Yahwe Akaha Samusoni Amaani Maingi

Habw’Abaisareri baingi kugaruzaamu kuramya ebisisani, Yahwe akaleka Abafirisiti babaleme. Baitu Abaisareri abamu bakaba nibagonza Yahwe. Omu hali bo bamwetaga Manoha. Akaba aine omukazi baitu bataine omwana wena. Kiro kimu, Yahwe akatuma maraika kugenda kubaza na mukazi wa Manoha. Maraika akamugambira ati: ‘Noija kuzaara omwana omwojo. Nuwe alijuna Abaisareri kuruga omu mikono y’Abafirisiti, kandi naija kuba Munaziri.’ Omanyire Abanaziri bakaba bantu ba mulingo ki? Bakaba baheereza ba Yahwe ab’embaganiza. Abanaziri tibaikirizibwaga kusara isoke lyabo.

Obwire obu bwarabireho, Manoha akazara omwana omwojo, yamuruka ibara Samusoni. Samusoni obu yakuzire, Yahwe akamuha amaani maingi muno. Akaba n’asobora kwita entale n’emikono ye atakozeseze ekintu kindi kyona. Kiro kimu, Samusoni akaita Abafirisiti 30 hataroho muntu wena amukonyire. Abafirisiti bakamunoba baikara nibaserra omulingo gw’okumwita. Kiro kindi, Samusoni obwakaba abyamire omu Gaza omu bwire bw’ekiro, Abafirisiti bakagenda ha nyigi ez’orubuga bamulinda nukwo bamwite obwire bwa nyenkya kara. Baitu Samusoni akaimuka omu itumbi yagenda ha nyigi ez’orubuga yazikuura omu kisika. Akazetweka h’amabega ge yatemba nazo ha rusozi orukaba ruli haihi na Heburoni!

Abafirisiti bakacwamu kugenda hali omukazi ou Samusoni yagonzaga arukwetwa Derira bamugambira bati: ‘Buli omu naija kukuha ebicweka rukumi n’ekikumi eby’efeza kakuba otugambira nambere Samusoni aiha amaani ge goona. Nitugonza kumukwata tumute omu nkomo.’ Derira akaba n’agonza sente nahabweki, akaikiriza kubakonyera. Samusoni akabanza kwanga kumugambira nambere yaihaga amaani ge. Baitu akaikara namugadya kuhika obu yamugambiire ensita ye. Akamugambira ati: ‘Isoke lyange tibakalisaraga habwokuba ndi Munaziri.’ ‘Kakuba balisara, amaani ganu nigasobora kumpwamu.’Enu ekaba nsobi y’amaani ei Samusoni yakozere. Tinukwo?

Aho n’aho Derira akagambira Abafirisiti ngu: ‘Manyire ensita ye!’ Derira akagwijagiza Samusoni ha bibero bye, hanyuma yayeta omuntu yaija yasara isoke lye lyona. Hanyuma, Derira akatoka n’agamba ati: ‘Samusoni, Abafirisiti baizire!’ Samusoni obu yaimukire, amaani ge goona gakaba gagenzere. Abafirisiti bakamukwata, bamwihamu amaiso, kandi bamuta omu nkomo.

Kiro kimu, Abafirisiti bakesorooza hamu omu yekaru ya ruhanga wabo arukwetwa Dagoni kandi batandika kutoka nibagamba, ‘ruhanga waitu atuhaire samusoni! Mumulete hanu, aije atusemeze.’ Bakamwemereza hagati y’enyomyo ibiri batandika kumusekereza. Samusoni akatoka yagamba: ‘Ai Yahwe, ninkusaba ompe amaani omurundi gunu gwonka.’ Kasumi ako, isoke lya Samusoni likaba limezere kandi liraihire muno. Akakozesa amaani ge goona yasindika enyomyo eza yekaru, ekyombeko kyona kyagwa hansi kyaita abantu boona abakaba bali omu yekaru otwaliremu na Samusoni.