2, 3.

Abakaiso ba Yahwe batekaniziibwe kutebeza amakuru amarungi n’okuhindura abantu nibabafoora abegeswa. Nk’abakwenda, naitwe tutebeza nju ha nju. (Engeso 20:20) Nitwega Baibuli n’abo abarukugonza amananu. Tituli kitebe butebe, baitu tuli nk’eka eri omu mikono eya taata ow’engonzi, tuli nk’aboruganda abafaayo buli omu hali mugenzi we. (2 Abasesalonika 1:3) Abakaiso ba Yahwe nubo abarukukirayo kusemererwa omu nsi habwokuba betekaniize okusemeza Ruhanga n’okukonyera abantu abandi.​—Soma Zabuli 33:12; Engeso 20:35.